ਨਵੀਂ ਦਿੱਲੀ: ਗੈਂਗਸਟਰ ਕਾਲਾ ਜਠੇੜੀ ਅਤੇ ਲੇਡੀ ਡਾੱਨ ਅਨੁਰਾਧਾ ਚੌਧਰੀ ਦਾ ਮੰਗਲਵਾਰ ਨੂੰ ਵਿਆਹ ਹੋ ਗਿਆ। ਉਨ੍ਹਾਂ ਦਾ ਵਿਆਹ ਦਿੱਲੀ ਦੇ ਦਵਾਰਕਾ ਵਿੱਚ ਸੰਤੋਸ਼ ਗਾਰਡਨ ਬੈਂਕੁਏਟ ਵਿੱਚ ਹੋਇਆ। ਵਿਆਹ ਮੌਕੇ ਸੁਰੱਖਿਆ ਦੇ ਭਾਰੀ ਪ੍ਰਬੰਧ ਕੀਤੇ ਗਏ ਹਨ। 4 ਰਾਜਾਂ ਦੀ ਪੁਲਿਸ ਵਿਆਹ 'ਤੇ ਨਜ਼ਰ ਰੱਖ ਰਹੀ ਹੈ। ਇਸ ਵਿਆਹ ਲਈ ਸੁਰੱਖਿਆ ਦੇ ਪੁਖਤਾ ਇੰਤਜ਼ਾਮ ਕਰਨਾ ਅਤੇ ਵਿਆਹ ਨੂੰ ਸ਼ਾਂਤੀਪੂਰਵਕ ਕਰਵਾਉਣਾ ਪੁਲਿਸ ਅਤੇ ਸੁਰੱਖਿਆ ਏਜੰਸੀਆਂ ਲਈ ਵੱਡੀ ਚੁਣੌਤੀ ਬਣੀ ਹੋਈ ਹੈ।
ਸੰਤੋਸ਼ ਗਾਰਡਨ ਬੈਂਕੁਏਟ ਵਿਖੇ ਸੁਰੱਖਿਆ ਕਰਮਚਾਰੀਆਂ ਵੱਲੋਂ ਖਾਣ-ਪੀਣ ਅਤੇ ਹੋਰ ਕੰਮ ਕਰਨ ਵਾਲੇ ਕਰਮਚਾਰੀਆਂ ਦੇ ਆਧਾਰ ਕਾਰਡ ਜਾਂ ਹੋਰ ਆਈਡੀ ਪਰੂਫ਼ ਦੀ ਜਾਂਚ ਕੀਤੀ ਗਈ, ਜਿਸ ਤੋਂ ਬਾਅਦ ਹੀ ਉਨ੍ਹਾਂ ਨੂੰ ਅੰਦਰ ਜਾਣ ਦਿੱਤਾ ਗਿਆ। ਇਸ ਤੋਂ ਇਲਾਵਾ ਸੁਰੱਖਿਆ ਜਾਂਚ ਲਈ ਇੱਥੇ ਦੋ ਮੈਟਲ ਡਿਟੈਕਟਰ ਲਗਾਏ ਗਏ ਹਨ। ਹਰ ਕਰਮਚਾਰੀ ਅਤੇ ਰਿਸ਼ਤੇਦਾਰਾਂ ਨੂੰ ਇਸ ਵਿੱਚੋਂ ਲੰਘਣਾ ਪਵੇਗਾ।
ਜਾਣਕਾਰੀ ਅਨੁਸਾਰ ਅੱਜ ਸਵੇਰੇ 10 ਵਜੇ ਦੇ ਕਰੀਬ ਹਿਰਾਸਤੀ ਪੈਰੋਲ ਦੌਰਾਨ ਸੁਰੱਖਿਆ ਮੁਲਾਜ਼ਮ ਕਾਲਾ ਜਠੇੜੀ ਨੂੰ ਤਿਹਾੜ ਜੇਲ੍ਹ ਤੋਂ ਲੈ ਕੇ ਆਏ। ਖਾਸ ਗੱਲ ਇਹ ਸੀ ਕਿ ਲਾੜੀ ਲੇਡੀ ਡਾੱਨ ਅਨੁਰਾਧਾ ਚੌਧਰੀ ਲਾਲ ਸੂਟ ਪਾ ਕੇ ਆਪਣੀ ਸਕਾਰਪੀਓ ਕਾਰ ਚਲਾ ਕੇ ਵਿਆਹ ਦੇ ਪੰਡਾਲ 'ਚ ਪਹੁੰਚੀ। ਅਨੁਰਾਧਾ ਦੇ ਨਾਲ ਕਈ ਹੋਰ ਲੋਕ ਵੀ ਮੌਜੂਦ ਸਨ। ਪੁਲਿਸ ਮੁਲਾਜ਼ਮਾਂ ਦੇ ਨਾਲ-ਨਾਲ ਮੀਡੀਆ ਦਾ ਵੀ ਭਾਰੀ ਇਕੱਠ ਰਿਹਾ। ਜਾਣਕਾਰੀ ਇਹ ਵੀ ਸਾਹਮਣੇ ਆਈ ਹੈ ਕਿ ਸੁਰੱਖਿਆ ਦੇ ਵਿਚਕਾਰ ਕਾਲਾ ਜਠੇੜੀ ਅਤੇ ਅਨੁਰਾਧਾ ਦੇ ਵਿਆਹ ਦਾ ਸੋਸ਼ਲ ਮੀਡੀਆ 'ਤੇ ਸਿੱਧਾ ਪ੍ਰਸਾਰਣ ਕੀਤਾ ਜਾਵੇਗਾ।
ਮੀਡੀਆ ਵਿੱਚ ਹੀ ਨਹੀਂ ਸਗੋਂ ਸੋਸ਼ਲ ਮੀਡੀਆ ‘ਤੇ ਵੀ ਦੋਵਾਂ ਗੈਂਗਸਟਰਾਂ ਦੇ ਵਿਆਹ ਦੀ ਚਰਚਾ ਉਸੇ ਦਿਨ ਸ਼ੁਰੂ ਹੋ ਗਈ ਸੀ ਜਦੋਂ ਦਵਾਰਕਾ ਅਦਾਲਤ ਨੇ ਜਠੇੜੀ ਨੂੰ ਵਿਆਹ ਲਈ 6 ਘੰਟੇ ਦੀ ਹਿਰਾਸਤ ਵਿੱਚ ਪੈਰੋਲ ਦਿੱਤੀ ਸੀ। ਇਸ ਲਈ ਤਿਹਾੜ ਜੇਲ੍ਹ ਤੋਂ ਵਿਆਹ ਵਾਲੀ ਥਾਂ 'ਤੇ ਆਉਣਾ ਅਤੇ ਵਿਆਹ ਦੀਆਂ ਸਾਰੀਆਂ ਰਸਮਾਂ ਪੂਰੀਆਂ ਕਰਨ ਤੋਂ ਬਾਅਦ ਕਾਲਾ ਜਠੇੜੀ ਨੂੰ ਵਾਪਸ ਤਿਹਾੜ ਜੇਲ੍ਹ ਲਿਜਾਣਾ ਪੁਲਿਸ ਲਈ ਵੱਡੀ ਚੁਣੌਤੀ ਹੈ।
ਖਾਸ ਤੌਰ 'ਤੇ ਜਦੋਂ ਵਿਆਹ ਤੋਂ ਦੋ ਦਿਨ ਪਹਿਲਾਂ ਕਾਲਾ ਜਠੇੜੀ ਗਿਰੋਹ ਦੇ ਕੁਝ ਬਦਮਾਸ਼ ਏਜੰਸੀਆਂ ਦੀ ਗ੍ਰਿਫ਼ਤ ਵਿਚ ਆ ਗਏ ਹਨ। ਇਸ ਕਾਰਨ ਇਹ ਖਦਸ਼ਾ ਵੀ ਪ੍ਰਗਟਾਇਆ ਜਾ ਰਿਹਾ ਹੈ ਕਿ ਉਸ ਦੇ ਗਿਰੋਹ ਦੇ ਲੋਕ ਕਾਲਾ ਜਠੇੜੀ ਨੂੰ ਛੁਡਾਉਣ ਦੀ ਕੋਸ਼ਿਸ਼ ਕਰ ਸਕਦੇ ਹਨ ਕਿਉਂਕਿ ਉਸ ਦੇ ਸਾਥੀਆਂ ਨੇ ਇੱਕ ਵਾਰ ਕਾਲਾ ਜਠੇੜੀ ਨੂੰ ਹਰਿਆਣਾ ਪੁਲਿਸ ਦੀ ਹਿਰਾਸਤ ਵਿੱਚੋਂ ਛੁਡਵਾਇਆ ਸੀ। ਇਸ ਦੇ ਨਾਲ ਹੀ ਸੁਰੱਖਿਆ ਏਜੰਸੀਆਂ ਵਲੋਂ ਇਹ ਵੀ ਸ਼ੰਕਾ ਪ੍ਰਗਟਾਈ ਜਾ ਰਹੀ ਹੈ ਕਿ ਵਿਰੋਧੀ ਗਿਰੋਹ ਕਿਸੇ ਤਰ੍ਹਾਂ ਕਾਲਾ ਜਠੇੜੀ 'ਤੇ ਹਮਲਾ ਕਰਨ ਦਾ ਮੌਕਾ ਲੱਭ ਰਹੇ ਹਨ, ਇਸ ਲਈ ਸੁਰੱਖਿਆ ਨੂੰ ਬਹੁਤ ਸਖ਼ਤ ਕੀਤਾ ਗਿਆ ਹੈ।
ਜਾਣੋ ਕੌਣ ਹੈ ਕਾਲਾ ਜਠੇੜੀ: ਗੈਂਗਸਟਰ ਸੰਦੀਪ ਉਰਫ਼ ਕਾਲਾ ਜਠੇੜੀ ਹਰਿਆਣਾ ਦੇ ਸੋਨੀਪਤ ਦੇ ਪਿੰਡ ਜਠੇੜੀ ਦਾ ਰਹਿਣ ਵਾਲਾ ਹੈ। ਉਸ ਖ਼ਿਲਾਫ਼ ਤਿੰਨ ਦਰਜਨ ਦੇ ਕਰੀਬ ਗੰਭੀਰ ਧਾਰਾਵਾਂ ਤਹਿਤ ਕੇਸ ਦਰਜ ਹਨ। ਉਹ ਨਾਮੀ ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਦਾ ਖਾਸ ਦੋਸਤ ਹੈ ਅਤੇ ਹਰਿਆਣਾ ਵਿੱਚ ਉਹ ਹੀ ਗੈਂਗ ਦੀ ਕਮਾਂਡ ਕਰਦਾ ਹੈ। 2021 ਵਿੱਚ ਜਠੇੜੀ ਨੂੰ ਦਿੱਲੀ ਪੁਲਿਸ ਨੇ ਅਨੁਰਾਧਾ ਦੇ ਨਾਲ ਮੁਜ਼ੱਫਰਪੁਰ ਤੋਂ ਗ੍ਰਿਫਤਾਰ ਕੀਤਾ ਸੀ।
ਕੌਣ ਹੈ ਲੇਡੀ ਡਾੱਨ ਅਨੁਰਾਧਾ ਚੌਧਰੀ?: ਅਨੁਰਾਧਾ ਚੌਧਰੀ ਉਰਫ਼ ਲੇਡੀ ਡਾੱਨ ਉਰਫ਼ ਮੈਡਮ ਮਿੰਜ ਰਾਜਸਥਾਨ ਦੀ ਰਹਿਣ ਵਾਲੀ ਹੈ। ਉਹ ਕਰੀਬ 15 ਸਾਲਾਂ ਤੋਂ ਅਪਰਾਧ ਦੀ ਦੁਨੀਆ ਵਿੱਚ ਹੈ। ਸ਼ੁਰੂ ਵਿੱਚ ਉਹ ਰਾਜਸਥਾਨ ਦੇ ਨਾਮੀ ਗੈਂਗਸਟਰ ਆਨੰਦਪਾਲ ਨਾਲ ਜੁੜੀ ਹੋਈ ਸੀ। ਪੁਲਿਸ ਮੁਕਾਬਲੇ ਵਿਚ ਆਨੰਦਪਾਲ ਦੇ ਮਾਰੇ ਜਾਣ ਤੋਂ ਬਾਅਦ ਉਹ ਕਾਲਾ ਜਠੇੜੀ ਦੇ ਨਾਲ ਜੁੜ ਗਈ। ਅਨੁਰਾਧਾ ਖਿਲਾਫ ਕਈ ਅਪਰਾਧਿਕ ਮਾਮਲੇ ਦਰਜ ਹਨ। ਫਿਲਹਾਲ ਉਹ ਜ਼ਮਾਨਤ 'ਤੇ ਜੇਲ੍ਹ ਤੋਂ ਬਾਹਰ ਹੈ ਅਤੇ ਸੋਨੀਪਤ 'ਚ ਕਾਲਾ ਜਠੇੜੀ ਦੇ ਘਰ ਰਹਿੰਦੀ ਹੈ।
