ନୟାଗଡ଼: କୃଷିମନ୍ତ୍ରୀ ଅରୁଣ ସାହୁଙ୍କ ଜିଲ୍ଲାରେ ଉଜୁଡି ଯାଇଛି ଧାନ ଫସଲ l ଧାର କରଜ କରି ଧାନ ଚାଷ କରିଥିବା ଚାଷୀ ଏବେ କାନ୍ଦୁଛି l ମୁଣ୍ଡ ଝାଳ ତୁଣ୍ଡରେ ମାରି ଚାଷୀ ସୁନାର ଫସଲ ଫଳାଇଥିଲା l କିନ୍ତୁ ସବୁ ଉଜାଡି ଦେଲା ବାତ୍ୟା ଜୱାଦ(Cyclone Jawad) l ଏନେଇ ଚାଷୀଙ୍କୁ ତୁରନ୍ତ କ୍ଷତିପୂରଣ ଦେବାକୁ ତେଜୁଛି ଆନ୍ଦୋଳନ l ବିଭିନ୍ନ ସଂଗଠନ ତରଫରୁ ଜିଲ୍ଲାରେ ଆନ୍ଦୋଳନ କରାଯାଉଥିବା ଦେଖିବାକୁ ମିଳିଛି l
ଏପଟେ କୃଷି ବିଭାଗ ତରଫରୁ କରାଯାଇଥିବା ସର୍ଭେକୁ ଏପର୍ଯ୍ୟନ୍ତ ସାର୍ବଜନୀନ କରାଯାଇନାହିଁ l ତେଣୁ ଏହାକୁ ନେଇ ଚାଷୀ ମନରେ ଅସନ୍ତୋଷ ଦେଖାଦେଇଛି l ନୂଆଗାଁ ବ୍ଲକର ସହିଦ କଷ୍ଟୀ ଡାକୁଆ ସଚେତନ ନାଗରିକ ମଞ୍ଚ, ଚାଷୀଙ୍କୁ କ୍ଷତିପୂରଣ ଦେବାକୁ ଦାବି କରିଥିବା ବେଳେ ଶତାଧିକ ଚାଷୀ ସାଇକେଲ ରାଲି କରି ନୂଆଗାଁ ତହସିଲଦାର ପ୍ରଳୟ ନନ୍ଦ ଶତପଥିଙ୍କୁ ଭେଟି କ୍ଷତିପୂରଣ ଦାବି କରିଥିଲେ l ସରକାରଙ୍କ ନିକଟରେ ଚାଷୀଙ୍କ ସମସ୍ୟକୁ ଉପସ୍ଥାପନା କରିବା ସହ ସହାୟତା ଯୋଗାଇ ଦେବେ ବୋଲି ପ୍ରତିଶ୍ରୁତି ଦେଇଛନ୍ତି ତହସିଲଦାର l
ତେବେ ସମାଜସେବୀ ତଥା ନୂଆଗାଁ ପାଞ୍ଚାୟତର ସମିତି ସଭ୍ୟ ରମେଶ ଚନ୍ଦ୍ର ପ୍ରଧାନଙ୍କ ନେତୃତ୍ବରେ ଚାଷୀ ସଂଗଠିତ ହୋଇ ତହସିଲଦାରଙ୍କୁ ଭେଟିଥିଲେ l
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
