ନୟାଗଡ଼: ଦଶପଲ୍ଲା ଥାନା ଟାକରା ଗ୍ରାମପଞ୍ଚାୟତ ଅନ୍ତର୍ଗତ ବୁଗୁଡାରେ ବୋମା ଆତଙ୍କ । ବୋମା ବିସ୍ଫୋରଣର ପ୍ରଚଣ୍ଡ ଶବ୍ଦ ଯୋଗୁଁ ସ୍ଥାନୀୟ ବାସିନ୍ଦା ଆତଙ୍କିତ ହୋଇପଡିଥିଲେ । ଏହି ଗ୍ରାମର ୫୭ ନଂ ଜାତୀୟ ରାଜପଥ ପାର୍ଶ୍ବରେ ଥିବା ଏକ ପରିତ୍ୟକ୍ତ ଘରୁ ମିଳିଥିବା ଏକ ବାକ୍ସରୁ ବୋମା ବିସ୍ଫୋରଣ ହୋଇଥିବା ଜଣାପଡିଛି ।
ସୂଚନା ଅନୁଯାୟୀ, ଏହି ପରିତ୍ୟକ୍ତ ଘରେ ଏକ ଜରି ବ୍ୟାଗରେ ଦୁଇଟି ବୋମା ଥିଲା । ଆଜି ଘରକାମ ପାଇଁ ଶ୍ରମିକମାନେ ଇଟା ଆଣିବାକୁ ଯାଇଥିବା ବେଳେ ବ୍ୟାଗରେ କିଛି ଜିନିଷ ଥିବା ଦେଖି ସନ୍ଦେହ କରିଥିଲେ । ପରେ ଏନେଇ ଗ୍ରାମବାସୀଙ୍କୁ ମଧ୍ୟ ଜଣାଇଥିଲେ । ଗ୍ରାମର କିଛି ଯୁବକ ବାକ୍ସରେ କଣ ଅଛି ଭାବି ସେଥିରୁ ଗୋଟିଏ ବାକ୍ସକୁ ରାସ୍ତାକୁ ଫୋପାଡ଼ି ଦେଇଥିଲେ । ଏହି ସମୟରେ ପ୍ରଚଣ୍ଡ ଶବ୍ଦ କରି ବୋମା ବିସ୍ଫୋରଣ ହୋଇଥିବା ସ୍ଥାନୀୟ ଲୋକେ କହିଛନ୍ତି ।
ବୋମା ବିସ୍ଫୋରଣର ଶବ୍ଦ ପ୍ରାୟ ୫ କିଲୋମିଟର ପର୍ଯ୍ୟନ୍ତ ଶୁଭିଥିଲା । ଏନେଇ ଗ୍ରାମବାସୀ ଆତଙ୍କିତ ହୋଇ ଦଶପଲ୍ଲା ପୋଲିସକୁ ଖବର ଦେଇଥିଲେ । ଘଟଣାସ୍ଥଳରେ ଦଶପଲ୍ଲା ପୋଲିସ ପହଞ୍ଚି ଏକ ଅଫୁଟା ବୋମାକୁ ନିଷ୍କ୍ରିୟ କରି ତଦନ୍ତ ଆରମ୍ଭ କରିଛି । ତେବେ ଏଠାକୁ କିଏ ଓ କାହିଁକି ବୋମା ଆଣିଲା ତାହା ସ୍ପଷ୍ଟ ହୋଇନଥିବା ବେଳେ ପୋଲିସ ଘଟଣାର ଛାନଭିନ କରୁଛି ।
ଇଟିଭି ଭାରତ, ନୟାଗଡ଼
