ରାଇରଙ୍ଗପୁର: ଆଦିବାସୀଙ୍କ ପାଇଁ ସରକାରଙ୍କ କାହିଁ କେତେ ଯୋଜନା। ବିଜୁ ପକ୍କା ଘରଠାରୁ ଆରମ୍ଭ କରି ପ୍ରଧାନମନ୍ତ୍ରୀ ଆବାସ ଯୋଜନା ଯାଏଁ, ମାତ୍ର ସତରେ କଣ ସେମାନେ ଉପକୃତ ହେଉଛନ୍ତି ? ଏଠାକାର ଛବି ଦେଖିଲେ ଲାଗୁଛି ସରକାରଙ୍କ ସହାୟତା କଥା ଛାଡ ସରକାର କଣ ଜାଣିନଥିବେ । ସେମାନଙ୍କ ଦୁଃଖ ଓ ସମସ୍ୟା ବିଷୟରେ ଜାଣିବାକୁ ଇଟିଭି ଭାରତ ପହଞ୍ଚିଥିଲା ଲୁହାକାନୀ ପଞ୍ଚାୟତର ବାଙ୍କୀ ଗ୍ରାମର ଖଡିଆ ସାହିରେ ।
ଏହି ସାହିରେ ବସବାସ କରୁଥିବା ଖଡିଆ ସମ୍ପ୍ରଦାୟଙ୍କ ସ୍ଥିତି କହିଲେ ନସରେ । ନା ଅଛି ମୁଣ୍ଡ ଉପରେ ଛାତ ନା ଅଛି ସରକାରୀ ସହାୟତା । ପଲିଥିନ ତଳେ ଜୀବନ କାଟୁଛନ୍ତି ଏହି ସମ୍ପ୍ରଦାୟ । କିଛିଦିନ ତଳେ ଏମାନଙ୍କ ଭଙ୍ଗା ଦଦରା ଘର ଦେଖି ପ୍ରଶାସନିକ ଅଧିକାରୀ ପଲିଥିନ ଗୋଟେ ଗୋଟେ ଯୋଗାଇ ଦେଇଥିଲେ ।
ଅନ୍ୟପକ୍ଷେ ଖଡିଆ ସାହିର ଦଶରଥ ଦେହୁରୀ ତାଙ୍କ ଦୃଷ୍ଟିହୀନ ଝିଅ ସହ ପଲିଥିନ ତଳେ ରହି ଜୀବନ ଅତିବାହିତ କରୁଥିବା ବେଳେ ବୁଧୁବାରି ଦେହୁରୀ ବର୍ଷେ ତଳେ ତାଙ୍କ ସ୍ବାମୀଙ୍କୁ ହରାଇ ଦୁଇ ପୁଅ ସହିତ ଜୀବନ କାଟୁଛନ୍ତି । ସେପଟେ ରୋଜଗାରର କୌଣସି ପନ୍ଥା ନଥିବାରୁ ନିଜ ନିଜର ପରିବାର ସହିତ ଦୁଃଖ ଦୁର୍ଦ୍ଦଶାରେ ରହୁଥିବାର ଅଭିଯୋଗ କରିଛନ୍ତି ।
ସରକାର ଖଡିଆ ଜନଜାତିକୁ ସମାଜର ମୁଖ୍ୟ ସ୍ରୋତରେ ସାମିଲ କରିବା ପାଇଁ ବିଭିନ୍ନ ଯୋଜନା ପ୍ରଣୟନ କରୁଥିବା ବେଳେ ସ୍ବାଧୀନତାର ଏତେ ବର୍ଷ ପରେ ମଧ୍ୟ ଖଡିଆ ସମ୍ପ୍ରଦାୟର ଲୋକେ ବିଭିନ୍ନ ସୁବିଧା ସୁଯୋଗରୁ ବଞ୍ଚିତ । ବର୍ତ୍ତମାନ ସେମାନଙ୍କ ପାଇଁ ସାହାର କେବଳ ଟଙ୍କିକିଆ ଚାଉଳ । ଖୋଲା ଆକାଶ ତଳେ ରୋଷେଇ ବାସ କରୁଥିବା ବେଳେ ଘର ଭିତରେ ହି ସାପ ଓ ହାତୀ ପଶିଯିବାର ଭୟ ବି ରହିଛି ।
ଏନେଇ ଆମ ପ୍ରତିନିଧି ଲୁହାକାନୀ ଗ୍ରାମପଞ୍ଚାୟତର ସରପଞ୍ଚ ଓ ସ୍ଥାନୀୟ ତହସିଲଦାରଙ୍କୁ ସାକ୍ଷାତ କରିଥିଲେ । ତେବେ ସମସ୍ୟା ବିଷୟରେ ଅବଗତ ହୋଇ ଖୁବ ଶୀଘ୍ର ଏହାର ସମାଧାନ କରାଯିବ ବୋଲି ପ୍ରତିଶୃତି ଦେଇଛନ୍ତି...ଖାଲି ଦେଖିବାକୁ ବାକି ରହିଲା କେବେ ଖଡିଆ ବାସୀଙ୍କ ଦୁଃଖ କମୁଛି....
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ