ବାରିପଦା: ଜିଲ୍ଲାରେ ଆଉ ଏକ ହାତୀ ଛୁଆର ମୃତ୍ୟୁ । ରାସଗୋବିନ୍ଦପୁର ରେଞ୍ଜର ଭାଲୁଘେରା ଜଙ୍ଗଲରେ ହାତୀ ଛୁଆର ମୃତଦେହ ଠାବ । ଗତ ସେପ୍ଟେମ୍ବର ୨୭ ତାରିଖ ଦିନ ଝାଡ଼ଖଣ୍ଡ ଦଲମା ଜଙ୍ଗଲରୁ ପ୍ରାୟ ୬୦ରୁ ଊର୍ଦ୍ଧ୍ବ ହାତୀ ପଶ୍ଚିମବଙ୍ଗରୁ ଏହି ଜଙ୍ଗଲ ଦେଇ ଆସିଥିବା ବେଳେ ଏବେ ବେତନଟୀ ରେଞ୍ଜ ଅସନବଣୀ ଜଙ୍ଗଲରେ ରହିଛନ୍ତି । ତେବେ ଗତ ୨୭ ତାରିଖ ଦିନରୁ ହାତୀଟିର ମୃତ୍ୟୁ ହୋଇଥିବା ଅନୁମାନ କରାଯାଇଛି ।
ମୃତ ହାତୀଟି ଅଣ୍ଡିରା ହାତୀ ବୋଲି ଜଣାପଡ଼ିଥିବା ବେଳେ ବୟସ ପାଖାପାଖି ୪ ରୁ ୫ ବର୍ଷ ହେବ ବୋଲି ଅନୁମାନ କରାଯାଉଛି । ମଙ୍ଗଳବାର ଭାଲୁଘେରା ଗ୍ରାମର କିଛି ଲୋକ ଜଙ୍ଗଲକୁ ଶାଳପତ୍ର ତୋଳିବାକୁ ଯାଇଥିବାବେଳେ ମୃତ ହାତୀଛୁଆକୁ ଦେଖିଥିଲେ । ଖବର ପାଇବା ପରେ ବାରିପଦା ବନଖଣ୍ଡ ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ହାତୀ ମୃତ୍ୟୁର ପ୍ରକୃତ କାରଣ ବର୍ତ୍ତମାନ ସୁଦ୍ଧା ଜଣାପଡି ନାହିଁ । କିନ୍ତୁ ଏହା ସ୍ବଭାବିକ ମୃତ୍ୟୁ ବୋଲି କହିଛି ବନବିଭାଗ । ବନଖଣ୍ଡ ଅଧିକାରୀଙ୍କ ପ୍ରାଥମିକ ତଦନ୍ତ ରିପୋର୍ଟ କହୁଛି, ଦୁଇ ଦନ୍ତା ହାତୀଙ୍କ ଲଢେଇରେ ଛୁଆ ହାତୀର ମୃତ୍ୟୁ ହୋଇ ଥାଇପାରେ । ଶବ ବ୍ୟବଚ୍ଛେଦ ପରେ ହାତୀ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ଅଧିକାରୀ କହିଛନ୍ତି ।
ମୟୁରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
