ଝାରସୁଗୁଡା: ଶେଷରେ ଧରାପଡିଲା ଛତିଶଗଡ ପୋଲିସର ଦାଦାଗିରି । ମନୋଜ ମେହେରର ଧାନକୁ ଫେରାଇଲା ଛତିଶଗଡ ପୋଲିସ । ଏହାପରେ ପ୍ରତ୍ୟାହୃତ ହୋଇଛି ରାସ୍ତାରୋକ ।
ଝାରସୁଗୁଡା ଜିଲ୍ଲା ଲଖନପୁର ବ୍ଲକର ସୀମାନ୍ତ କନକତୋରା ଗ୍ରାମର ଭାଗ ଚାଷୀ ମନୋଜ ମେହେର ଚାଷ ଜମିରୁ ଅମଳ ଧାନକୁ ଘରକୁ ନେବା ସମୟରେ ଓଡିଶା ସୀମା ଭିତରକୁ ଗତ ଶନିବାର ପଶି ଆସିଥିଲା ଛତିଶଗଡ ପୋଲିସ । ନାଲି ଆଖି ଦେଖାଇବା ସହ ଦାଦାଗିରି କରି 38ବସ୍ତା ଧାନ ଜବତ କରି ନେଇଥିଲା ଓ ମନୋଜକୁ ନେଇ ଜୁଟମିଲ ଥାନାରେ ରଖିଥିଲେ । ସେହି ରାତ୍ରୀରେ ମନୋଜକୁ ଛତିଶଗଡ ପୋଲିସ ଛାଡିଥିଲେ ମଧ୍ୟ ଧାନକୁ ନଫେରାଇଥିବାରୁ ଛତିଶଗଡ ପୋଲିସର ଜୁଲୁମ ପ୍ରତିବାଦରେ ବୁଧବାର ସୀମାନ୍ତରେ ଚାଷୀମାନେ ରାୟଗଡ ସହରକୁ ସଂଯୋଗ କରୁଥିବା କନକତୋରା-ଏକତାଳ ରାସ୍ତା ଅବରୋଧ କରିଥିଲେ ।
ଝାରସୁଗୁଡା ଜିଲ୍ଲାପାଳଙ୍କ ନିର୍ଦ୍ଦେଶରେ ଉପଜିଲ୍ଲାପାଳ ଓ ଅତିରିକ୍ତ ଏସପି ଆନ୍ଦୋଳନକାରୀଙ୍କ ନିକଟକୁ ଯାଇ ଉତ୍ତ୍ୟକ୍ତ ଚାଷୀଙ୍କ ସହ ଆଲୋଚନା କରିଥିଲେ । ଝାରସୁଗୁଡା ଜିଲ୍ଲାପାଳ, ରାୟଗଡ ଜିଲ୍ଲାପାଳ ଓ ଏସପିଙ୍କ ସହିତ ଫୋନରେ କଥା ହେବା ପରେ ରାୟଗଡ ଜିଲ୍ଲାର ଏକତାଲର ସରପଞ୍ଚ ଚନ୍ଦ୍ର ଶେଖର ସିଦାରଙ୍କ ନେତୃତ୍ବରେ ଏକ ପ୍ରତିନିଧି ରାୟଗଡ ଜିଲ୍ଲାପାଳଙ୍କୁ ଭେଟିଥିଲେ । ଏହା ପରେ ଜୁଟମିଲ ଥାନା ଆଇଆଇସିଙ୍କ ସହ ରାୟଗଡ କୋର୍ଟକୁ ଯାଇ କୋର୍ଟରେ ଲିଖିତ ଅଭିଯୋଗ ଦେଇଥିଲେ ।
ରାୟଗଡ କୋର୍ଟର ନିର୍ଦ୍ଦେଶରେ ମନୋଜ ମେହେରଙ୍କ 38 ବସ୍ତା ଧାନ ଓ ଗାଡିକୁ ବିଳମ୍ବିତ ରାତିରେ ଛଡାଯିବା ସହ ସୀମାନ୍ତକୁ ଆସି ଭାଗଚାଷୀ ମନୋଜକୁ ଏହା ହସ୍ତାନ୍ତର କରିଥିଲେ । ଶେଷରେ ରାସ୍ତା ଅବରୋଧ ହଟିଥିଲା।
ଝାରସୁଗୁଡାରୁ ରବିନାରାୟଣ ସାହୁ, ଇଟିଭି ଭାରତ
