ଯାଜପୁର: ଷ୍ଟୁଡେଣ୍ଟ ଟ୍ରାଫିକ୍ ସ୍କଲାରସିପ ସ୍କିମ୍ ଯାଜପୁର ଜିଲ୍ଲା କଳିଙ୍ଗନଗର ଥାନା ପରିସରରେ ଉଦଘାଟନ ହୋଇଯାଇଛି । ଶୁକ୍ରବାର ଏହି ଉଦଘାଟନୀ ଉତ୍ସବରେ ଯାଜପୁର ଏସପି ଚରଣ ସିଂ ମୀନା ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ କଳିଙ୍ଗନଗର ଅତିରିକ୍ତ ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକ ରାଜ କିଶୋର ଦୋରା ଯୋଗଦେଇ କାର୍ଯ୍ୟକ୍ରମର ଶୁଭ ଉଦଘାଟନ କରିଛନ୍ତି ।
ପ୍ରଥମ ପର୍ଯ୍ୟାୟରେ 20 ଜଣ ସ୍ଥାନୀୟ ଅଞ୍ଚଳର କଲେଜ ଛାତ୍ରଙ୍କୁ ଟ୍ରାଫିକ୍ ଭଲ୍ୟୁଣ୍ଟର ଭାବେ ନିୟୋଜନ କରାଯାଇଛି । ସେମାନଙ୍କୁ କଳିଙ୍ଗନଗର ଶିଳ୍ପାଞ୍ଚଳର ଦୁର୍ଘଟଣା ପ୍ରବଣ ଓ ଜନଗହଳି ଅଞ୍ଚଳରେ ଟ୍ରାଫିକ୍ ନିୟନ୍ତ୍ରଣ କରିବା ପାଇଁ ଦାୟିତ୍ଵ ଦିଆଯାଇଛି ।
କାର୍ଯ୍ୟକ୍ରମରେ ସମସ୍ତ ଶିଳ୍ପ ଅନୁଷ୍ଠାନର ବରିଷ୍ଠ କର୍ମକର୍ତ୍ତା, ସ୍ଥାନୀୟ ଜନ ପ୍ରତିନିଧିଙ୍କ ସମେତ ଛାତ୍ରଛାତ୍ରୀ ଓ ବୁଦ୍ଧିଜୀବୀ ଯୋଗ ଦେଇଥିଲେ । ଜିଲ୍ଲାର ଅନ୍ୟ ଗୁରୁତ୍ବପୂର୍ଣ୍ଣ ସ୍ଥାନରେ ଖୁବଶୀଘ୍ର ଏହି ଯୋଜନାରେ ଛାତ୍ରମାନଙ୍କୁ ସଚେତନତା ପାଇଁ ନିୟୋଜିତ କରାଯିବ ବୋଲି ଏସପି ମୀନା ସୂଚନା ଦେଇଛନ୍ତି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ