ଯାଜପୁର: 215 ନମ୍ବର ଜାତୀୟ ରାଜପଥର କୋରେଇ ଥାନା ଅନ୍ତର୍ଗତ ପାଟୁଳି ଛକ ନିକଟରେ ଦୁଇ ବାଇକ ମୁହାଁମୁହିଁ ଧକ୍କା । । ଘଟଣା ସ୍ଥଳରେ ଦୁଇ ବାଇକ ଚାଳକଙ୍କର ମୃତ୍ୟୁ । ଦୁଇ ମହିଳା ଗୁରୁତର । ଆହତ ଦୁଇ ମହିଳାଙ୍କୁ ଚିକିତ୍ସା ପାଇଁ ଯାଜପୁର ରୋଡ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସୂଚନା ମୁତାବକ ଯାଜପୁର ଚଇନିପୁର ଅଞ୍ଚଳର ହାତୀ ଦାସ ନାମକ ଜଣେ ଯୁବକ ଏକ ବାଇକରେ ଦୁଇଜଣ ମହିଳାଙ୍କୁ ନେଇ ଯାଜପୁର ରୋଡ୍ ଚୋରଦା କାଳୀ ମେଳଣ ପଡିଆରୁ ଅପେରା ଦେଖି ଫେରୁଥିଲେ । ଅନ୍ୟ ପଟୁ ଜହ୍ନା ଗ୍ରାମର ବିକାଶ ମଲ୍ଲିକ ନାମକ ଅନ୍ୟ ଜଣେ ଯୁବକ ଘରୁ ବାଇକରେ କଳିଙ୍ଗନଗର ଜିନ୍ଦଲ ଷ୍ଟେନଲେସ କାରଖାନାକୁ ଡ୍ୟୁଟିକୁ ଯାଉଥିଲେ । ପାଟୁଳି ଛକ ନିକଟରେ ଦୁଇ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଦୁଇ ବାଇକ ଚାଳକଙ୍କର ଘଟଣା ସ୍ଥଳରେ ମୃତ୍ୟୁ ଘଟିଥିବା ଜଣାପଡିଛି ।
ଉଭୟଙ୍କୁ ଡାକ୍ତର ମୃତ ଘୋଷଣା କରିଥିବା ବେଳେ ଅନ୍ୟ ଦୁଇ ମହିଳାଙ୍କ ଅବସ୍ଥା ଗୁରୁତର ରହିଛି । ସେମାନଙ୍କୁ ଯାଜପୁର ରୋଡ୍ ଡାକ୍ତରଖାନାରେ ପ୍ରାଥମିକ ଚିକିତ୍ସା କରାଯିବା ପରେ କଟକ ଏସସିବି ସ୍ଥାନାନ୍ତର କରାଯାଇଛି । କୋରେଇ ପୋଲିସ ଡାକ୍ତରଖାନାରେ ପହଞ୍ଚି ଦୁଇ ମୃତଦେହ ଜବତ କରିବା ସହ ଘଟଣାର ତଦନ୍ତ ଜାରି ରଖିଛି।
ଯାଜପୁରରୁ ଜ୍ଞାନରଞ୍ଜନ ଓଝା , ଇଟିଭି ଭାରତ
