ଗଜପତି: ଜିଲ୍ଲା ମୋଟର ପରିବହନ କର୍ମଚାରୀ ସଂଘର ଧର୍ମଘଟ ଡାକରା । 8 ଦଫା ଦାବି ନେଇ ଗାଡି ଚଳାଚଳକୁ ବନ୍ଦ କରିଛି ସଂଘ । ପୂର୍ବରୁ ଜିଲ୍ଲା ପ୍ରଶାସନକୁ 8ଦଫା ବିଷୟରେ ଅବଗତ କରାଇଥିଲେ ମଧ୍ୟ କୌଣସି ସୁଫଳ ମିଳିନଥିଲା । ଫଳରେ ଏହାର ପ୍ରତିବାଦ ଜଣାଇ ଧର୍ମଘଟ କରାଯାଇଛି ।
ଏହି ଆଠ ଦଫା ଦାବି ମଧ୍ୟରେ ବସଷ୍ଟାଣ୍ଡ ପରିସରରେ ଥିବା ସମସ୍ତ ମଦ ଦୋକାନ ତୁରନ୍ତ ବନ୍ଦ କରିବା । ଏଥିସହ ବେଆଇନ ମଦ ବ୍ୟବସାୟୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି । ଡିଜେଲ ବଦଳରେ କିରୋସିନ ବ୍ୟବହାର କରି ଗାଡି ଚଳାଉଥିବା ବସ ମାଲିକଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ସହ କଣ୍ଡିସନ ନଥିବା ପୁରୁଣା ବସକୁ ଯାତ୍ରୀ ପରିବହନ ପାଇଁ ଅନୁମତି ନ ଦେବାକୁ କୁହାଯାଇଛି ।
ସେପଟେ ନିର୍ଘଣ୍ଟ ଅନୁସାରେ ସାଧାରଣ ବସ ଚଳାଚଳ ଓ ଯାତ୍ରୀଙ୍କ ସୁବିଧା ଲାଗି ବସଷ୍ଟାଣ୍ଡ ପରିସରରେ ତୁରନ୍ତ ଯାନ ଅନୁସନ୍ଧାନ ଓ ଯାତ୍ରୀ ଟିକଟ ବିକ୍ରି ପାଇଁ ଏକ କାଉଣ୍ଟର ଖୋଲାଯାଉ । ଏବଂ ତାର ପରିଚାଳନା ଦାୟିତ୍ବରେ ଆସୋସିଏସନକୁ ଦିଆଯାଉ, ଯଦ୍ବାରା ବସ ଚଳାଚଳ ହୋଇପାରିବ ।
ଯଦି ଏ ସମସ୍ତ ଦାବି ପୂରଣ ନହୁଏ ତେବେ ଅନିର୍ଦ୍ଦିଷ୍ଟ କାଳ ଯାଏ, ଧର୍ମଘଟ ଲାଗି ରହିବ କହିଛନ୍ତି ମୋଟର ପରିବହନ କର୍ମଚାରୀ ସଂଘ ସମ୍ପାଦକ ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
