ବରଗଡ: ମହାମାରୀ କୋରୋନାକୁ ନେଇ ଲେକଙ୍କ ମନରେ ଆତଙ୍କ । କୋରୋନା ଯୁଦ୍ଧରେ ଲଢେଇ ପାଇଁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିକୁ ଲୋକେ କୋଟି କୋଟି ଟଙ୍କା ଦାନ କରିଛନ୍ତି । ମାତ୍ର ରାଜ୍ୟ ସରକାର କୋରୋନା ମୁକାବିଲା ପାଇଁ ବିଭିନ୍ନ ସରଞ୍ଜାମ କିଣିବା ଆଲରେ ଏହି ଅର୍ଥ ସବୁର ମହାଦୁର୍ନୀତି କରିଥିବା ଅଭିଯୋଗ କରିଛି କଂଗ୍ରେସ ଦଳ । ତେବେ ବରଗଡ ଜିଲ୍ଲା କଂଗ୍ରେସ ପକ୍ଷରୁ ଗୁରୁବାର ଜିଲ୍ଲାପାଳଙ୍କ କାର୍ଯ୍ୟଲୟରେ ଆନ୍ଦୋଳନ କରାଯିବା ସହ ରାଜ୍ୟପାଳଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରାଯାଇଛି ।
କୋରୋନା ମହାମାରୀ ସମୟରେ ମାସ୍କ କିଣାରେ ମହାଦୁର୍ନୀତି ହୋଇଥିବା ଅଭିଯୋଗ ନେଇ ଆନ୍ଦୋଳନକୁ ଓହ୍ଲାଇଛି କଂଗ୍ରେସ । ଏହି ଦୁର୍ନୀତିର ନିରପେକ୍ଷ ଓ ଉଚ୍ଚସ୍ତରୀୟ ତଦନ୍ତ ଦାବି କରିଛି ଦଳ । ମାସ୍କ ଏବଂ କୋଭିଡ ମେସିନ କିଣାବିକାରେ ବ୍ୟାପକ ଦୁର୍ନୀତି ହୋଇଥିବାରୁ ଜଣେ ବିଚାରପତିଙ୍କ ଦ୍ବାରା ଏହାର ତଦନ୍ତ କରାଯାଉ ବୋଲି କଂଗ୍ରେସ ଦଳ ପକ୍ଷରୁ ଦାବି କରାଯାଇଛି ।
କଂଗ୍ରେସ ପକ୍ଷରୁ ହୋଇଥିବା ଏହି ଆନ୍ଦୋଳନରେ ନିପନ କୁମାର ଦାଶ, ପ୍ରଦୀପ ଦେବତା, ନିହାର ରଞ୍ଜନ ମହାନନ୍ଦ, ଦିଲୀପ ପଣ୍ଡା, ପ୍ରତାପ ନାୟକ ଓ ଯୁଗଳ ପ୍ରସାଦ ସିଂହଙ୍କ ସମେତ ବରଗଡ ଜିଲ୍ଲାର ବହୁ କଂଗ୍ରେସ ନେତା ସାମିଲ ହେବା ସହ ଜିଲ୍ଲାପାଳଙ୍କ ଅଫିସ ଘେରାଉ କରିଥିଲେ ।
ବରଗଡରୁ ରାଜେଶ ସରାପ, ଇଟିଭି ଭାରତ
