ନୂଆଦିଲ୍ଲୀ: ଭାରତର ପୂର୍ବତନ ପେସର ଜାହିର ଖାନ ହୁଏତ ସୌରଭ ଗାଙ୍ଗୁଲିଙ୍କ ଅଧୀନରେ କ୍ୟାରିୟର ଆରମ୍ଭ କରିଥାଇ ପାରନ୍ତି । କିନ୍ତୁ ସେ ଧୋନିଙ୍କ ନେତୃତ୍ୱରେ ଦଳର ଜଣେ ଷ୍ଟାର ବୋଲର ହୋଇଥିଲେ । ତେବେ ଏହି ପୂର୍ବତନ ପେସର୍ ଅନୁଭବ କରନ୍ତି ଯେ ଭାରତର ଦୁଇଜଣ ସଫଳ ଅଧିନାୟକଙ୍କ କାର୍ଯ୍ୟରେ ଅନେକ ସମାନତା ଥିଲା ।
"ମୋ କ୍ୟାରିଅରରେ ଆବଶ୍ୟକ ସମସ୍ତ ସମର୍ଥନ ମୁଁ ଗାଙ୍ଗୁଲିଙ୍କ ଠାରୁ ପାଇଥିଲି । ଯେତେବେଳେ ତୁମେ ତୁମର କ୍ୟାରିଅର୍ ଅନ୍ତର୍ଜାତୀୟ ସ୍ତରରେ ଆରମ୍ଭ କରିବ, ତୁମର ସମସ୍ତ ସମର୍ଥନ ଦରକାର ଏବଂ ତା ପରେ ତୁମର କ୍ୟାରିୟର ଗଠନ କରିବା ତୁମ ଉପରେ ନିର୍ଭର କରିବ । କିନ୍ତୁ ସେହି ପ୍ରାରମ୍ଭିକ ସମର୍ଥନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ’’ ବୋଲି ଜହିର ଖାନ ୟୁଟ୍ୟୁବ ଚାଟ ସୋ’ରେ ଗୌରବ କପୁରଙ୍କୁ କହିଛନ୍ତି ।
"ଦୁହେଁ ଦୀର୍ଘ ଦିନ ଧରି ଭାରତର ନେତୃତ୍ୱ ନେଇଛନ୍ତି । ଏମଏସ ଧୋନିଙ୍କ ସହ ମୁଁ ମଧ୍ୟ ସେହି ପରିବର୍ତ୍ତନ ଦେଖିଛି । ଏମଏସ ଅଧିନାୟକ ପଦ ପାଇବା ପରେ ତାଙ୍କର ପାଖରେ ଅନେକ ବରିଷ୍ଠ ଖେଳାଳି ଥିଲେ ଯେଉଁମାନେ ଅନ୍ତର୍ଜାତୀୟ ସ୍ତରରେ ଅଭିଜ୍ଞ ଥିଲେ । ତେଣୁ ତାଙ୍କୁ ପ୍ରଥମେ ଅଧିକ ପରିଶ୍ରମ କରିବାକୁ ପଡି ନଥିଲା । କିନ୍ତୁ ସେମାନେ ଅବସର ନେବା ପରେ ଯୁବ ବ୍ୟାଚ୍ ଆସିଲେ । ଯାହାଙ୍କୁ ଧୋନି ସଠିକ୍ ଭାବେ ଗଢି ତୋଳିଛନ୍ତି । ଯାହା ଆମ ସମୟରେ ଦାଦା କରୁଥିଲେ ।’’ ବୋଲି ଧୋନିଙ୍କ ପ୍ରଶଂସାରେ କହିଛନ୍ତି ଜାହିର ।
