ପୁରୀ: ଗୁଣ୍ଡିଚା ମନ୍ଦିର ଭିତରେ ନକଲି ସେବାୟତ । ଦୁଇ ଜଣ ସାଧାରଣ ବ୍ୟକ୍ତି ସେବାୟତ ବେଶରେ ଗୁଣ୍ଡିଚା ମନ୍ଦିରରେ ପ୍ରବେଶ କରିଥିଲେ । ଘଟଣା ବିଷୟରେ ଜଣାପଡିବା ପରେ ଉଭୟଙ୍କୁ ଅଟକ ରଖି ପୋଲିସ ପଚାରଉଚାର କରୁଛି ।
ଆଜି ଗୁଣ୍ଡିଚା ମନ୍ଦିରରେ ମହାପ୍ରଭୁଙ୍କ ମଙ୍ଗଳ ଆଳତୀ କରାଯାଉଥିଲା । ଏହି ସମୟରେ ସେବାୟତମାନେ ଦୁଇ ଜଣ ବ୍ୟକ୍ତିଙ୍କ ଉପରେ ସନ୍ଦେହ କରିଥିଲେ । ସେବାୟତମାନେ ବିରୋଧ କରିବା ପରେ ଦୁଇ ଭକ୍ତକୁ ଅଟକ ରଖିଛି ପୋଲିସ । ଦୁଇ ଅଣସେବାୟତ ହେଉଛନ୍ତି ପୁରୀ କୁମ୍ଭାରପଡାର ଅଭିଜିତ ମହାନ୍ତି ଓ ଅନ୍ୟ ଜଣେ ମାର୍କେଣ୍ଡେଶ୍ବର ସାହିର ସ୍ମୃତି ରଞ୍ଜନ ମହାନ୍ତି ବୋଲି ଜଣାପଡିଛି । ଶ୍ରୀମନ୍ଦିର ସୁରକ୍ଷା ଅଧିକାରୀ କୁମ୍ଭାରପଡା ପୋଲିସର ଜିମା ଦେବା ପରେ ଘଟଣାର ତଦନ୍ତ କରୁଛି କୁମ୍ଭାରପଡା ପୋଲିସ।
ସୂଚନାଯୋଗ୍ୟ, ଚଳିତ ବର୍ଷ ମହାମାରୀ କୋରୋନା ପାଇଁ ପୁରୀକୁ ଭକ୍ତ ଶୂନ୍ୟ ରଖାଯାଇଛି । କେବଳ ସେବାୟତଙ୍କ ଦ୍ବାରା ରଥଯାତ୍ରା ତଥା ମହାପ୍ରଭୁଙ୍କ ନବ ଦିନାତ୍ମକ ଯାତ୍ରା ଅନୁଷ୍ଠିତ କରାଯିବା ବୋଲି ସୁପ୍ରିମକୋର୍ଟ ଅନୁମତି ଦେଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
