କଟକ: ପ୍ରଦୂଷିତ ହେଉଛି ପୁରାତନ ସହରର ଦୁଇଟି ପ୍ରମୁଖ ନଦୀ । ସିଲଭର ସିଟି କଟକ କଡରେ ବହିଯାଉଥିବା ମହାନଦୀ ଓ କାଠଯୋଡିରେ ମିଶୁଛି ସହରର ତରଳ ବର୍ଜ୍ୟବସ୍ତୁ । ଯାହାକୁ ସଠିକ୍ ଭାବେ ବିଶୋଧନ କରାନଯାଇ ସିଧାସଳଖ ନଦୀ ଗର୍ଭକୁ ଛାଡି ଦିଆଯାଉଛି ।
ଫଳରେ ଉଭୟ ନଦୀର ଚଳନ୍ତା ପାଣି ବି ଏବେ କଳାକିଚିମିଚି ଦିଶୁଛି । ନଦୀ ପ୍ରଦୂଷିତ ହେଉଥିବାରୁ ତଳିଆ ଅଞ୍ଚଳ ଲୋକେ, ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି । ଏହାସହ ନାନା ରୋଗରେ ପଡୁଥିବାର ମଧ୍ୟ ଦେଖିବାକୁ ମିଳୁଛି ।
ତେବେ ଏହି ସମସ୍ୟାର ସ୍ଥାୟୀ ସମାଧାନ ପାଇଁ ସହରରେ ଜଳ ବିଶୋଧନାଗାର ପ୍ଲାଣ୍ଟର ଯୋଜନା କରାଯାଇଥିଲା । ଦୀର୍ଘ ବର୍ଷ ଧରି ଦୁଇଟି ପ୍ରକଳ୍ପର କାମ ମଧ୍ୟ ଚାଲିଥିଲା । ହେଲେ ଏବେ ସିଡିଏ ଅଞ୍ଚଳରେ ହୋଇଥିବା ପ୍ଲାଣ୍ଟର କାମ ଶେଷ ହୋଇ କାର୍ଯ୍ୟକ୍ଷମ ହୋଇଥିବାବେଳେ ଅନ୍ୟଟିର କାମ ଶେଷ ହୋଇନାହିଁ ।
ସିଡିଏରେ ହୋଇଥିବା ପ୍ଲାଣ୍ଟରେ ଦୈନିକ 36 ନିୟୁତ ଲିଟର ବର୍ଜ୍ୟ ଜଳକୁ ବିଶୋଧନ କରିବାର କ୍ଷମତା ରହିଛି । ହେଲେ ଏଥିରେ 17ରୁ 18 ନିୟୁତ ଲିଟର ଜଳ ପ୍ରବାହିତ ହେଉଛି । ସେପଟେ ମତ୍ତଗଜପୁରରେ ଦୈନିକ 16 ମିଲିଅନ ଲିଟର ବର୍ଜ୍ୟଜଳକୁ ବିଶୋଧନ କରିବାକୁ ବ୍ୟବସ୍ଥା କରାଯାଇଥିଲେ ବି ଏହାର କାମ ଶେଷ ହୋଇନାହିଁ ।
ହେଲେ ଏହାର କାର୍ଯ୍ୟ ପ୍ରାୟ ଶେଷ ପର୍ଯ୍ୟାୟରେ । ଗୋଟିଏ ବର୍ଷ ମଧ୍ୟରେ ଏହା କାର୍ଯ୍ୟକ୍ଷମ ହେବ ବୋଲି କଟକ କମିଶନର କହିଛନ୍ତି। ଏହା କାର୍ଯ୍ୟକ୍ଷମ ହେଲେ ନଦୀଜଳ ପ୍ରଦୂଷିତ ହେବ ନାହିଁ । ଏହାସହ ସହରର ସମସ୍ତ ଡ୍ରେନରେ ଜାଲି ଲଗାଇ ନର୍ଦ୍ଦମା ଜଳକୁ ନଦୀକୁ ଛଡାଯାଇଥିବା କମିଶନର କହିଛନ୍ତି।
ତେବେ ପଦ୍ମ ଘୁଞ୍ଚିଘୁଞ୍ଚି ଗଲା ପରି ମତ୍ତଗଜପୁର ଜଳ ବିଶୋଧନାଗାର ପ୍ଲାଣ୍ଟର କାମ ହେଉଥିବାବେଳେ କେବେ ସରିବ କାମ ଓ କେବେ ପୁଣି ଚକ୍ଚକ୍ କରିବ ଦୁଇ ନଦୀର ଜଳ । ତାକୁ ହିଁ ଅପେକ୍ଷା ।
କଟକରୁ ନାରାୟଣ ସାହୁ, ଇଟିଭି ଭାରତ
