ଭୁବନେଶ୍ବର: ରାଜ୍ୟରେ ବିପର୍ଯ୍ୟସ୍ଥ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହୋଇଛି । ଦିନକୁ ଦିନ ବଢିଚାଲିଛି ନାବାଳିକା ଦୁଷ୍କର୍ମ, ନିଖୋଜ ଓ ମହିଳାଙ୍କ ଉପରେ ନିର୍ଯାତନା ଭଳି ସଙ୍ଗୀନ ମାମଲା । ଯାହାର ପ୍ରତିବାଦରେ ଆଜି ରାଜ୍ୟବ୍ୟାପୀ ଆନ୍ଦୋଳନ କରୁଛି କଂଗ୍ରେସ । ଏନେଇ ସବୁ ଜିଲ୍ଲାର ମୁଖ୍ୟ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ କରୁଛନ୍ତି କଂଗ୍ରେସ କର୍ମୀ ।
ଗତ ୪ ଦିନ ଭିତରେ ନାବାଳିକାଙ୍କ ପ୍ରତି ହୋଇଥିବା ଦୁଷ୍କର୍ମ ଯେଭଳି ସାମ୍ନାକୁ ଆସିଛି, ତାକୁ ନେଇ କଂଗ୍ରେସ ଭଭୟ ବିଧାନସଭା ଭିତରେ ଏବଂ ରାଜରାସ୍ତାରେ ସ୍ବର ଉଠାଇଛି । ମୁଖ୍ୟମନ୍ତ୍ରୀ ଗୃହ ବିଭାଗର ମୁଖ୍ୟ ହୋଇଥିବାରୁ ଏନେଇ ତାଙ୍କ ଇସ୍ତଫା ଦାବି କରିଛି ଦଳ । ଏହା ସହିତ ଭୁବନେଶ୍ବର ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ କଂଗ୍ରେସ ନେତା ଓ କର୍ମୀ ନାରା ବାଜି କରିବାସହ ମୁଖ୍ୟମନ୍ତ୍ରୀଙ୍କ କୁଶପୁତ୍ତଳିକା ଦାହ କରିଛନ୍ତି ।
ତେବେ ଦୀର୍ଘ ୨୦ ବର୍ଷ ଧରି ରାଜ୍ୟରେ ଶାସନ କରିବା ସତ୍ତ୍ବେ ବିଜେଡି ସରକାର ନାବାଳିକା, ଶିଶୁ ଏବଂ ମହିଳାଙ୍କ ସମ୍ମାନ ପ୍ରତି ଅବହେଳା କରିଥିବା ଦଳ ଅଭିଯୋଗ କରିଛି । କଂଗ୍ରେସ ଏହାକୁ ସହ୍ୟ କରିବ ନାହିଁ । ଆଗାମୀ ଦିନରେ ଏନେଇ ଜୋରଦାର ପ୍ରତିବାଦ କରାଯିବ ବୋଲି କଂଗ୍ରେସ କର୍ମୀ କହିଛନ୍ତି । ଏନେଇ ସେମାନେ ରାଜ୍ୟପାଳଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରିଛନ୍ତି ।
ଭୁବନେଶ୍ବରରୁ ସଞ୍ଜୀବ ରାଏ, ଇଟିଭି ଭାରତ
