ଭୁବନେଶ୍ୱର: ବିଜେଡିରେ ମିଶିଲେ ଭାଗୀରଥି । ଆନନ୍ଦପୁରର ବିଜେପି ବିଧାୟକ ପ୍ରାର୍ଥୀ ଭାଗୀରଥି ସେଠୀ । ଆସନ୍ତା 2 ତାରିଖରେ ବିଜେପିରୁ ଆନନ୍ଦପୁର ବିଧାନସଭା ଆସନ ପାଇଁ ପ୍ରାର୍ଥୀପତ୍ର ଦାଖଲ କରିଥାନ୍ତେ । କିନ୍ତୁ ଏବେ 3 ତାରିଖରେ ବିଜେଡି ପ୍ରାର୍ଥୀ ଭାବେ ନାମାଙ୍କନ ଦାଖଲ କରିବେ । ଶୁକ୍ରବାର ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଉପସ୍ଥିତିରେ ସେ ବିଜେଡିରେ ସାମିଲ ହୋଇଛନ୍ତି ।
ସୂଚନାଯୋଗ୍ୟ, ପୂର୍ବରୁ 2004 ମସିହାରେ ଭାଗୀରଥି ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ଲଢିଥିବା ବେଳେ 2009ରେ ବିଜେଡି ଟିକେଟରେ ଆନନ୍ଦପୁର ଆସନରୁ ବିଧାୟକ ଭାବେ ନିର୍ବାଚିତ ହୋଇଥିଲେ । କିନ୍ତୁ 2014ରେବିଜେଡି ପାଇଁ ଅଲୋଡା ହୋଇଥିଲେ ଭାଗିରଥୀ । ଏହାପରେ ସେ ବିଜେପିରେ ସାମିଲ ହୋଇଥିଲେ ।ଚଳିତ ନିର୍ବାଚନରେ ବିଜେପି ତାଙ୍କୁ ଆନନ୍ଦପୁର ପ୍ରାର୍ଥୀ କରିବାକୁ ଘୋଷଣା କରିଥିଲା । ସେହି ଅନୁସାରେ ଆସନ୍ତା 2 ତାରିଖରେ ସେ ପ୍ରାର୍ଥୀପତ୍ର ଦାଖଲ କରିଥାନ୍ତେ । କିନ୍ତୁ ତା' ପୂର୍ବରୁ ଦଳଡିଆଁ ପର୍ବରେ ସାମିଲ ହେଲେ ସେ । ଆଜି ନବୀନ ନିବାସରେ ସେ ନିଜ ସମର୍ଥକଙ୍କ ସହ ମିଶିଛନ୍ତି । ଆନନ୍ଦପୁରରୁ ପୁଣି ଥରେ ଭାଗୀରଥି ବିଜେଡି ପ୍ରାର୍ଥୀ ହେବା ଏକ ପ୍ରକାର ସ୍ଥିର ହୋଇସାରିଛି ।
ଭାଗିରଥୀଙ୍କ ଘର ବାହୁଡା ପରେ ଦଳ ଶକ୍ତିଶାଳୀ ହେବ ବୋଲି ବିଜେଡି ସଭାପତି ନବୀନ ପଟ୍ଟନାୟକ ଖୁସି ବ୍ୟକ୍ତ କରିଛନ୍ତି । ତେବେ ବିଜେଡିରେ ମିଶିବା ପରେ ପ୍ରତିକ୍ରିୟା ଦେଇ ଭାଗିରଥି କହିଛନ୍ତି, 'ଦଳୀୟ କନ୍ଦଳ ପାଇଁ ବିଜେପି ଛାଡିଥିଲି । ମୋ ବିରୋଧରେ ଷଡଯନ୍ତ୍ର ହେଉଥିଲା । ବିଜୁ ପରିବାରର ସଦସ୍ୟ ଥିଲି ଘରକୁ ଫେରିଲି । ଦଳ ଯାହା ଦାୟିତ୍ବ ଦେବ ତାହା ପୂରଣ କରିବି' । ଦଳରେ ତାଙ୍କର ମିଳନ ପରେ ବଦ୍ରି ପାତ୍ରଙ୍କ ସହ ଥିବା ମନୋମାଳିନ୍ୟ ମଧ୍ୟ ଦୂର ହୋଇଛି ।
ଭୁବନେଶ୍ୱରରୁ ଅଜିତ ଦାସ, ଇଟିଭି ଭାରତ
