ଭୋପାଳ: ଗଛରେ ଝୁଲୁଥିବା ଅବସ୍ଥାରେ ମିଳିଲା ବାଘର ମୃତଦେହ । ମଧ୍ୟପ୍ରଦେଶରେ ଅନେକ ବାଘ ଶିକାର ଘଟଣା ସାମ୍ନାକୁ ଆସୁଥିବା ବେଳେ ପାନ୍ନା ଜିଲ୍ଲାର ଟାଇଗର ରିଜର୍ଭରରୁ ଏଭଳି ଏକ ଅଜବ ଘଟଣା ସାମ୍ନାକୁ ଆସିଛି। ଫାଶୀ ଯୋଗୁଁ ବାଘର ଏଭଳି ମୃତ୍ୟୁ ଦେଶରେ ପ୍ରଥମ ଥର ପାଇଁ ଦେଖିବାକୁ ମିଳିଛି ।
ତେବେ ସୂଚନା ମୁତାବକ, ଆଜି ସକାଳେ ପାନ୍ନା ଅନ୍ତର୍ଗତ ବିକ୍ରମପୁରର ତିଲଗଂବାରେ ଗଛରେ ରସି ଦ୍ୱାରା ବାଘର ମୃତଦେହ ଝୁଲୁଥିବା ଦେଖିବାକୁ ମିଳିଥିଲା । ଯାହାକୁ ନେଇ ବନ ବିଭାଗର ଅଧିକାରୀମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଛନ୍ତି । ବାଘକୁ ଶିକାର କରିବା ପାଇଁ ଶିକାରୀମାନେ ଏଭଳି କାର୍ଯ୍ୟ କରିଥିବା ସନ୍ଦେହ କରିଛନ୍ତି ରିଜର୍ଭର ସିସିଏଫ ।
ଅନ୍ୟପଟେ ଏନେଇ ଖବର ପାଇ ଏସଟିଏଫ୍ ଟାଇଗର ଟିମ୍ ଏବଂ ବନ ବିଭାଗର ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚିବା ସହିତ ଏହି ଘଟଣାର ତଦନ୍ତ ଆରମ୍ଭ କରିଥିବା ନେଇ ସୂଚନା ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
