ମୁମ୍ବାଇ: 2020 ଟୋକିଓ ଅଲମ୍ପିକ୍ସରେ ଦମଦାର ପ୍ରଦର୍ଶନ କରିଛି ଭାରତ । ଚଳିତ ବର୍ଷ ମୋଟ 7ଟି ମେଡାଲ ହାସଲ କରିଛି ଦେଶ । ଯାହାକୁ ନେଇ ଉତ୍ସବମୁଖର ଦେଶବାସୀ । ଏହି ପରିପ୍ରେକ୍ଷୀରେ ଦେଶକୁ ବିଶ୍ବସ୍ତରରେ ଗର୍ବିତ କରିଥିବା ମେଡାଲ ବିଜେତାଙ୍କ ପାଇଁ ମାଗାଣ ବିମାନ ଯାତ୍ରାର ଅଫର ଦେଇଛି ଗୋ ଫାଷ୍ଟ ଏୟାରଲାଇନ । ଆଗାମୀ 5 ବର୍ଷ ଯାଏଁ ସମସ୍ତ ଅଲମ୍ପିକ୍ସ ମେଡାଲ ବିଜେତାଙ୍କୁ ମାଗାଣା ବିମାନ ଯାତ୍ରା ସୁବିଧା ପ୍ରଦାନ କରିବାକୁ ଘୋଷଣା କରିଛି ଗୋ ଫାଷ୍ଟ ।
ଗୋ ଫାଷ୍ଟର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ କୌଶିକ ଖୋନା କହିଛନ୍ତି କି, ଆମର ଅଲମ୍ପିକ୍ସ ଦଳର ଅଦ୍ଭୁତପୂର୍ବ ସଫଳତା ପାଇଁ ସାରା ଦେଶ ଆନନ୍ଦିତ । ଏଣୁ ଆମେ ଏହି ବିଜେତାଙ୍କୁ ଶୁଭେଚ୍ଛା ଜଣାଇ ମାଗଣା ବିମାନ ଯାତ୍ରା ଟିକେଟ ପ୍ରଦାନ କରୁଛୁ । ଭାରତୀୟ କ୍ରୀଡା ଜଗତ ପାଇଁ ଏହା ବହୁତ ବଡ ସଫଳତା । ଆମ ଦେଶକୁ ଗର୍ବିତ କରିଥିବା ପ୍ରତିଟି ଖେଳାଳୀଙ୍କୁ ଆମେ ଅଭିନନ୍ଦନ ଜଣାଉଛୁ ।
