ନୂଆଦିଲ୍ଲୀ: ରାଫେଲ ଯୁଦ୍ଧ ବିମାନ ଚୁକ୍ତିକୁ ନେଇ ଦେଶରେ ଲାଗି ରହିଛି ରାଜନୈତିକ ଝଡ଼ । କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ରାଫେଲ ମାମଲାରେ ଦୁର୍ନୀତି ହେବାର ଅଭିଯୋଗ କରୁଛନ୍ତି । ସେ କ୍ରମାଗତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କାଠଗଡାରେ ଛିଡା କରୁଛନ୍ତି । ଅନୀଲ ଆମ୍ବାନୀଙ୍କୁ ଚୋରି କରାଇବାରେ ମୋଦି ସାହାଯ୍ୟ କରିଛନ୍ତି ବୋଲି ରାହୁଲ କହୁଛନ୍ତି । ଅନ୍ୟପକ୍ଷେ ଦେଶର ଅନ୍ୟତମ ଖବର କାଗଜଗୁଡିକ ରାଫେଲକୁ ନେଇ ନୂଆ ନୂଆ ଖୁଲାସା କରୁଛନ୍ତି । ପୁଣିଥରେ ଇଂରାଜୀ ଖବରକାଗଜ 'ଦ ହିନ୍ଦୁ' ଏକ ନୂଆ ଖୁଲାସା କରିଛି ।
'ଦ ହିନ୍ଦୁ' ଦାବି କରିଛନ୍ତି ଫ୍ରାନ୍ସ କମ୍ପାନୀ ଦସାଲ୍ଟ ସହ ଆଲୋଚନା କରିଥିବା ଟିମରେ ସାମିଲ ପ୍ରତିରକ୍ଷା ମନ୍ତ୍ରାଳୟର 3 ଜଣ ବରିଷ୍ଠ ଅଧିକାରୀ ସ୍ବୀକାର କରିଥିଲେ ଯେ ମୋଦି ସରକାର ଯେଉଁ ଚୁକ୍ତି କରିଛନ୍ତି, ତାହା ୟୁପିଏ ସରକାରଙ୍କ ଠାରୁ ମହଙ୍ଗା । ଏହି ଚୁକ୍ତି ବିରୋଧରେ ଅଧିକାରୀମାନେ ଏକ ନୋଟ ମଧ୍ୟ ପଠାଇଥିଲେ ।
ଖବରକାଗଜ ଅନୁସାରେ, ଭାରତୀୟ ନେଗୋସିଏଶନ ଦଳ(ଆଇଏନଟି)ରେ ସର୍ବମୋଟ 7 ଜଣ ସାମିଲ ଥିଲେ । ଏହି ଦଳର 3 ଜଣ ବରିଷ୍ଠ ଅଧିକାରୀ ସ୍ବୀକାର କରିଥିଲେ ଯେ ଫ୍ଲାଇୱେ ଚୁକ୍ତିରେ 36ଟି ରାଫେଲ ବିମାନ କିଣିବାର ମୋଦି ସରକାରଙ୍କ ଚୁକ୍ତି ଅପେକ୍ଷା ୟୁପିଏର 126ଟି ରାଫେଲ ବିମାନ ଚୁକ୍ତି ପ୍ରସ୍ତାବ ବହୁତ ଭଲ ଥିଲା । ନୂଆ ଚୁକ୍ତିରେ 36ଟି ରାଫେଲ ବିମାନର ପ୍ରଥମ ପର୍ଯ୍ୟାୟରେ 18ଟି ବିମାନର ସପ୍ଲାଇ ସିଡ୍ୟୁଲ ୟୁପିଏ ସରକାର ଅପେକ୍ଷା ମନ୍ଥର ରହିଛି ।
ଖବରକାଗଜ ଅନୁସାରେ, ଅଧିକାରୀଙ୍କ ଏହି ନୋଟ ମୋଦି ସରକାରଙ୍କ 2ଟି ପ୍ରମୁଖ ଦାବିକୁ ଖାରଜ କରୁଛି, ପ୍ରଥମଟି ହେଲା ଶସ୍ତା ଚୁକ୍ତି ଓ ସପ୍ଲାଇ ସିଡ୍ୟୁଲ ପ୍ରକ୍ରିୟାରେ ତ୍ବରାନ୍ବିତ । ସରକାର ସୁପ୍ରିମକୋର୍ଟରେ ଏହି ତଥ୍ୟ ଉପସ୍ଥାପନ କରିଥିଲେ । 3 ବରିଷ୍ଠ ଅଧିକାରୀ ନିଜ ନୋଟରେ ଭାରତ ସରକାର ସାବରେନ ଗ୍ୟାରେଣ୍ଟି ପରିବର୍ତ୍ତେ ଲେଟର ଅଫ କମ୍ଫର୍ଟକୁ ସ୍ବୀକାର କରିବା, ସରକାର-ସରକାର ମଧ୍ୟରେ ଚୁକ୍ତି ସହ ଜଡିତ ଆଇନ ବ୍ୟବସ୍ଥା, ଅଫସେଟ ମାମଲା ଓ ଦସାଲ୍ଟ ଆଭିଏଶନର ପ୍ରତିବନ୍ଧକ ବ୍ୟାପାରର ଦିଗ ଉପରେ ଗମ୍ଭୀର ଚିନ୍ତା ପ୍ରକଟ କରିଥିଲେ ।
ପ୍ରତିରକ୍ଷା ମନ୍ତ୍ରାଳୟର ଏହି 3 ବରିଷ୍ଠ ଅଧିକାରୀ ହେଉଛନ୍ତି ଆଡଭାଇଜର(ଖର୍ଚ୍ଚ) ଏମପି ସିଂ, ଫାଇନାନ୍ସିଆଲ ମ୍ୟାନେଜର(ଏୟାର)ଏଆର ଶୁଲେ ଓ ଏକ୍ୟୁଜିଶନ ମ୍ୟାନେଜର(ଏୟର) ଓ ଯୁଗ୍ମ ସଚିବ ରାଜୀବ ବର୍ମା । ଏହି 3 ଅଧିକାରୀ ଆଲୋଚନା ସଂପୂର୍ଣ୍ଣ ହେବା ପରେ ଜୁନ 1, 2016ରେ ଡେପୁଟି ଚିଫ ଅଫ ଏୟାର ଷ୍ଟାଫ(ଡିସିଏଏସ) ଏକ କଡା ବିରୋଧ କରି ନୋଟ ପଠାଇଥିଲେ । ଏହି ନୋଟ ଅନୁସାରେ ବିମାନର ଯେଉ ଅନ୍ତିମ ଦାମ ସ୍ଥିର କରାଯାଇଥିଲା, ତାହା ପ୍ରଥମ ଦାମ ଅପେକ୍ଷା 55.6 ପ୍ରତିଶତ ଅଧିକ ରହିଛି ।
