ପାଟନା: ବିହାର ବିଧାନସଭା ନିର୍ବାଚନ ପାଇଁ ଜମୁଛି ପ୍ରଚାର ମୈଦାନ । ଅକ୍ଟୋବର 28 ତାରିଖରେ ପ୍ରଥମ ପର୍ଯ୍ୟାୟ ନିର୍ବାଚନ ହେବାକୁ ଥିବାବେଳେ ଆଜି ଏଥିଲାଗି ପ୍ରଚାର କରିବାର ଶେଷ ଦିନ ରହିଛି । ଯେଉଁଥିପାଇଁ ଅନେକ ନେତା ଆଜି ପ୍ରଚାର ରଣକ୍ଷେତ୍ରକୁ ଲମ୍ଫ ମାରିବେ ବୋଲି ଜଣାପଡିଛି ।
ଆଜି ସନ୍ଧ୍ୟା 5 ଟା ସୁଦ୍ଧା ପ୍ରଥମ ପର୍ଯ୍ୟାୟ ନିର୍ବାଚନ ହେବାକୁ ଥିବା ବିଧାନସଭା ଆସନରେ ପ୍ରାର୍ଥୀ ମାନେ ପ୍ରଚାର କରିପାରିବେ । 71 ଟି ବିଧାନସଭା ଆସନ ପାଇଁ ଅକ୍ଟୋବର 28 ତାରିଖରେ ମତଦାନ ହେବ । ଫଳରେ ଆଜି ହିଁ ଏସବୁ ଆସନ ପାଇଁ ନିଜର ସମସ୍ତ ପ୍ରଚାର ରଣନୀତି କରିବେ ସବୁ ଦଳର ନେତା ।
28 ତାରିଖରେ ହେବାକୁ ଥିବା ଭୋଟ ଗ୍ରହଣ ପାଇଁ 71 ଟି ସିଟ୍ରେ ମୋଟ 1066ଟି ପ୍ରାର୍ଥୀ ମୈଦାନରେ ଅଛନ୍ତି । 1ଟି ସିଟ୍ ମଧ୍ୟରୁ 14ଟି ସିଟ୍ ସଂରକ୍ଷିତ ରହିଛି । ଭୋଟଗ୍ରହଣ ଦିନ ସକାଳ 7ଟାରୁ ମତଦାନ ଆରମ୍ଭ ହେବ । ତେବେ ମତଦାନର ଶେଷ ପାଇଁ ଭିନ୍ନ ଭିନ୍ନ କ୍ଷେତ୍ରରେ ଭିନ୍ନ ଭିନ୍ନ ସମୟ ଦିଆଯାଇଛି ।
36 ଟି ବିଧାନସଭା ଆସନ ପାଇଁ ଜଲଦି ସରିବ ମତଦାନ ପ୍ରକ୍ରିୟା
ନିର୍ବାଚନ ଆୟୋଗଙ୍କ ନିର୍ଦ୍ଦେଶ ଅନୁସାରେ, 4ଟି ଆସନ ପାଇଁ ସକାଳ 7ଟାରୁ ଅପରାହ୍ନ 3ଟା ପର୍ଯ୍ୟନ୍ତ ମତଦାନ ଅନୁଷ୍ଠିତ ହେବ । ସେହିପରି 27 ଟି ଆସନ ପାଇଁ ସନ୍ଧ୍ୟା 4ଟା ଯାଏ ମତଦାନ କରିପାରିବେ ମତଦାତା । ଅନ୍ୟପଟେ ସନ୍ଧ୍ୟା 5ଟା ଯାଏ 5ଟା ସିଟ୍ରେ ଭୋଟ ଗ୍ରହଣ ହେବ । ଅନ୍ୟ 35ଟି ଆସନ ପାଇଁ ମତଦାନ ପ୍ରକ୍ରିୟା ସକାଳ 7ଟାରୁ ଆରମ୍ଭ ହୋଇ ସନ୍ଧ୍ୟା 6ଟା ଯାଏ ଚାଲିବ ।
ସେହିପରି ପ୍ରଥମ ପର୍ଯ୍ୟାୟ ନିର୍ବାଚନ ହେବାକୁ ଥିବା ଅନେକ ଆସନ ନକ୍ସଲ ପ୍ରଭାବିତ ଅଞ୍ଚଳ ହୋଇଥିବାରୁ ସେଠାରେ କଡା ସୁରକ୍ଷା ବ୍ୟବସ୍ଥା କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
