ପାଟନା: ଚଳନ୍ତା ଗାଡିରେ ଗୁଳି ଚଳାଇଲେ ଆର୍ମୀ ଯବାନ । ବିହାରର ପାଟନା ସ୍ଥିତ ବିହଟା ଥାନା ନିକଟସ୍ଥ ରାଣୀ ତଲାବ ଥାନାର ସୈଦାବାଦର ଅଞ୍ଚଳରେ ଜଣେ ଆର୍ମୀ ଯବାନ ଚଳନ୍ତା କାର ମଧ୍ୟରେ ନିଜ ସ୍ତ୍ରୀ ଏବଂ ଶାଳିକୁ ଗୁଳିକରି ହତ୍ୟା କରିବା ପରେ ନିଜକୁ ଗୁଳିକରି ଆତ୍ମହତ୍ୟା କରିଛନ୍ତି । ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ସୂଚନା ଅନୁଯାୟୀ, ଆର୍ମୀ ଅଫିସର ବିଷ୍ଣୁ ଗତ 1 ମାସ ହେବ ଡେଙ୍ଗୁ ରୋଗରେ ପିଡୀତ ଥିଲେ । ସେଥିପାଇଁ ଆର୍ମୀ ଯବାନଙ୍କ ସ୍ତ୍ରୀ, ଶାଳୀ ଏବଂ ତାଙ୍କର ଦୁଇ ପୁଅ ଗତ ରବିବାର ଚିକିତ୍ସା ପାଇଁ ପାଟନା ଯାଉଥିଲେ । ଅଧାବାଟରେ ହଠାତ୍ ଆର୍ମୀ ଯବାନ ଜଣଙ୍କ ଗାଡିରେ ରଖିଥିବା ବନ୍ଧୁକ କାଢି ନିଜ ସ୍ତ୍ରୀ ଏବଂ ଶାଳିକୁ ଗୁଳି କରି ହତ୍ୟା କରିଥିଲେ । ଏହାପରେ ନିଜେ ନିଜକୁ ଗୁଳି କରି ଆତ୍ମହତ୍ୟା କରିଥିଲେ ।
ଗୁଳିର ଶବ୍ଦ ଶୁଣି ଆଖପାଖରେ ଥିବା ସ୍ଥାନୀୟ ଲୋକେ ଗାଡି ପାଖକୁ ଯାଇଥିଲେ । ସେତେବେଳେ ତିନି ଜଣଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ଦେଖି ଗାଡି ମଧ୍ୟରେ ଥିବା ଦୁଇ ପୁଅଙ୍କୁ ଉଦ୍ଧାର କରିଥିଲେ । ଏହାପରେ ସ୍ଥାନୀୟ ଲୋକେ ଆର୍ମୀ ଯବାନ, ପତ୍ନୀ ଏବଂ ଶାଳିକୁ ଉଦ୍ଧାର କରି ମେଡିକାଲ ପଠାଇଥିଲେ ମଧ୍ୟ ସେମାନଙ୍କୁ ଡାକ୍ତର ମୃତ ଘୋଷଣା କରିଥିଲେ । ତେବେ ଅଫିସରଙ୍କ ଏପରି କାଣ୍ଡ ପଛରେ କାରଣ ଅସ୍ପଷ୍ଟ ରହିଛି ।
ଅନ୍ୟପଟେ ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ସେପଟେ ଆର୍ମୀ ଯବାନ ଜଣଙ୍କ ଡେଙ୍ଗୁ ରୋଗ ପାଇଁ ଡିପ୍ରେସନରେ ରହି ଏଭଳି କାଣ୍ଡ ଭିଆଇଥିବା ପୋଲିସ ସନ୍ଦେହ କରୁଛି ।
