ଭୁବନେଶ୍ବର: ଭୁଲ ନମ୍ବର ରିଚାର୍ଜ କରିବା ପଡିଲା ମହାଙ୍ଗା । ଆକାଉଣ୍ଟରୁ ଚାଲିଗଲା ପ୍ରାୟ ୪ ଲକ୍ଷ ଟଙ୍କା । ୩୨୫ ଟଙ୍କା ରିଚାର୍ଜରୁ ଚାଲିଗଲା ୪ ଲକ୍ଷ ଟଙ୍କା । ଏଭଳି ଏକ ସାଇବର ଠକେଇର ଶିକାର ହୋଇଛନ୍ତି ଭୁବନେଶ୍ୱରର ଜଣେ ଛାତ୍ରୀ । ଉଷାରାଣୀ ବେହେରା ନାମକ ଜଣେ ଛାତ୍ରୀ ଭୁବନେଶ୍ୱରରେ କମ୍ପିଟେଟିଭ ପାଇଁ ପ୍ରସ୍ତୁତ ହେଉଛନ୍ତି । ତାଙ୍କ ନାଁରେ ଘର ଲୋକ ରଖିଥିବା ଆରଡ଼ି ଟଙ୍କାକୁ ଠକି ନେଇଛନ୍ତି ସାଇବର ଠକ । ଠକେଇର ୧୫ ଦିନ ବିତିଯାଇଥିଲେ ମଧ୍ୟ କୌଣସି ସୁଫଳ ମିଳୁନାହିଁ ।
ଠକେଇର ଶିକାର ହେଲେ ଛାତ୍ରୀ:
ଅଭିଯୋଗକାରୀ ଛାତ୍ରୀ ଉଷାରାଣୀ ବେହେରା କହିଛନ୍ତି," ମୁଁ ଗତ ୨୭ ତାରିଖ ଦିନ ଗୋଟିଏ ଭୁଲ ନମ୍ବରରେ ୩୨୫ ଟଙ୍କା ଅନଲାଇନ ମାଧ୍ୟମରେ ରିଚାର୍ଜ କରିଥିଲି । ସେହି ଟଙ୍କାକୁ ଫେରି ପାଇବା ପାଇଁ ଗୁଗୁଲରୁ ଏକ ନମ୍ବର ନେଇ ଅନଲାଇନ କଷ୍ଟମ୍ବର କେୟାରରେ ଅଭିଯୋଗ କରିଥିଲି । ହେଲେ ସେହି ନମ୍ବରଟି ସାଇବର ଠକଙ୍କ ଥିଲା । ସେମାନେ ଯେଉଁ ଉପାୟର କହିଲେ ତାହା ମୁଁ କରିଥିଲି । ହେଲେ ଟଙ୍କା ଫେରସ୍ତ ବଦଳରେ ପ୍ରଥମେ ମୋର ୯୯ ହାଜର ୮୯୮ ଟଙ୍କା କଟିଥିଲା । ତେବେ ଏହା ଠିକ ନମ୍ବର ନୁହେଁ ଜାଣିପାରି ୨୮ ତାରିଖରେ ସାଇବର ଥାନାରେ ଅଭିଯୋଗ କରିଥିଲି ।"
'ଆକାଉଣ୍ଟକୁ ଫ୍ରିଜ୍ କରିଥିଲି ହେଲେ..'
"ସେହି ମାମଲା ଆଧାରରେ ମୁଁ ପଟିଆ ସ୍ଥିତ ଏକ ବ୍ୟାଙ୍କକୁ ଯାଇ ମ୍ୟାନଜରଙ୍କୁ ଦେଖା କରିଥିଲେ । ଠକେଇ ପରେ ମୋ ବ୍ୟାଙ୍କ ଆକାଉଣ୍ଟକୁ ଫ୍ରିଜ୍ କରିଥିଲି । ଏହାପରେ ବ୍ୟାଙ୍କ ମ୍ୟାନେଜର କହିଥିଲେ ଫ୍ରିଜକୁ ଖୋଲି ଏଫଡ଼ି କରିଦିଅ । ଆଉ ଟଙ୍କା କଟିବ ନାହିଁ । ତେଣୁ ମୁଁ ଏଫଡ଼ି କରିଥିଲି । ହେଲେ ବ୍ୟାଙ୍କରୁ ଆସିବା ପରେ ୨୯ ଓ ୩୦ ତାରିଖରେ ୪ ଥରରେ ୩ ଲକ୍ଷ ଟଙ୍କା କଟିଯାଇଥିଲା । ଏହାପରେ ମୁଁ ଆଶ୍ଚର୍ଯ୍ୟ ହୋଇଥିଲି । "
ନିରାଶ ହୋଇ ଥାନାରୁ ଫେରିଲେ ଛାତ୍ରୀ :
ସେ ପୁଣି ସାଇବର ଥାନାକୁ ଅଭିଯୋଗ କରିବା ପାଇଁ ଯାଇଥିବା ବେଳେ ୫ ଲକ୍ଷ ଟଙ୍କାରୁ ତଳକୁ ଠକେଇ ହେଲେ ସାଇବର ଥାନାରେ ମାମଲା ରୁଜୁ ହୁଏ ନାହିଁ ବୋଲି କହି ତାଙ୍କୁ ପୋଲିସ ଫେରାଇ ଦେଇଥିବା ଅଭିଯୋଗ କରିଛନ୍ତି ସେ । ସେଠାରୁ ସେ ନିରାଶ ହୋଇ ଖଣ୍ଡଗିରି ଥାନାର ଦ୍ୱାରସ୍ଥ ହୋଇଥିଲେ ମଧ୍ୟ ଅଭିଯୋଗ ପଞ୍ଜିକରଣ ହୋଇନଥିଲା ।
ଇଟିଭି ଭାରତ, ଭୁବନେଶ୍ବର
