କେନ୍ଦ୍ରାପଡା: ବଢୁଛି ଜଳସ୍ତର, କୂଳ ଲଂଘୁଛି ବ୍ରାହ୍ମଣୀ ନଦୀ । ସେପଟେ ଭୟରେ ଅଞ୍ଚଳବାସୀ । କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ବ୍ଲକ ନିମପୁର ଗାଁ ପାଖରେ ପ୍ରାୟ 60 ଫୁଟର ଅତଡ଼ା ଖସି ପାଖାପାଖି 80 ଫୁଟ ଭିତରକୁ ମାଡି ଆସିଛି ବ୍ରାହ୍ମଣୀ ନଦୀ । ବ୍ରାହ୍ମଣୀ ନଦୀକୂଳ ଦେଇ ଯାଇଥିବା ପଟ୍ଟାମୁଣ୍ଡାଇ-ରାଜନଗର ମୁଖ୍ୟ ରାସ୍ତାରେ ପ୍ରତିଦିନ ଭାରିଯାନ ଚଳାଚଳ କରୁଥିବାରୁ ନଦୀବନ୍ଧ ପ୍ରତି ଉପୁଜିଥିବା ବିପଦ ଏବେ ଦୁଇଗୁଣା ହୋଇଛି ବୋଲି ଗ୍ରାମବାସୀ ଅଭିଯୋଗ ହୋଇଛି ।
- ନଦୀବନ୍ଧରୁ ଖସୁଛି ଅତଡା:
ଗତ ପନ୍ଦର ଦିନରୁ ଅଧିକ ସମୟ ଧରି ଲଘୁଚାପ ଫଳରେ ପାଞ୍ଚ ଦିନ ଧରି ଲଗାଣ ବର୍ଷା ଜାରି ରହିଥିବା କାରଣରୁ ଅତଡ଼ା ଖସି ବ୍ରାହ୍ମଣୀ ନଦୀ କୂଳ ଲଂଘୁଛି । ଫଳରେ ନଦୀକୁଳିଆ ଅଞ୍ଚଳବାସୀ ଏବେ ଭୟଭୀତ ଅବସ୍ଥାରେ ଅଛନ୍ତି ବୋଲି କହିଛନ୍ତି । ଘଟଣାସ୍ଥଳରେ ଜଳସେଚନ ବିଭାଗର ସହକାରୀ ଯନ୍ତ୍ରୀ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ଯଦି ତୁରନ୍ତ ଏହାର କାର୍ଯ୍ୟ ଉପରେ ଧ୍ୟାନ ଦିଆନଯାଏ ତାହେଲେ କୌଣସି ମୁହୂର୍ତ୍ତରେ ନଦୀ ଗର୍ଭରେ ନିମପୁର ଗାଁ ଲୀନ ହେଇଯିବାର ଆଶଙ୍କା କଲେଣି ଗ୍ରାମବାସୀ । ସେଥିପାଇଁ ତୁରନ୍ତ ନଦୀବନ୍ଧ ମରାମତି ପାଇଁ ସରକାର ଓ ଜିଲ୍ଲା ପ୍ରଶାସନ ନିକଟରେ ସ୍ଥାନୀୟ ସରପଞ୍ଚ ଓ ଗ୍ରାମବାସୀ ଦାବି କରିଛନ୍ତି ।
- କଣ କୁହନ୍ତି ସ୍ଥାନୀୟ ବାସିନ୍ଦା:-
ଏନେଇ ସ୍ଥାନୀୟ ବାସିନ୍ଦା ମହେଶ୍ୱର ମଲିକ କୁହନ୍ତି," ରାଜନଗରରୁ ପଟ୍ଟାମୁଣ୍ଡାଇ ଏକ ବନ୍ୟା ପ୍ରଭାବିତ ଏରିଆ ଏବଂ ନଦୀବନ୍ଧ ରାସ୍ତା । ଏହି ରାସ୍ତାକୁ ନଦୀ ଖାଇବାରେ ଲାଗିଛି । ଫଳରେ ରାସ୍ତାକଡରେ ଆସି ନଦୀ ଜଳ ଲାଗିଗଲାଣି । ଅନ୍ୟପଟେ ବସ୍ ଓ ଅନ୍ୟ ବଡ ଗାଡି ଏହି ରାସ୍ତାରେ ଯାଉଛି । କୋଡିଏ କିଲୋମିଟର ପର୍ଯ୍ୟନ୍ତ ରାସ୍ତା ଡ୍ୟାମେଜ ହୋଇଛି । ସରକାର ଏଦିଗରେ କିଛି ବିଚାର କରୁନାହାନ୍ତି ।’’
ସେହିପରି ସ୍ଥାନୀୟ ସରପଞ୍ଚ ସଂଗ୍ରାମ ବାରିକଙ୍କ ପ୍ରତିକ୍ରିୟା ଅନୁଯାୟୀ," କିଛି ନଥିଲା, ହଠାତ ଏଇ ଅଧଘଣ୍ଟା ଘଣ୍ଟାଏ ପୂର୍ବରୁ ପ୍ରାୟ ୪୦ ଫୁଟ ୫୦ ଫୁଟ ଦୂରତାରୁ ଘାଇ ହୋଇହୋଇ ଆସୁଛି, ଅତଡା ଖସି ଖସି ଆସୁଛି । ବର୍ତ୍ତମାନ ଅତଡା ଖସି ଖସି ରୋଡ଼ ପାଖକୁ ଆସି ଲାଗିଲାଣି । ପଞ୍ଚାୟତ ତରଫରୁ ସରପଞ୍ଚ ହିସାବରେ ମୁଁ ସରକାରଙ୍କ ନିକଟରେ ଦାବି ରଖୁଛି ଏହାକୁ ଇମରଜେନ୍ସି ହିସାବରେ ଏହା କାମ କରାଯାଉ । ନହେଲେ ଘାଇ ହେଲେ ପ୍ରାୟ ୫ରୁ ୧୦ ପଞ୍ଚାୟତ ଭାସିଯିବେ ଓ ଜଳମଗ୍ନ ହୋଇଯିବ ।
ଇଟିଭି ଭାରତ, କେନ୍ଦ୍ରାପଡା
