ହାଇଦ୍ରାବାଦ: 'ଡ୍ରିମ ଗାର୍ଲ' ପ୍ରାଞ୍ଚାଇଜର ପ୍ରଥମ ଭାଗ ଏବଂ ଦ୍ୱିତୀୟ ଭାଗ ହିଟ ହେବା ସହ ବେଶ ଲୋକପ୍ରିୟତା ହାସଲ କରିଥିବା ବେଳେ ଏବେ ଆୟୁଷ୍ମାନ ଖୁରାନା ଏହାର ୩ୟ ଭାଗ ସହ କମବ୍ୟାକ କରିବାକୁ ପ୍ରସ୍ତୁତ ଅଛନ୍ତି । ଏହି ଚଳଚ୍ଚିତ୍ରର ପ୍ରଥମ ଭାଗରେ ଆୟୁଷ୍ମାନ ଖୁରାନାଙ୍କ ସହ ମୁଖ୍ୟ ଭୂମିକାରେ ନୁସରତ ଭାରୁଚା ନଜର ଆସିଥିଲେ । ଯେତେବେଳେ କି, ଅନନ୍ୟା ପାଣ୍ଡେ 'ଡ୍ରିମ୍ ଗାର୍ଲ ୨' ନଜର ଆସିଥିଲେ । ଏବେ ଫିଲ୍ମ ବିଷୟରେ ଖବର ଆସୁଛି ଯେ, ତୃତୀୟ ଭାଗରେ ଅନନ୍ୟା ପାଣ୍ଡେଙ୍କୁ ପରିବର୍ତ୍ତେ ତାଙ୍କର ଘନିଷ୍ଠ ବନ୍ଧୁ ସାରା ଅଲି ଖାନ ନଜର ଆସିବେ ।
ଡ୍ରିମ୍ ଗାର୍ଲର ନିର୍ମାତାମାନେ ପୂଜାଙ୍କୁ ପୁଣି ପରଦାରେ ଆଣିବାକୁ ଯୋଜନା କରୁଛନ୍ତି । ଯଦି ରିପୋର୍ଟକୁ ବିଶ୍ୱାସ କରାଯାଏ, ତେବେ ଏଥର ସାରା ଅଲି ଖାନ ଫିଲ୍ମରେ ଆୟୁଷ୍ମାନ ଖୁରାନାଙ୍କ ବିପକ୍ଷରେ ମହିଳା ଲିଡରେ ନଜର ଆସିବେ । ନିକଟରେ ଦୁହେଁ ଏକ ମିଟିଂ ପାଇଁ ଡ୍ରିମ୍ ଗାର୍ଲ ନିର୍ମାତାଙ୍କ କାର୍ଯ୍ୟାଳୟରେ ମଧ୍ୟ ପହଞ୍ଚିଥିଲେ । ତେବେ ଫିଲ୍ମ ସମ୍ପର୍କରେ ଏକ ସରକାରୀ ଘୋଷଣା ଏ ପର୍ଯ୍ୟନ୍ତ କରାଯାଇନାହିଁ ।
ସୂଚନା ଥାଉ କି, ସାରା ଅଲି ଖାନ ଏବଂ ଅନନ୍ୟା ପାଣ୍ଡେ ଉଭୟେ ଭଲ ବନ୍ଧୁ । ପିଲାଦିନରୁ ଉଭୟ ପରସ୍ପରକୁ ଜାଣନ୍ତି । କରଣ ଜୋହରଙ୍କ ଚାଟ୍ ଶୋ' କଫି ୱିଥ କରଣ ସିଜନ ୮ରେ ଉଭୟଙ୍କୁ ଏକାଠି ଦେଖିବାକୁ ମିଳିଥିଲା । ଯେଉଁଠାରେ ଦୁହେଁ ସମାନ ଅଭିନେତାଙ୍କୁ ଡେଟ କରୁଥିଲେ ବୋଲି କହିଥିଲେ । କହିରଖୁଛୁ କି, ଉଭୟ ଅଭିନେତ୍ରୀ ଅଭିନେତା କାର୍ତ୍ତିକ ଆର୍ଯ୍ୟନଙ୍କୁ ଡେଟ କରିଥିଲେ ।
ଏହା ମଧ୍ୟ ପଢନ୍ତୁ: ଡ୍ରିମ ଗାର୍ଲ-2ରେ କାଷ୍ଟ ନହେବା ନେଇ ତାତିଲେ ନୁସରତ, ଦେଲେ ଏଭଳି ପ୍ରିତିକ୍ରିୟା
ପ୍ରକାଶ ଥାଉ କି, ୨୦୧୯ ମସିହାରେ, ଡ୍ରିମ୍ ଗାର୍ଲର ପ୍ରଥମ ଭାଗରେ ଆୟୁଷ୍ମାନ ଖୁରାନାଙ୍କ ବିପକ୍ଷରେ ମୁଖ୍ୟ ଭୂମିକାରେ ଅଭିନେତ୍ରୀ ନୁସରତ ଭରୁଚ୍ଚା ନଜର ଆସିଥିଲେ । ତାଙ୍କ ସହ ଅନ୍ନୁ କପୁର, ବିଜୟ ରାଜ ଏବଂ ଅଭିଷେକ ବାନାର୍ଜୀ ନିଜ ହାସ୍ୟ ଅଭିନୟରେ ଲୋକଙ୍କୁ ହସାଇଥିଲେ। ଅଗଷ୍ଟ ୨୫, ୨୦୨୩ରେ ରିଲିଜ ହୋଇଥିଲା ଡ୍ରିମ୍ ଗାର୍ଲ-2 । ଯେଉଁଥିରେ ନୁସରତଙ୍କ ବଦଳରେ ଅନନ୍ୟା ପାଣ୍ଡେ ନଜର ଆସିଥିଲେ । ତେବେ ବର୍ତ୍ତମାନ ଡ୍ରିମ୍ ଗାର୍ଲ-୩ ରେ ପ୍ରଥମ ଥର ପାଇଁ ଏବେ ସାରା ଏବଂ ଆଯୁଷ୍ମାନଙ୍କୁ ଏକାଠି ଦେଖିବାକୁ ମିଳିବ ।
