अहमदनगर - ऊर्जा राज्यमंत्री प्राजक्त तनपुरे यांच्या भेटीसाठी काल शेवगाववरून स्वाभिमानी शेतकरी संघटनेचे एक शिष्टमंडळ गेले होते. त्यांच्या वाहनाला नगर-औरंगाबाद रोडवरील घोडेगावजवळ अपघात झाला. या अपघातात गाडीतील पदाधिकारी किरकोळ जखमी झाले.
पाठीमागून येणाऱ्या वाहनाने दिली धडक -
शेवगाव तालुक्यातील अमरापुर, फलकेवाडी, भगूर या भागातील शेतकऱ्यांना घेऊन हे शिष्टमंडळ राहुरीला गेले होते. तालुक्यातील विजेच्या प्रश्नावर चर्चा करून हे शिष्टमंडळ शेवगावच्या दिशेने येत असताना घोडेगावजवळ पदाधिकाऱ्यांच्या वाहनाला पाठीमागून येणाऱ्या वाहनाने जोराची धडक दिली. या धडकेमुळे पदाधिकाऱ्यांना मुकामार बसला. यावेळी वाहनामध्ये स्वाभिमानी शेतकरी संघटनेचे तालुका अध्यक्ष प्रशांत भराट, तालुका पक्ष अध्यक्ष प्रवीण मस्के, जिल्हा सरचिटणीस बाळासाहेब फटांगडे, मेजर अशोक भोसले, अमोल देवढे हे होते.
शेतकऱ्यांच्या आशिर्वादाने बचावलो -
शेतकऱ्यांच्या आशिर्वादानेच आम्ही या अपघातातून बचावलो. असेच आशीर्वाद पुढील काळातही आमच्या मागे असू द्या. आम्ही शेतकऱ्यांच्या प्रश्नांना आणि त्यांना न्याय देण्यासाठी कायम बांधील आहोत, असे जिल्हा सरचिटणीस बाळासाहेब फटांगडे यांनी सांगितले.
उर्जा राज्यमंत्री घेणार आढावा बैठक -
प्राजक्त तनपुरे यांच्या भेटीसाठी गेलेल्या शिष्टमंडळाने शेतकऱ्यांचे व विजेचे प्रश्न त्यांच्यासमोर मांडले. पुढील आठवड्यामध्ये शेवगाव तालुक्याची आढावा बैठक घेणार असल्याचे तनपुरे यांनी या शिष्टमंडळाला आश्वासन दिले आहे.