बंगळुरु - कर्नाटकमधील तुमकूर जिल्ह्यातून बंगळुरुला जात असताना एका खासगी ट्रॅव्हल्सने अचानक पेट घेतला. या आगीमध्ये ३० प्रवासी होरपळून जखमी झाले आहेत. ही घटना तुमकूर जिल्ह्यातील ओरुकीरी येथे राष्ट्रीय महामार्ग ४ वर काल(शुक्रवारी) मध्यरात्री घडली.
या घटनेत एक महिला गंभीर भाजली आहे. तर इतर प्रवासी किरकोळ जखमी झाले आहेत. जखमींना जवळील रुग्णालयात दाखल करण्यात आले आहे. बसला आग लागल्यानंतर चालक आणि इतर कर्मचारी पळून गेले. आग लागलेली बस रॉयल ट्रॅव्हल या खासगी कंपनीची आहे.
रात्रीची आग लागल्याने बसमधील बरेच प्रवासी झोपलेले होते. आग लागताच एकच आरडाओरडा झाला. बसमधून खाली उतरण्यासाठी पळापळ सुरू झाली. थोड्याच वेळात बसने पूर्णपणे पेट घेतला. आगीचे लोळ महामार्गावर पसरले. थोडक्यात बचावले असले तरी सर्व प्रवासी भयभीत झाले होते. आग लागलेली खासगी बस यादगिरी जिल्ह्यातील असल्याची माहिती मिळाली आहे.
