ಪ್ಯಾರಿಸ್ ಒಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಎರಡು ಪದಕ ಗೆದ್ದ ಭಾರತದ ಮಹಿಳಾ ಶೂಟರ್ ಮನು ಭಾಕರ್ ಅವರ ಬ್ರ್ಯಾಂಡ್ ಮೌಲ್ಯ ಗಣನೀಯವಾಗಿ ಹೆಚ್ಚಾಗಿದೆ. ಹಲವು ಪ್ರಸಿದ್ಧ ಬ್ರ್ಯಾಂಡ್‌ಗಳು ಮನು ಅವರನ್ನು ತಮ್ಮ ಬ್ರ್ಯಾಂಡ್ ಅಂಬಾಸಿಡರ್ ಮಾಡಿಕೊಳ್ಳಲು ಸಂಪರ್ಕಿಸಿವೆ ಎಂಬ ಮಾಹಿತಿ ದೊರೆತಿದೆ. ಅವಳಿ ಪದಕ ಸಾಧನೆಯ ಬೆನ್ನಲ್ಲೇ 40ಕ್ಕೂ ಅಧಿಕ ಪ್ರಸಿದ್ಧ ಬ್ರ್ಯಾಂಡ್‌ಗಳು ಜಾಹೀರಾತು ಒಪ್ಪಂದಗಳಿಗಾಗಿ ಸಂಪರ್ಕಿಸಿವೆ ಎಂದು ವರದಿಯಾಗಿದೆ.
ಮನು ಈ ಹಿಂದೆಯೂ ರಾಷ್ಟ್ರ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮಿಂಚಿದ್ದರು. ಉತ್ತಮ ಕ್ರೀಡಾಪಟುವಾಗಿದ್ದರಿಂದಾಗಿ ಹಲವು ಕಂಪನಿಗಳು ಅವರನ್ನು ಹುಡುಕಿಕೊಂಡು ಬಂದಿವೆ.
ಈ ಬಾರಿಯ ಪ್ಯಾರಿಸ್ ಒಲಿಂಪಿಕ್ಸ್ಗೆ ಹೋಗುವವರೆಗೆ ಅವರು ತಾವು ನಟಿಸಿರುವ ಪ್ರತಿ ಜಾಹೀರಾತುಗಳಿಗಾಗಿ 20 ಲಕ್ಷ ರೂ.ಗಳಿಂದ 25 ಲಕ್ಷ ರೂ.ಗಳ ಸಂಭಾವನೆ ಪಡೆಯುತ್ತಿದ್ದರು. ಆದರೆ ಇದೀಗ, ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಎರಡು ಪದಕಗೆದ್ದ ನಂತರ ಸಂಭಾವನೆ ಹೆಚ್ಚಾಗಿದೆ. ಈಗಾಗಲೇ 40 ಕಂಪನಿಗಳು ಮನು ಅವರನ್ನು ತಮ್ಮ ಬ್ರ್ಯಾಂಡ್ ಅಂಬಾಸಿಡರ್ ಮಾಡಿಕೊಳ್ಳಲು ಸಂಪರ್ಕಿಸಿವೆ ಎಂದು ಐಒಎಸ್ ಸ್ಟೋರ್ಸ್ ಮತ್ತು ಎಂಟರ್‌ಟೈನ್‌ಮೆಂಟ್‌ನ ಸಿಇಒ ನೀರವ್ ತೋಮರ್ ತಿಳಿಸಿದ್ದಾರೆ.
ಮನು ಅವರ ಎಲ್ಲಾ ಜಾಹೀರಾತುಗಳು, ಜಾಹೀರಾತು ಚಿತ್ರೀಕರಣದ ಶೆಡ್ಯೂಲಿಂಗ್ಗಳು ಹಾಗೂ ಆ ಮೂಲಕದ ಆದಾಯ ಸೇರಿ ಇವೆಲ್ಲವನ್ನೂ ಆ ಸಂಸ್ಥೆಯೇ ನೋಡಿಕೊಳ್ಳುತ್ತಿದೆ. ಕಂಪನಿಯ ಸಿಇಒ ನೀರವ್ ತೋಮರ್, ಮನು ಅವರ ಇತ್ತೀಚಿನ ಸಂಭಾವನೆ ವಿಚಾರವಾಗಿ ಹೇಳಿಕೆ ನೀಡಿದ್ದಾರೆ.
''ಕೇವಲ ಎರಡು ಮೂರು ದಿನಗಳಲ್ಲಿ ಮನು ಅವರ ಕಾಲ್ ಶೀಟ್ ಕೇಳಿಕೊಂಡು ಸುಮಾರು 40 ಕಂಪನಿಗಳು ಸಂಪರ್ಕಿಸಿವೆ. ಆದರೆ, ಯಾವುದನ್ನೂ ಫೈನಲ್ ಮಾಡಿಲ್ಲ. ಸದ್ಯದಲ್ಲೇ ಮನು ಅವರೊಂದಿಗೆ ಚರ್ಚಿಸಿ ಫೈನಲ್ ಮಾಡಲಾಗುತ್ತದೆ. ಸದ್ಯಕ್ಕೆ ಇನ್ನೂ ಮಾತುಕತೆ ನಡೆಸಲಾಗುತ್ತಿದೆ'' ಎಂದು ಅವರು ತಿಳಿಸಿದರು.
ಮನು ಬ್ರ್ಯಾಂಡ್ ವ್ಯಾಲ್ಯೂ ಆರು ಪಟ್ಟು ಹೆಚ್ಚಳ: ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಜೋಡಿ ಪದಕ ಗೆದ್ದ ನಂತರ ಮನು ಭಾಕರ್ ಅವರ ಬ್ರಾಂಡ್ ವ್ಯಾಲ್ಯೂ ಸುಮಾರು ಐದರಿಂದ ಆರು ಪಟ್ಟು ಹೆಚ್ಚಾಗಿದೆ ಎನ್ನಲಾಗುತ್ತಿದೆ. ಈ ಮೊದಲು 20ರಿಂದ 25 ಲಕ್ಷ ರೂ. ಸಂಭಾವನೆ ಪಡೆಯುತ್ತಿದ್ದ ಮನು ಭಾಕರ್ ಅವರ ಬ್ರಾಂಡ್ ವ್ಯಾಲ್ಯೂ ಈಗ 1.5 ಕೋಟಿ ರೂ. ಆಗಿದೆ ಎಂಬ ಮಾಹಿತಿ ಲಭ್ಯವಾಗಿದೆ. ಮನು ಈ ಹಿಂದೆ ಏಷ್ಯನ್ ಗೇಮ್ಸ್ ಮತ್ತು ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ ಪದಕ ಗೆದ್ದಿದ್ದರು.
12 ಕೋಟಿ ರೂ ಮೌಲ್ಯದ ಆಸ್ತಿ: 2024ರ ಮಾಹಿತಿ ಪ್ರಕಾರ, ಮನು ಭಾಕರ್ ಒಟ್ಟು ನಿವ್ವಳ ಆಸ್ತಿ ಮೌಲ್ಯ 12 ಕೋಟಿ ರೂ. ಎಂಬ ಮಾಹಿತಿ ಇದೆ. ಪರ್ಫಾರ್ಮ್ಯಾಕ್ಸ್, ನಥಿಂಗ್ ಇಂಡಿಯಾ, ಪಂದ್ಯಾವಳಿಗಳಿಂದ ಬಂದ ಹಣ, ಬಹುಮಾನದ ಹಣ, ಒಪ್ಪಂದ ಮತ್ತು ಪ್ರಾಯೋಜಕತ್ವದಂತಹ ಬ್ರಾಂಡ್‌ಗಳನ್ನು ಪ್ರಚಾರ ಮಾಡುವ ಮೂಲಕ ಅವರು ತಮ್ಮ ನಿವ್ವಳ ಮೌಲ್ಯವನ್ನು ಹೆಚ್ಚಿಸಿಕೊಂಡಿದ್ದಾರೆಂದು ವರದಿಯಾಗಿದೆ. ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ ಪದಕ ಗೆದ್ದಿದ್ದಕ್ಕಾಗಿ ಹರ್ಯಾಣ ಸರ್ಕಾರವು ಕೆಲವು ವರ್ಷಗಳ ಹಿಂದೆ ಮನು ಬಾಕರ್ ಅವರಿಗೆ 2 ಕೋಟಿ ರೂ. ಬಹುಮಾನ ನೀಡಿತ್ತು. ಇವೆಲ್ಲವೂ ಸೇರಿ ಯುವ ಶೂಟರ್ ಮನು ಬಾಕರ್ ಆಸ್ತಿ ಮೌಲ್ಯ ಇದೀಗ 12 ಕೋಟಿ ರೂ ತಲುಪಿದೆ.
ಪ್ರಸ್ತುತ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಮನು ಭಾಕರ್ ಅವರು, ಮಹಿಳೆಯರ 10 ಮೀ. ಏರ್ ಪಿಸ್ತೂಲ್ ವಿಭಾಗದಲ್ಲಿ ಕಂಚಿನ ಪದಕ ಗೆದ್ದಿದ್ದರು. ಆ ನಂತರ, 25 ಮೀಟರ್ ಮಿಶ್ರ ವಿಭಾಗದಲ್ಲಿ ಸರಬ್ಜೋತ್ ಸಿಂಗ್ ಅವರ ಜೊತೆಗೆ ಅವರು ಮತ್ತೊಂದು ಕಂಚಿನ ಪದಕ ತಮ್ಮದಾಗಿಸಿಕೊಂಡಿದ್ದಾರೆ. ಈ ಮೂಲಕ ಒಂದೇ ಒಲಿಂಪಿಕ್ಸ್ನಲ್ಲಿ ಎರಡು ಪದಕಗಳನ್ನು ಗೆದ್ದ ಭಾರತದ ಮೊಟ್ಟಮೊದಲ ಕ್ರೀಡಾಪಟು ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದಾರೆ.
