ಟೊರಾಂಟೊ(ಕೆನಡಾ): ಭಾರತದ ಸಾಂಪ್ರದಾಯಿಕ ಕ್ರೀಡೆಯಾದ ಚದುರಂಗದಾಟದಲ್ಲಿ (ಚೆಸ್) ಮತ್ತೊಂದು ಉದಯೋನ್ಮುಖ ತಾರೆ ಮಿನುಗಿದೆ. ಕೆನಡಾದಲ್ಲಿ ನಡೆದ 'ಫಿಡೆ ಕ್ಯಾಂಡಿಡೇಟ್ಸ್' ಚೆಸ್ ಟೂರ್ನಿಯನ್ನು ಭಾರತದ 17 ವರ್ಷದ ಗ್ರ್ಯಾಂಡ್ ಮಾಸ್ಟರ್ ಗುಕೇಶ್ ದೊಮ್ಮರಾಜು ಗೆದ್ದುಕೊಂಡರು. ಈ ಮೂಲಕ 'ಅತಿ ಕಿರಿಯ ಚಾಂಪಿಯನ್' ಎಂಬ ದಾಖಲೆಯನ್ನೂ ಬರೆದರು.
13ನೇ ಸುತ್ತಿನವರೆಗೂ 8.5 ಅಂಕ ಗಳಿಸಿದ್ದ ಗುಕೇಶ್ 14ನೇ ಸುತ್ತಿನಲ್ಲಿ ಅಮೆರಿಕದ ಹಿಕಾರು ನಕಾಮುರಾ ವಿರುದ್ಧ ಡ್ರಾ ಸಾಧಿಸಿ 9 ಅಂಕ ಸಂಪಾದಿಸಿದರು. ಇನ್ನೊಂದೆಡೆ, ರಷ್ಯಾದ ನೆಪೊಮ್ನೇಷಿಯಾ ಮತ್ತು ಅಮೆರಿಕದ ಫ್ಯಾಬಿಯಾನೊ ಕರುವಾನಾ ನಡುವಿನ ಪಂದ್ಯವೂ ಡ್ರಾಗೊಂಡಿತು. ಆದರೆ, ಇಬ್ಬರೂ 8.5 ಅಂಕ ಗಳಿಸಿದರು. ಇದರಿಂದ ಭಾರತದ ಗ್ರ್ಯಾಂಡ್ ಮಾಸ್ಟರ್ ವಿಜೇತರಾದರು.
ಚೆಸ್ ಇತಿಹಾಸದಲ್ಲೇ ಮೊದಲು: ಭಾರತದ ಗ್ರ್ಯಾಂಡ್‌ಮಾಸ್ಟರ್ ಗುಕೇಶ್ ಚೆಸ್ ಇತಿಹಾಸದಲ್ಲೇ ಅದ್ಭುತ ಸೃಷ್ಟಿಸಿದ್ದಾರೆ. ಹಾಲಿ ಚಾಂಪಿಯನ್ ಆಟಗಾರರೊಬ್ಬರಿಗೆ ಚಾಲೆಂಜರ್ (ಸವಾಲಿಗ) ಆದ ಅತಿ ಕಿರಿಯ ಆಟಗಾರ ಎಂಬ ಅಭಿದಾನಕ್ಕೆ ಪಾತ್ರರಾದರು. ಈವರೆಗೂ ಯಾವೊಬ್ಬ ಕಿರಿಯ ಆಟಗಾರನೂ ಮಾಡಿರದ ಸಾಧನೆ ಇದು.
ಈ ಗೆಲುವಿನೊಂದಿಗೆ ಗುಕೇಶ್ ವಿಶ್ವ ಚಾಂಪಿಯನ್ಶಿಪ್ ಪ್ರಶಸ್ತಿ ಹೋರಾಟಕ್ಕೆ ಅರ್ಹತೆ ಪಡೆದರು. ವರ್ಷದ ಕೊನೆಯಲ್ಲಿ ವಿಶ್ವ ಚಾಂಪಿಯನ್ಶಿಪ್ ಟೂರ್ನಿ ನಡೆಯಲಿದ್ದು, ಹಾಲಿ ಚಾಂಪಿಯನ್ ಚೀನಾದ ಡಿಂಗ್ ಲಿರೆನ್ ಅವರಿಗೆ ಭಾರತದ ಗ್ರ್ಯಾಂಡ್ ಮಾಸ್ಟರ್ ಸವಾಲೊಡ್ಡಲಿದ್ದಾರೆ. ಆ ಸ್ಪರ್ಧೆಯನ್ನೂ ಗೆದ್ದರೆ ಚಾಂಪಿಯನ್ ಶಿಪ್ ಗೆದ್ದ ಅತ್ಯಂತ ಕಿರಿಯ ಆಟಗಾರ ಎಂಬ ದಾಖಲೆ ಸೃಷ್ಟಿಸುವ ಅವಕಾಶವಿದೆ. ಚದುರಂಗದಾಟದ ಚತುರರಾದ ಮ್ಯಾಗ್ನಸ್ ಕಾರ್ಲ್ಸನ್ ಮತ್ತು ಕಾಸ್ಪರೋವ್ ಅವರು 22ನೇ ವಯಸ್ಸಿನಲ್ಲಿ ಚಾಂಪಿಯನ್ ಆಗಿದ್ದರು.
ಎರಡನೇ ಭಾರತೀಯ: ಫಿಡೆ ಕ್ಯಾಂಡಿಡೇಟ್ಸ್ ಚೆಸ್ ಟೂರ್ನಿ ಗೆದ್ದುಕೊಂಡ ಎರಡನೇ ಭಾರತೀಯ ಎಂಬ ಹೆಗ್ಗಳಿಕೆಗೂ ಗುಕೇಶ್ ಭಾಜನರಾದರು. ಇದಕ್ಕೂ ಮೊದಲು ಚೆಸ್ ದಂತಕಥೆ ವಿಶ್ವನಾಥನ್ ಆನಂದ್ ಅವರು ಟೂರ್ನಿ ಜಯಿಸಿದ್ದರು.
ಶುಭಾಶಯಗಳ ಸುರಿಮಳೆ: ಭಾರತದ ಯುವ ಸೆನ್ಸೇಷನ್ ಗುಕೇಶ್ ಅವರ ಸಾಧನೆಗೆ ಹೊಗಳಿಕೆಯ ಸುರಿಮಳೆ ಸುರಿದಿದೆ. ಪ್ರಧಾನಿ ನರೇಂದ್ರ ಮೋದಿ, ಕ್ರೀಡಾಪಟುಗಳು ಸೇರಿದಂತೆ ಗಣ್ಯರು ಹಾಡಿ ಹೊಗಳಿದ್ದಾರೆ.
ಚಾಂಪಿಯನ್ ಗುಕೇಶ್ ಅವರಿಗೆ ಶುಭಾಶಯ ಕೋರಿರುವ ಮೋದಿ, ನಿಮ್ಮ ಬಗ್ಗೆ ಭಾರತ ಹೆಮ್ಮೆಪಡುತ್ತದೆ. ಟೊರೊಂಟೊದಲ್ಲಿ ಪ್ರಶಸ್ತಿ ಗೆದ್ದಿದ್ದು ನಿಮ್ಮ ಪ್ರತಿಭೆ ಮತ್ತು ಸಮರ್ಪಣೆಗೆ ಸಾಕ್ಷಿ. ಗುಕೇಶ್ ಅವರ ಸಾಧನೆ ಲಕ್ಷಾಂತರ ಜನರಿಗೆ ಸ್ಫೂರ್ತಿ ಎಂದು ಎಕ್ಸ್ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.
ಗುಕೇಶ್ ಗೆಲುವಿನ ಬಗ್ಗೆ ಚೆಸ್ ದಿಗ್ಗಜ ವಿಶ್ವನಾಥನ್ ಆನಂದ್ ಪ್ರತಿಕ್ರಿಯಿಸಿದ್ದು, ಚಿಕ್ಕ ವಯಸ್ಸಿನಲ್ಲೇ ಚಾಲೆಂಜರ್ ಆಗಿದ್ದು ಅಭಿನಂದನಾರ್ಹ. ಭಾರತದ ಚೆಸ್ ಕುಟುಂಬವು ನಿಮ್ಮ ಯಶಸ್ಸಿನ ಬಗ್ಗೆ ಹೆಮ್ಮೆಪಡುತ್ತದೆ. ಕಠಿಣ ಸಂದರ್ಭಗಳಲ್ಲಿ ನೀವು ತೋರಿದ ಜಾಣ್ಮೆ ಪ್ರಶಂಸನೀಯ ಎಂದು ಹೊಗಳಿದ್ದಾರೆ.
