ಚೆನ್ನೈ: ಐಪಿಎಲ್ ಟೂರ್ನಿಯ ಡೇಂಜರಸ್ ತಂಡ ಎನಿಸಿಕೊಂಡಿದ್ದ ಸನ್ರೈಸರ್ಸ್ ಹೈದರಾಬಾದ್, ಚೆಪಾಕ್ ಕ್ರೀಡಾಂಗಣದಲ್ಲಿ ಮಕಾಡೆ ಮಲಗಿತು. ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ 78 ರನ್ಗಳ ಹೀನಾಯ ಸೋಲು ಕಂಡಿತು. ಇದಕ್ಕೆ ಕಾರಣವಾಗಿದ್ದು, ಸಿಎಸ್ಕೆ ನಾಯಕ ಋತುರಾಜ್ ಗಾಯಕ್ವಾಡ್ ಮತ್ತು ತುಷಾರ್ ದೇಶಪಾಂಡೆ.
ದೈತ್ಯ ಬ್ಯಾಟಿಂಗ್ ಪಡೆಯೊಂದಿಗೆ ಈ ಋತುವಿನ ಐಪಿಎಲ್ನಲ್ಲಿ ದಾಖಲೆಗಳ ಮೇಲೆ ದಾಖಲೆ ಬರೆದ ತಂಡ 134 ರನ್ಗೆ ಆಲೌಟ್ ಆಗಿ ಅಚ್ಚರಿ ಮೂಡಿಸಿತು. ಇದು 17ನೇ ಆವೃತ್ತಿಯಲ್ಲಿ ತಂಡವೊಂದು ದಾಖಲಿಸಿದ ಎರಡನೇ ಅತಿ ಕಡಿಮೆ ಮೊತ್ತವಾಗಿದೆ. ಸಿಎಸ್ಕೆಗೆ ಭಾರಿ ಸವಾಲಿನ ಬೆದರಿಕೆ ಹಾಕಿದ್ದ ತಂಡ, ತಾಳ - ಮೇಳ ಕಳೆದುಕೊಂಡು, ಟೂರ್ನಿಯಲ್ಲಿ 4 ಸೋಲು ಅನುಭವಿಸಿ ಪಾಯಿಂಟ್ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನಕ್ಕೆ ಜಾರಿತು.
ಬ್ಯಾಟಿಂಗ್ ಪಡೆಯೇ ಧ್ವಂಸ: ಹೈದರಾಬಾದ್ ತಂಡವು ಬೌಲಿಂಗ್ ಮತ್ತು ಬ್ಯಾಟಿಂಗ್ನಲ್ಲಿ ಬಲಿಷ್ಠವಾಗಿದೆ. ಆಡಿದ 9 ಪಂದ್ಯಗಳಲ್ಲಿ ಎರಡು ಬಾರಿ ಐಪಿಎಲ್ ಸಾರ್ವಕಾಲಿಕ ದಾಖಲೆ ಸೃಷ್ಟಿಸಿ, ಸಂಚಲ ಮೂಡಿಸಿದೆ. ಇಂತಹ ದೈತ್ಯ ಬ್ಯಾಟಿಂಗ್ ಪಡೆಯನ್ನು ಹೊಂದಿರುವ ತಂಡ ಕೇವಲ 134 ರನ್ಗೆ ಮೊದಲ ಬಾರಿಗೆ ಆಲೌಟ್ ಆಗಿದ್ದಲ್ಲದೇ, ಸತತ ಎರಡನೇ ಮುಖಭಂಗ ಅನುಭವಿಸಿತು. ಟ್ರಾವಿಸ್ ಹೆಡ್ 13, ಅಭಿಷೇಕ್ ಶರ್ಮಾ 15, ಅನ್ಮೋಲ್ ಪ್ರೀತ್ ಸಿಂಗ್ 0, ನಿತೀಶ್ ರೆಡ್ಡಿ 15, ಹೆನ್ರಿಕ್ ಕ್ಲಾಸಿನ್ 20, ಅಬ್ದುಲ್ ಸಮದ್ 19, ಆ್ಯಡಂ ಮಾರ್ಕ್ರಮ್ 32 ರನ್ ಮಾತ್ರ ಗಳಿಸಿದರು. ಕನಿಷ್ಠ 10 ರಿಂದ 15 ರನ್ಗಳ ಅಂತರದಲ್ಲಿ ಒಂದು ಅಥವಾ 2 ವಿಕೆಟ್ ಕಳೆದುಕೊಳ್ಳುತ್ತಾ ಸಾಗಿ ಪತನಗೊಂಡಿತು.
ತುಷಾರ್ ಬಿರುಗಾಳಿ: ಹೈದರಾಬಾದ್ ಪಡೆಯನ್ನು ಛಿದ್ರ ಮಾಡಿದ್ದು ತುಷಾರ್ ದೇಶಪಾಂಡೆ ಬಿರುಗಾಳಿ ಬೌಲಿಂಗ್. ಕೇವಲ 3 ಓವರ್ಗಳಲ್ಲಿ 27 ರನ್ ನೀಡಿ 4 ವಿಕೆಟ್ ಕಬಳಿಸಿದರು. ಇದು ತಂಡವು ಮೇಲೇಳದಂತೆ ಮಾಡಿತು. ಇವರ ಜೊತೆಗೆ ಮತೀಶ್ ಪತಿರಾನ, ಮುಸ್ತಾಫಿಜರ್ ರಹಮಾನ್ ತಲಾ ವಿಕೆಟ್ ಪಡೆದರೆ, ರವೀಂದ್ರ ಜಡೇಜಾ, ಶಾರ್ದೂಲ್ ಠಾಕೂರ್ ತಲಾ 1 ವಿಕೆಟ್ ಕಬಳಿಸಿ ಗೆಲುವಿನ ಪಾಲು ಹಂಚಿಕೊಂಡರು.
ಗಾಯಕ್ವಾಡ್ಗೆ ತಪ್ಪಿದ ಶತಕ: ವಿಶ್ವಕಪ್ಗೆ ಆಯ್ಕೆ ಗುರಿ ಇಟ್ಟುಕೊಂಡಿರುವ ಸಿಎಸ್ಕೆ ನಾಯಕ ಋತುರಾಜ್ ಗಾಯಕ್ವಾಡ್ ಭರ್ಜರಿ ಬ್ಯಾಟಿಂಗ್ ಲಯದಲ್ಲಿದ್ದಾರೆ. ಈಗಾಗಲೇ ಶತಕ ಬಾರಿಸಿರುವ ಅವರು ಎರಡನೇ ಶತಕದಂಚಿನಲ್ಲಿ ಎಡವಿದರು. 54 ಎಸೆತಗಳಲ್ಲಿ 98 ರನ್ ಗಳಿಸಿದ್ದಾಗ ಇನಿಂಗ್ಸ್ನ ಕೊನೆಯ ಓವರ್ನಲ್ಲಿ ನಟರಾಜನ್ಗೆ ವಿಕೆಟ್ ನೀಡಿ ಹಂಡ್ರೆಡ್ ತಪ್ಪಿಸಿಕೊಂಡರು. ಡ್ಯಾರೆಲ್ ಮಿಚೆಲ್ 52, ಶಿವಂ ದುಬೆ 39 ರನ್ ಗಳಿಸಿದರು.
ಪಂದ್ಯದಲ್ಲಿ ಸಿಎಸ್ಕೆ 212 ರನ್ ಗಳಿಸುವ ಮೂಲಕ 35ನೇ ಬಾರಿಗೆ 200+ ರನ್ ಗಳಿಸಿತು. ಇದು ಟಿ20 ಇತಿಹಾಸದಲ್ಲೇ ಯಾವುದೇ ತಂಡ ಮಾಡದ ಸಾಧನೆಯಾಗಿದೆ. ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಆಟಗಾರನಾಗಿ 150ನೇ ಪಂದ್ಯದ ಗೆಲುವು ಅನುಭವಿಸಿದರು. ಚೆಪಾಕ್ ಕ್ರೀಡಾಂಗಣದಲ್ಲಿ ಸನ್ರೈಸರ್ಸ್ ಹೈದರಾಬಾದ್ ಆಡಿದ ಐದೂ ಪಂದ್ಯಗಳಲ್ಲಿ ಸೋಲುವ ಮೂಲಕ ಚೋಕರ್ಸ್ ಆಗಿ ಮುಂದುವರೆಯಿತು.
ಇದನ್ನೂ ಓದಿ: IPL: ವಿಲ್ ಜಾಕ್ಸ್ ಸಿಡಿಲಬ್ಬರದ ಬ್ಯಾಟಿಂಗ್: ಆರ್ಸಿಬಿಗೆ ಶರಣಾದ ಟೈಟಾನ್ಸ್ - RCB BEATS GT
