ಮನುಷ್ಯನ ಇಳಿ ವಯಸ್ಸಿಗೆ ಮಧುಮೇಹ ಬರುವುದು ಸಾಮಾನ್. ಮಧುಮೇಹ ಎನ್ನುವುದು ನಮ್ಮ ದೇಹದಲ್ಲಿ ಗ್ಲೂಕೋಸ್ ಪದಾರ್ಥದ ನಿಯಂತ್ರಣ ವ್ಯವಸ್ಥೆಯ ದೋಷಗಳಿಂದ ಉಂಟಾಗುವ ಒಂದು ಕಾಯಿಲೆ. ಇದನ್ನು ಸಕ್ಕರೆ ಕಾಯಿಲೆ, ಡಯಾಬಿಟೀಸ್, ಶುಗರ್‌ ಎಂದು ನಾನಾ ವಿಧದಲ್ಲಿ ಕರೆಯುದುಂಟು. ಹಾಗಾದಾರೆ, ಈ ಮಧುಮೇಹ ಇದ್ದವರು ಮದ್ಯಪಾನ ಮಾಡಬಹುದೇ? ಯಾವುದೇ ಕಾರಣಕ್ಕೂ ಯಾವುದೇ ಸಂದರ್ಭದಲ್ಲಿಯೂ ಮದ್ಯಪಾನ ಮಾಡಬಾರದು ಎನ್ನುತ್ತಾರೆ ಸಂಬಂಧಪಟ್ಟ ತಜ್ಞರು. ಮಧುಮೇಹಕ್ಕೆ ಮದ್ಯವನ್ನು ಸೇರಿಸುವುದು ಬೆಂಕಿಗೆ ಇಂಧನವನ್ನು ಸೇರಿಸಿದಂತೆ. ಸ್ವಲ್ಪ ಮದ್ಯ ಸೇವನೆ ಮಾಡುವುದರಿಂದ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಂತ್ರಣದಲ್ಲಿಡುತ್ತದೆ ಎಂದು ಕೆಲವರು ಭಾವಿಸುತ್ತಾರೆ. ಆದರೆ, ಇದು ಸತ್ಯವಲ್ಲ ಎನ್ನುತ್ತಾರೆ ತಜ್ಞರು.
ಮನುಷ್ಯನ ನರಗಳನ್ನು ದುರ್ಬಲಗೊಳಿಸುವುದು ಮಧುಮೇಹದ ಮೊದಲ ಲಕ್ಷಣ. ಮದ್ಯ ಸೇವಿಸಿದರೆ ನರಗಳ ಶಕ್ತಿ ಕುಂದುವಿಕೆ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ. ಈ ಕಾರಣದಿಂದಾಗಿ, ಹೆಚ್ಚಿನ ಜನರು ಕಾಲು ಮತ್ತು ಕೈಗಳಲ್ಲಿ ಮರಗಟ್ಟುವಿಕೆ, ಸುಡುವ ಮತ್ತು ಸೂಜಿಯಿಂದ ಚುಚ್ಚಿದ ಅನುಭವ ಸೇರಿದಂತೆ ಮುಂತಾದ ರೋಗಲಕ್ಷಣಗಳನ್ನು ಅನುಭವಿಸುತ್ತಾರೆ. ಮಾದಕ ವಸ್ತು ಸೇವನೆಯಿಂದ ಈ ಸಮಸ್ಯೆಗಳು ಅಧಿಕಗೊಳ್ಳುವ ಸಾಧ್ಯತೆ ಹೆಚ್ಚು. ಇದು ಹೀಗೆ ದೀರ್ಘಕಾಲದವರೆಗೆ ಮುಂದುವರಿದರೆ, ನರಗಳಿಗೆ ಹಾನಿಯಾಗಬಹುದು. ಕಾಲುಗಳಲ್ಲಿ ಮರಗಟ್ಟುವಿಕೆ ಮತ್ತು ಹುಣ್ಣುಗಳಂತಹ ಇತರ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಹುದು. ಹುಣ್ಣುಗಳು ವಾಸಿಯಾಗದಿದ್ದರೆ, ಬೆರಳುಗಳನ್ನು, ಪಾದ ಮತ್ತು ಕಾಲುಗಳನ್ನು ತೆಗೆಯಬೇಕಾದ ಸಂದರ್ಭಗಳು ಬರಬಹುದು ಎನ್ನುತ್ತಾರೆ ತಜ್ಞರು.
ಸಕ್ಕರೆ ಮಟ್ಟವನ್ನು ಹೆಚ್ಚಿಸುತ್ತದೆ: ಮಧುಮೇಹ ಇರುವವರು ಮದ್ಯ ಸೇವಿಸುವುದರಿಂದ ರಕ್ತದಲ್ಲಿನ ಸಕ್ಕರೆ ಪ್ರಮಾಣ ಹೆಚ್ಚಾಗುವ ಸಾಧ್ಯತೆ ಕೂಡ ಅಧಿಕ ಎನ್ನುತ್ತಾರೆ ತಜ್ಞರು. 2018ರಲ್ಲಿ 'ಡಯಾಬಿಟಿಸ್ ಕೇರ್ ಜರ್ನಲ್' ನಲ್ಲಿ ಪ್ರಕಟವಾದ ವರದಿಯ ಪ್ರಕಾರ, ಮಧುಮೇಹ ಹೊಂದಿರುವವರು ಮದ್ಯ ಸೇವಿಸಿದಾಗ ಅವರ ರಕ್ತದಲ್ಲಿನ ಸಕ್ಕರೆಯ ಮಟ್ಟ ಶೇ. 30 ರಷ್ಟು ಹೆಚ್ಚಾಗಿರುವುದನ್ನು ಸಂಶೋಧಕರು ಕಂಡುಕೊಂಡಿದ್ದಾರೆ. ಮಧುಮೇಹ ಇರುವವರು ಮದ್ಯ ಸೇವಿಸುವುದರಿಂದ ಸಕ್ಕರೆ ಪ್ರಮಾಣ ಹೆಚ್ಚಾಗುವ ಸಾಧ್ಯತೆ ಇದೆ ಎನ್ನುತ್ತಾರೆ ಡಾ. ಎಸ್. ಮನೋಹರ್.
ಮದ್ಯ ಸೇವಿಸಿದರೆ ಹೀಗೆ ಮಾಡಿ: ಮಧುಮೇಹ ಉಳ್ಳವರು ಅಪರೂಪಕ್ಕೆ ಮದ್ಯ ಸೇವಿಸಬೇಕಾದರೆ ಸ್ವಲ್ಪ ಪ್ರಮಾಣದಲ್ಲಿ ಸೇವಿಸಿ ನಂತರ ಚೆನ್ನಾಗಿ ಊಟ ಮಾಡಬೇಕು. ಬಳಿಕ ಮಾತ್ರೆ ತೆಗೆದುಕೊಳ್ಳಬೇಕು. ಊಟ ಮಾಡದಿದ್ದರೆ ಮಾತ್ರೆಗಳನ್ನು ಸೇವಿಸಬಾರದು. ಮಧುಮೇಹದ ಔಷಧಿಗಳನ್ನು ಊಟದ ನಂತರವೇ ತೆಗೆದುಕೊಳ್ಳಬೇಕು. ಊಟ ಮಾಡದಿದ್ದರೆ ಮದ್ಯ ಸೇವಿಸಬೇಡಿ. ಆಲ್ಕೊಹಾಲ್ ಸೇವಿಸಿದ ನಂತರ ನೀವು ತಿನ್ನದಿದ್ದರೆ ಗ್ಲೂಕೋಸ್ ಮಟ್ಟವು ಕಡಿಮೆಯಾಗುವ ಸಾಧ್ಯತೆಯಿದೆ. ಆಗ ಹೈಪೊಗ್ಲಿಸಿಮಿಯಾ ಎಂಬ ಸ್ಥಿತಿ ಬರಬಹುದು. ಆದರೂ ಇದು ಅಪಾಯಕಾರಿ. ಮಧುಮೇಹ ಇರುವವರು ಮದ್ಯಪಾನ ಮಾಡಬಾರದು. ಅದು ಹವ್ಯಾಸವಾಗಿದ್ದರೂ, ಅದನ್ನು ಬಿಡಲೇಬೇಕು. ಇಲ್ಲದಿದ್ದರೆ ಕೆಟ್ಟ ಪರಿಣಾಮ ಎದುರಿಸಬೇಕಾಗುತ್ತದೆ ಎನ್ನುತ್ತಾರೆ ವೈದ್ಯರು.
ಗಮನಿಸಿ: ಇಲ್ಲಿ ನಿಮಗೆ ನೀಡಿರುವ ಎಲ್ಲಾ ಆರೋಗ್ಯ ಮಾಹಿತಿ ಮತ್ತು ಸಲಹೆಗಳು ನಿಮ್ಮ ತಿಳುವಳಿಕೆಗಾಗಿ ಮಾತ್ರ. ವೈಜ್ಞಾನಿಕ ಸಂಶೋಧನೆ, ಅಧ್ಯಯನಗಳು, ವೈದ್ಯಕೀಯ ಮತ್ತು ಆರೋಗ್ಯ ವೃತ್ತಿಪರ ಸಲಹೆಯನ್ನು ಆಧರಿಸಿ ನಾವು ಈ ಮಾಹಿತಿಯನ್ನು ಒದಗಿಸುತ್ತಿದ್ದೇವೆ. ಇವುಗಳನ್ನು ಅನುಸರಿಸುವ ಮೊದಲು ನಿಮ್ಮ ವೈಯಕ್ತಿಕ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.
ಇದನ್ನೂ ಓದಿ: ಶಾಲೆಗಳಲ್ಲಿ ಮಕ್ಕಳನ್ನು ಕಾಡುವ ನಿದ್ರಾ ಕೊರತೆ ಸಮಸ್ಯೆ; ಇದಕ್ಕೆ ಕಾರಣಗಳೇನು? - Sleep loss teenagers in school
