ಲಂಡನ್: ಕೆನಡಿಯನ್ ನಟ ಡೊನಾಲ್ಡ್ ಸದರ್ಲ್ಯಾಂಡ್ (Donald Sutherland) ನಿಧನರಾಗಿದ್ದಾರೆ. ನಟನಿಗೆ 88 ವರ್ಷ ವಯಸ್ಸಾಗಿತ್ತು. ದೀರ್ಘಕಾಲದ ಅನಾರೋಗ್ಯದಿಂದ ಬಳಲುತ್ತಿದ್ದರು. ಇದೀಗ ಜನಪ್ರಿಯ ನಟನ ಸಾವಿನ ಸುದ್ದಿ ಕೇಳಿ ಅಪಾರ ಸಂಖ್ಯೆಯ ಅಭಿಮಾನಿಗಳು ಕಂಬನಿ ಮಿಡಿದಿದ್ದಾರೆ.
ಜನಪ್ರಿಯ ಸೀರಿಸ್ 'ಎಂ.ಎ.ಎಸ್.ಹೆಚ್'ನಲ್ಲಿ ರೆಬೆಲ್ ಆರ್ಮಿ ಸರ್ಜನ್ ಹಾವ್ಕೆಯೆ ಪಿಯರ್ಸ್ ಪಾತ್ರದಲ್ಲಿ ಹೆಸರುವಾಸಿಯಾಗಿದ್ದರು. 'ದಿ ಡರ್ಟಿ ಡಜನ್'ನಲ್ಲಿ ಯುಸ್ ಜಿಐ ವೆರ್ನಾನ್ ಪಿಂಕ್ಲೆ ಪಾತ್ರದಿಂದಲೂ ಇವರು ಜನಪ್ರಿಯರು. ಅಲ್ಲದೇ, 'ಕೆಲ್ಲಿಸ್ ಹೀರೋಸ್'ನಲ್ಲಿ ಸಾರ್ಜೆಂಟ್ ಆಡ್‌ಬಾಲ್, ಆಲಿವರ್ ಸ್ಟೋನ್ ಅವರ 'ಜೆಎಫ್‌ಕೆ'ಯಲ್ಲಿ ಮಿಸ್ಟರ್ ಎಕ್ಸ್ ಮತ್ತು 'ದಿ ಹಂಗರ್ ಗೇಮ್ಸ್'ನಲ್ಲಿ ಪ್ರೆಸಿಡೆಂಟ್ ಸ್ಟೋನ್ನಮತಹ ಪಾತ್ರಗಳಿಂದ ಗುರುತಿಸಿಕೊಂಡಿದ್ದಾರೆ. ದೀರ್ಘಕಾಲದ ಅನಾರೋಗ್ಯದಿಂದ ಬಳಲುತ್ತಿದ್ದ ಅವರು ನಿಧನರಾಗಿದ್ದಾರೆ ಎಂದು ಡೊನಾಲ್ಡ್ ಸದರ್ಲ್ಯಾಂಡ್ ಪುತ್ರ - ನಟ ಕೀಫರ್ ಸದರ್ಲ್ಯಾಂಡ್ ಗುರುವಾರದಂದು ತಿಳಿಸಿದ್ದಾರೆ.
"ನನ್ನ ತಂದೆ ಡೊನಾಲ್ಡ್ ಸದರ್ಲ್ಯಾಂಡ್ ನಿಧನರಾಗಿದ್ದಾರೆ. ಚಲನಚಿತ್ರ ಇತಿಹಾಸದಲ್ಲಿ ಅತ್ಯಂತ ಪ್ರಮುಖ ನಟರಲ್ಲಿ ಒಬ್ಬರಾಗಿದ್ದರು ಎಂದು ಭಾವಿಸುತ್ತೇನೆ" ಎಂದು ನಟ ಕೀಫರ್ ಸದರ್ಲ್ಯಾಂಡ್ ತಿಳಿಸಿದ್ದಾರೆ ವರದಿಯಾಗಿದೆ. ಜೊತೆಗೆ, "ಪಾತ್ರಗಳಿಗೆ ಹೆದರಲಿಲ್ಲ. ಒಳ್ಳೆಯದು, ಕೆಟ್ಟದ್ದು ಅಥವಾ ಚೆನ್ನಾಗಿಲ್ಲ ಎಂದು ದೂರಲಿಲ್ಲ. ಅವರು ಕೆಲಸವನ್ನು ಪ್ರೀತಿಸಿದರು ಮತ್ತು ಅವರು ಇಷ್ಟಪಟ್ಟಿದ್ದನ್ನೇ ಮಾಡಿದರು. ಯಾರೂ ಅದಕ್ಕಿಂತ ಹೆಚ್ಚಿನದನ್ನು ಅಪೇಕ್ಷಿಸುವುದಿಲ್ಲ. ಉತ್ತಮ ಜೀವನ ಸಾಗಿಸಿ ತೆರಳಿದ್ದಾರೆ" ಎಂದು ಮಗ ತಮ್ಮ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
935ರ ಜುಲೈ 17ರಂದು ಕೆನಡಾದ ನ್ಯೂ ಬ್ರನ್ಸ್‌ವಿಕ್‌ನಲ್ಲಿ ಜನಿಸಿದ ಡೊನಾಲ್ಡ್ ಸದರ್ಲ್ಯಾಂಡ್, ಲಂಡನ್ ಅಕಾಡೆಮಿ ಆಫ್ ಮ್ಯೂಸಿಕ್ ಅಂಡ್ ಡ್ರಾಮಾಟಿಕ್ ಆರ್ಟ್‌ನಲ್ಲಿ ಅಧ್ಯಯನ ಮಾಡಲು 1957ರಲ್ಲಿ ಲಂಡನ್ ತಲುಪಿದರು. ಅದಕ್ಕೂ ಮೊದಲು ಕೆನಡಾದಲ್ಲಿ ರೇಡಿಯೋ ಸುದ್ದಿ ವರದಿಗಾರರಾಗಿ ಕೆಲಸ ಪ್ರಾರಂಭಿಸಿದರು. ನಂತರ ಬ್ರಿಟಿಷ್ ಸಿನಿಮಾ ಮತ್ತು ಕಿರುತೆರೆ ಕಾರ್ಯಕ್ರಮಗಳ ಸಣ್ಣ ಪಾತ್ರಗಳಲ್ಲಿ ಕಾಣಿಸಿಕೊಂಡರು.
ಇದನ್ನೂ ಓದಿ: ರೇಣುಕಾಸ್ವಾಮಿ ಹತ್ಯೆ ಕೇಸ್: ದರ್ಶನ್‌ ಮತ್ತೆ ಪೊಲೀಸ್ ಕಸ್ಟಡಿಗೆ, ಪವಿತ್ರಾ ಗೌಡ ಜೈಲುಪಾಲು - Renukaswamy Murder Case
1967ರಲ್ಲಿ ಬಂದ 'ದಿ ಡರ್ಟಿ ಡಜನ್' ಅವರ ಚೊಚ್ಚಲ ಚಿತ್ರ. ನಂತರ 1970ರಲ್ಲಿ ಬಂದ 'ಎಂ.ಎ.ಎಸ್.ಹೆಚ್', 'ಕೆಲ್ಲಿಸ್ ಹೀರೋಸ್', 1976ರ 'ದಿ ಈಗಲ್ ಹ್ಯಾಸ್ ಲ್ಯಾಂಡೆಂಡ್' ವ್ಯಾಪಕವಾಗಿ ಗಮನ ಸೆಳೆದವು. ವಾರ್ ಫಿಲ್ಮ್ಸ್, ಕಾಮಿಡಿ ಡ್ರಾಮಾ, ಥ್ರಿಲ್ಲರ್ ಜಾನರ್ಗಳಲ್ಲಿ ಕಾಣಿಸಿಕೊಂಡಿದ್ದಾರೆ. 2000ರ ಸಂದರ್ಭ ಕಿರುತೆರೆಗೆ ಶಿಫ್ಟ್ ಆಗಿದ್ದು, ಅದಕ್ಕೂ ಮೊದಲು 200 ಚಿತ್ರಗಳಲ್ಲಿ ನಟಿಸಿದ್ದಾರೆ. ಹೀಗೆ ವಿವಿಧ ಪಾತ್ರಗಳ ಮೂಲಕ ಹಲವು ದಶಕಗಳ ಕಾಲ ಪ್ರೇಕ್ಷಕರನ್ನು ರಂಜಿಸಿದ್ದು, ಸದ್ಯ ಡೊನಾಲ್ಡ್ ಸದರ್ಲ್ಯಾಂಡ್ ನೆನಪು ಮಾತ್ರ. ಅಭಿಮಾನಿಗಳು ಸಂತಾಪ ಸೂಚಿಸುತ್ತಿದ್ದಾರೆ.
ಇದನ್ನೂ ಓದಿ: ಪಶ್ಚಿಮ ಬಂಗಾಳ ರೈಲು ಅಪಘಾತ: ಗೂಡ್ಸ್ ರೈಲಿನ ಅತಿ ವೇಗವೇ ದುರಂತಕ್ಕೆ ಕಾರಣ - West Bengal Train Accident
