ಬಾಲಿವುಡ್ ನಟ ಅಜಯ್ ದೇವ್ಗನ್ ಮುಖ್ಯಭೂಮಿಕೆಯ ಮುಂದಿನ ಬಹುನಿರೀಕ್ಷಿತ ಸಿನಿಮಾ ''ಮೈದಾನ್''. ಪ್ರೇಕ್ಷಕರು, ಇದೇ ಸಾಲಿನಲ್ಲಿ ಬಿಡುಗಡೆ ಆಗಲಿರುವ ಈ ಚಿತ್ರದ ಟ್ರೇಲರ್ ನಿರೀಕ್ಷಿಸುತ್ತಿದ್ದಾರೆ. ಹೀಗಿರುವಾಗ ನಾಯಕ ನಟ ಸಿನಿಮಾದ ಸಣ್ಣ ವಿಡಿಯೋವೊಂದನ್ನು ಹಂಚಿಕೊಂಡು ಸಿನಿಪ್ರಿಯರ ಕುತೂಹಲ ಹೆಚ್ಚಿಸಿದ್ದಾರೆ.
ಸೂಪರ್ ಸ್ಟಾರ್ ಅಜಯ್ ದೇವ್ಗನ್ ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ನಲ್ಲಿ 'ಮೈದಾನ್' ಶಾರ್ಟ್ ಗ್ಲಿಂಪ್ಸ್ ಶೇರ್ ಮಾಡಿದ್ದಾರೆ. ಪೋಸ್ಟ್ಗೆ, "ಮೈದಾನಕ್ಕೆ ಬನ್ನಿ. ಭಾರತೀಯ ಫುಟ್‌ಬಾಲ್‌ನ ಸುವರ್ಣ ಯುಗದ ನೈಜ ಕಥೆಯನ್ನು ಪ್ರಸ್ತುತಪಡಿಸಲು ಸಿದ್ಧರಿದ್ದೇವೆ" ಎಂಬ ಆಕರ್ಷಕ ಕ್ಯಾಪ್ಷನ್ ಕೊಟ್ಟಿದ್ದಾರೆ.
ಮೈದಾನ್ ವಿಡಿಯೋದಲ್ಲೇನಿದೆ? ಮಕ್ಕಳು ಮಳೆಯಲ್ಲಿ, ಬರಿಗಾಲಿನಲ್ಲಿ ಫುಟ್ಬಾಲ್ ಆಡುತ್ತಿರುವ ದೃಶ್ಯದೊಂದಿಗೆ ವಿಡಿಯೋ ಪ್ರಾರಂಭವಾಗುತ್ತದೆ. ಮಕ್ಕಳು ಆಡುತ್ತಾ, ಫುಟ್ಬಾಲ್ ಅನ್ನು ರೈಲು ಹಳಿಯ ಇನ್ನೊಂದು ಬದಿಗೆ ಸಾಗಿಸಿದ್ದಾರೆ. ಆಗ ನಾಯಕ ನಟ ಅಜಯ್ ದೇವ್ಗನ್ ಅವರ ಎಂಟ್ರಿಯಾಗುತ್ತೆ. ನಟ ರೈಲು ಹಳಿಯ ಮತ್ತೊಂದು ಬದಿಯಲ್ಲಿರುತ್ತಾರೆ. ರೈಲು ಸಾಗುವ ಮುನ್ನ ಆ ಫುಟ್ಬಾಲ್ ಅನ್ನು ಒದ್ದು, ಮಕ್ಕಳಿಗೆ ತಲುಪುವಂತೆ ಮಾಡಿದ ದೃಶ್ಯದೊಂದಿಗೆ ಈ ವಿಡಿಯೋ ಪೂರ್ಣಗೊಳ್ಳುತ್ತದೆ. ಅಜಯ್ ದೇವ್ಗನ್ ಫುಟ್ಬಾಲ್ ಅನ್ನು ಹ್ಯಾಂಡಲ್ ಮಾಡಿದ ರೀತಿ ಬಹಳ ಆಕರ್ಷಕವಾಗಿದ್ದು, ಸಿನಿಮಾ ನೋಡುವ ಪ್ರೇಕ್ಷಕರ ಕುತೂಹಲವನ್ನು ಹೆಚ್ಚಿಸಿದೆ. ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಜಾಗ ಗಿಟ್ಟಿಸಿಕೊಂಡಿದೆ.
'ಮೈದಾನ್' ಶೀರ್ಷಿಕೆಯ ಸ್ಪೋರ್ಟ್ ಡ್ರಾಮಾವನ್ನು ಅಮಿತ್ ರವೀಂದ್ರನಾಥ್ ಶರ್ಮಾ ನಿರ್ದೇಶಿಸಿದ್ದಾರೆ. ಬೋನಿ ಕಪೂರ್ ಮತ್ತು ಜೆಡ್ ಸ್ಟುಡಿಯೋಸ್ ಈ ಚಿತ್ರವನ್ನು ನಿರ್ಮಿಸಿದೆ. ಈ ಚಿತ್ರ ಭಾರತೀಯ ಫುಟ್‌ಬಾಲ್‌ನ ಅತ್ಯುತ್ತಮ ದಿನಗಳನ್ನು ಮೆಲುಕು ಹಾಕಲಿದೆ. ಭಾರತೀಯ ಫುಟ್‌ಬಾಲ್‌ನ ದಿಗ್ಗಜ, ಕೋಚ್ ಸೈಯದ್ ಅಬ್ದುಲ್ ರಹೀಮ್ ಅವರ ಪಾತ್ರವನ್ನು ಅಜಯ್ ದೇವ್ಗನ್ ನಿರ್ವಹಿಸಿದ್ದಾರೆ. ಚಿತ್ರದಲ್ಲಿ ಪ್ರಿಯಾಮಣಿ, ಗಜರಾಜ್ ರಾವ್ ಮತ್ತು ಬಂಗಾಳಿ ನಟ ರುದ್ರನೀಲ್ ಘೋಷ್ ಕೂಡ ಪ್ರಮುಖ ಪಾತ್ರಗಳನ್ನು ನಿರ್ವಹಿಸಿದ್ದಾರೆ.
ಇದನ್ನೂ ಓದಿ: 'ಗೂಗ್ಲಿ' ಬೆಡಗಿ ಕೃತಿ ಖರಬಂದ ಮದುವೆ: ಸೋಷಿಲ್ ಮೀಡಿಯಾದಲ್ಲಿ ಆಮಂತ್ರಣ ಪತ್ರಿಕೆ ವೈರಲ್
ಮೈದಾನ್ ಸಿನಿಮಾದ ಕೆಲಸ 2020ರಲ್ಲೇ ಪ್ರಾರಂಭವಾಗಿತ್ತು. ಆದ್ರೆ ಹಲವು ಕಾರಣಗಳಿಂದ ಸಿನಿಮಾ ವಿಳಂಬವಾಯಿತು. 2024ರ ಈದ್ ಸಂದರ್ಭ ಸಿನಿಮಾ ತೆರೆಗಪ್ಪಳಿಸಲು ಸಜ್ಜಾಗಿದೆ. ಹಿಂದಿ, ತೆಲುಗು, ತಮಿಳು, ಮಲಯಾಳಂ ಭಾಷೆಗಳಲ್ಲಿ ಸಿನಿಮಾ ಮೂಡಿಬರಲಿದೆ. ಚಿತ್ರ ಅಕ್ಷಯ್ ಕುಮಾರ್ ಮತ್ತು ಟೈಗರ್ ಶ್ರಾಫ್ 'ಬಡೇ ಮಿಯಾನ್ ಚೋಟೆ ಮಿಯಾನ್' ಜೊತೆ ಬಾಕ್ಸ್ ಆಫೀಸ್ನಲ್ಲಿ ಪೈಪೋಟಿ ನಡೆಸಲಿದೆ.
ಇದನ್ನೂ ಓದಿ: ಜಾಹ್ನವಿ ಜನ್ಮದಿನ: ರಾಮ್ ಚರಣ್ ಜೊತೆ ಹೊಸ ಸಿನಿಮಾ- ಅಧಿಕೃತ ಘೋಷಣೆ
