ಮುಂಬೈ: ಅನಂತ್ ಮತ್ತು ರಾಧಿಕಾ ಅದ್ದೂರಿ ವಿವಾಹಕ್ಕೆ ಇನ್ನು ದಿನಗಣನೆ ಶುರುವಾಗಿದೆ. ಈಗಾಗಲೇ ಮದುವೆಯ ಸಂಪ್ರದಾಯ ಆರಂಭವಾಗಿದ್ದು, ಅದರಂತೆ ಸೋಮವಾರ ಅರಿಶಿಣ ಶಾಸ್ತ್ರ ನಡೆಸಲಾಗಿದೆ. ಈ ಸಂಭ್ರಮದಲ್ಲಿ ಬಾಲಿವುಡ್ ತಾರಾ ಮೆರಗು ಕೂಡ ಕಂಡು ಬಂದಿದೆ. ನಟ ಸಲ್ಮಾನ್ ಖಾನ್, ರಣವೀರ್ ಸಿಂಗ್, ಜಾನ್ವಿ ಕಪೂರ್, ಸಾರಾ ಆಲಿ ಖಾನ್, ಅನನ್ಯಾ ಪಾಂಡೆ ಸೇರಿದಂತೆ ಹಲವರು ಹಾಜರಿದ್ದರು.
ಈ ಅರಿಶಿಣ ಶಾಸ್ತ್ರದಲ್ಲಿ ಸಲ್ಮಾನ್ ಖಾನ್ರಿಂದ ದಕ್ಷಿಣ ನಿರ್ದೇಶಕ ಆಟ್ಲಿವರೆಗೆ ಅನೇಕ ಸೆಲೆಬ್ರಿಟಿಗಳು ಭಾಗಿಯಾಗಿದ್ದಾರೆ. ನಟ ಸಲ್ಮಾನ್ ಖಾನ್ ಕಪ್ಪು ಬಣ್ಣದ ಪಠಾನಿ ಕುರ್ತಾದಲ್ಲಿ ಮೊದಲಿಗೆ ಕಾಣಿಸಿಕೊಂಡರು ಬಳಿಕ ಅವರು ಹಳದಿ ಬಣ್ಣದ ಕುರ್ತಾದಲ್ಲಿ ಮಿಂಚಿದರು. ಇದಕ್ಕೂ ಮುನ್ನ ಪ್ಯಾಪಾರಾಜಿಗಳ ಫೋಟೋಗೆ ಕಂಡು ಬಂದರು. ಸದ್ಯ ನಟ ಸಲ್ಮಾನ್ ಖಾನ್ ಎಆರ್ ಮುರುಗದಾಸ್ ನಿರ್ದೇಶನ ಸಿಂಕಂದರ್ ಚಿತ್ರದಲ್ಲಿ ನಟಿಸುತ್ತಿದ್ದಾರೆ.
ನಟ ರಣವೀರ್ ಸಿಂಗ್ ಕೂಡ ಅರಿಶಿಣ ಶಾಸ್ತ್ರದಲ್ಲಿ ಭಾಗಿಯಾಗಿದ್ದರು. ಎಂದಿನಂತೆ ಸ್ಟೈಲೀಶ್ ಅವತಾರದಲ್ಲಿ ಕಂಡ ಅವರು, ಹಳದಿ ಕುರ್ತಾಗೆ ಪಲಾಜೊ ಪ್ಯಾಂಟ್ ಧರಿಸಿದ್ದರು. ನಟಿ ಜನ್ವಾ ಕಪೂರ್ ಕೂಡ ಹಳದಿ ಬಣ್ಣದ ಸೀರೆಯಲ್ಲಿ ಕಂಡರು. ಈ ವೇಳೆ ಅವರು ಆಪ್ತ ಗೆಳೆಯ ಶಿಖರ್ ಪಹರಿಯ ಮತ್ತು ಅವರ ಸಹೋದರ ವೀರ್ ಪಹರಿಯ ಕಾಣಿಸಿಕೊಂಡರು. ಜಾನ್ವಿ ಸಮಕಾಲೀನ ನಟಿಯರಾದ ಸಾರಾ ಆಲಿ ಖಾನ್ ಮತ್ತು ಅನನ್ಯಾ ಪಾಂಡೆ ಕೂಡ ಕಾರ್ಯಕ್ರಮದಲ್ಲಿ ಹಾಜರಾದರು. ನಟಿ ಸಾರಾ ಲೆಹಾಂಗಾದಲ್ಲಿ ಕಂಡರೆ, ನಟಿ ಅನನ್ಯಾ ತಿಳಿ ಗುಲಾಬಿ ಬಣ್ಣದ ಗೌನ್ ತೊಟ್ಟು ಫೋಟೋಗೆ ಫೋಸ್ ನೀಡಿದರು.
ಇವರ ಹೊರತಾಗಿ ನಟಿ ಮಾನುಷಿ ಚಿಲ್ಲರ್, ರಾಹುಲ್ ವೈದ್ಯ, ದಿಶಾ ಪರ್ಮಾರ್, ಒರಿ, ನಿರ್ದೇಶಕ ಆಟ್ಲಿ, ಮುಖೇಶ್ ಅಂಬಾನಿ ಸಹೋದರ ಅನಿಲ್ ಅಂಬಾನಿ ಮತ್ತು ಟೀನಾ ಅಂಬಾನಿ ಕೂಡ ಗಮನ ಸೆಳೆದರು. ಇದಕ್ಕೂ ಹಿಂದಿನ ದಿನ ಅನಂತ್ ಅಂಬಾನಿ ಮತ್ತು ರಾಧಿಕ ಮರ್ಚೆಂಟ್ ಗೃಹ ಶಾಂತಿ ಪೂಜಾ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು. ಈ ಸಮಾರಂಭದಲ್ಲಿ ಸಂಪ್ರದಾಯಿಕ ಉಡುಗೆಯಲ್ಲಿ ರಾಧಿಕಾ ಕಂಡಿದ್ದರು. ಇವರ ವಿವಾಹ ಜುಲೈ 12 ರಂದು ನಡೆಯಲಿದೆ. ಮುಂಬೈನ ಬಾಂದ್ರಾ ಕುರ್ಲಾ ಕಾಂಪ್ಲೆಕ್ಸ್‌ನಲ್ಲಿರುವ ಜಿಯೋ ವರ್ಲ್ಡ್ ಕನ್ವೆನ್ಷನ್ ಸೆಂಟರ್ ಇದಕ್ಕೆ ವೇದಿಕೆಯಾಗಲಿದೆ.
ಇದನ್ನೂ ಓದಿ: ಅನಂತ್ ಅಂಬಾನಿ - ರಾಧಿಕಾ ಮರ್ಚೆಂಟ್ ಸಂಗೀತ್ಲ್ಲಿ ಪಾಪ್ಸ್ಟಾರ್ ಜಸ್ಟೀನ್ ಬೀಬರ್ ಅದ್ಭುತ ಪ್ರದರ್ಶನ
