ನವದೆಹಲಿ : ದೊಡ್ಡ ಪ್ರಮಾಣದ ಡಿಸ್ಕೌಂಟ್ಗಳನ್ನು ನೀಡುವ ಮೂಲಕ ಇ-ಕಾಮರ್ಸ್ ಕ್ಷೇತ್ರವು ಸಣ್ಣ ರಿಟೇಲರ್ಗಳ ಮಾರುಕಟ್ಟೆಯನ್ನು ನುಂಗಿ ಹಾಕುತ್ತಿದೆ ಎಂದು ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಪಿಯೂಷ್ ಗೋಯಲ್ ಕಳವಳ ವ್ಯಕ್ತಪಡಿಸಿದ್ದಾರೆ. ಇ-ಕಾಮರ್ಸ್ ಕಂಪನಿಗಳು ಮಾರುಕಟ್ಟೆಯನ್ನು ಲೂಟಿ ಮಾಡುವ ರೀತಿಯ ಬೆಲೆಯಲ್ಲಿ ವ್ಯವಹಾರ ಮಾಡುತ್ತಿವೆ ಮತ್ತು ಸಣ್ಣ ಚಿಲ್ಲರೆ ವ್ಯಾಪಾರಿಗಳಿಗೆ ಸಮಾನ ಅವಕಾಶವನ್ನು ನೀಡುತ್ತಿಲ್ಲ ಎಂದು ಗೋಯಲ್ ಆರೋಪಿಸಿದರು.
'ಭಾರತದಲ್ಲಿ ಉದ್ಯೋಗ ಮತ್ತು ಗ್ರಾಹಕ ಹಿತಾಸಕ್ತಿಯ ಮೇಲೆ ಇ-ಕಾಮರ್ಸ್ನ ಒಟ್ಟಾರೆ ಪರಿಣಾಮ' (Net Impact of E-Commerce on Employment and Consumer Welfare in India) ಕುರಿತಾದ ವರದಿ ಬಿಡುಗಡೆ ಸಮಾರಂಭದಲ್ಲಿ ಅವರು ಮಾತನಾಡಿದರು.
"ಇ-ಕಾಮರ್ಸ್ ವಲಯ ಹೇಗೆ ಕೆಲಸ ಮಾಡುತ್ತದೆ ಎಂಬುದನ್ನು ನಾವು ಯಾವತ್ತಾದರೂ ಯೋಚಿಸಿದ್ದೆವೆಯೇ? ಅವರು ತುಂಬಾ ಸರಕುಗಳನ್ನು ತುಂಬಾ ಅಗ್ಗವಾಗಿ ಮಾರುತ್ತಿದ್ದಾರೆ. ನಾನು ಅಂಗಡಿಯೊಂದಕ್ಕೆ ಹೋಗಿ ಫೈವ್ ಸ್ಟಾರ್ ಚಾಕೊಲೇಟ್ ಅಥವಾ ಯಾವುದೋ ಒಂದು ಚಾಕೊಲೇಟ್ ಬಾಕ್ಸ್ ಖರೀದಿಸಿದರೆ, ನಾನು 500 ರೂಪಾಯಿ ವೆಚ್ಚ ಮಾಡಬೇಕಾಗುತ್ತದೆ ಅಂದುಕೊಳ್ಳೋಣ. ಆದರೆ ಅದೇ ಸರಕನ್ನು ಇ-ಕಾಮರ್ಸ್ ಕೇವಲ 350 ರೂಪಾಯಿಗೆ ನನ್ನ ಮನೆಗೇ ತಲುಪಿಸುತ್ತದೆ. ಆ ಸರಕು ಬಹಳ ದೊಡ್ಡ ಮಾರ್ಜಿನ್ ಹೊಂದಿರುವುದೇ ಇದಕ್ಕೆ ಕಾರಣವಾಗಿದೆ. ಇ-ಕಾಮರ್ಸ್ ಹೆಚ್ಚಿನ ಮೌಲ್ಯದ, ಹೆಚ್ಚಿನ ಮಾರ್ಜಿನ್ ಹೊಂದಿದ ಉತ್ಪನ್ನಗಳಿಂದ ಲಾಭ ಮಾಡಿಕೊಳ್ಳುವ ಮೂಲಕ ಸಣ್ಣ ಚಿಲ್ಲರೆ ವ್ಯಾಪಾರಿಗಳನ್ನು ವ್ಯಾಪಾರವನ್ನು ದೋಚುತ್ತಿದೆ." ಎಂದು ಗೋಯಲ್ ಹೇಳಿದರು.
"ಇ-ಕಾಮರ್ಸ್ನ ಈ ಬೃಹತ್ ಬೆಳವಣಿಗೆಯಿಂದ ಸಾಮಾಜಿಕವಾಗಿ ಸಮಸ್ಯೆಗಳು ಎದುರಾಗಬಹುದಾ? ಇಂದಿನಿಂದ ಹತ್ತು ವರ್ಷಗಳ ನಂತರ ನಮ್ಮ ಮಾರುಕಟ್ಟೆಯ ಅರ್ಧದಷ್ಟು ಇ-ಕಾಮರ್ಸ್ ಜಾಲಕ್ಕೆ ಸೇರಿಕೊಳ್ಳುವುದು ಹೆಮ್ಮೆಯ ವಿಷಯವೆಂದು ನಾನು ಭಾವಿಸುವುದಿಲ್ಲ. ಹಾಗಂತ ಇ-ಕಾಮರ್ಸ್ ಕ್ಷೇತ್ರದ ಮಹತ್ವವನ್ನು ನಾನು ನಿರಾಕರಿಸುತ್ತಿಲ್ಲ" ಎಂದು ಸಚಿವರು ನುಡಿದರು.
ಈ ವಲಯವನ್ನು ಹೆಚ್ಚು ಸಂಘಟಿತವಾಗಿಸುವ ಅಗತ್ಯವನ್ನು ಅವರು ಒತ್ತಿಹೇಳಿದರು. ಇ-ಕಾಮರ್ಸ್ ಕಂಪನಿಗಳು ಅಳವಡಿಸಿಕೊಳ್ಳುತ್ತಿರುವ ಲೂಟಿಕೋರ ಬೆಲೆಯ ಬಗ್ಗೆ ಅವರು ಉಲ್ಲೇಖಿಸಿದರು. ಇ-ಕಾಮರ್ಸ್ ಪ್ಲಾಟ್ ಫಾರ್ಮ್ಗಳ ಲೂಟಿಕೋರ ಬೆಲೆಯನ್ನು ಪ್ರಸ್ತಾಪಿಸಿದ ಸಚಿವರು, "ನೀವು ಒಂದು ವರ್ಷದಲ್ಲಿ ಆರು ಸಾವಿರ ಕೋಟಿ ನಷ್ಟ ಅನುಭವಿಸುತ್ತೀರಿ ಎಂದಾದರೆ ಅದು ಪರಭಕ್ಷಕ ಬೆಲೆಯ ಲಕ್ಷಣವಲ್ಲವೇ" ಎಂದು ಪ್ರಶ್ನಿಸಿದರು.
"ಭಾರತದಲ್ಲಿ ಒಂದು ಬಿಲಿಯನ್ ಡಾಲರ್ ಹೂಡಿಕೆ ಮಾಡುವುದಾಗಿ ಅಮೆಜಾನ್ ಹೇಳಿದಾಗ ನಾವೆಲ್ಲರೂ ಸಂಭ್ರಮ ಪಡುತ್ತೇವೆ. ಆದರೆ ಈ ಬಿಲಿಯನ್ ಡಾಲರ್ ಹೂಡಿಕೆಯು ಭಾರತದ ಆರ್ಥಿಕತೆಗೆ ಯಾವುದೋ ದೊಡ್ಡ ಸಹಾಯ ಮಾಡಲು ಬರುತ್ತಿಲ್ಲ ಎಂಬ ವಿಷಯವನ್ನು ನಾವು ಮರೆಯುತ್ತೇವೆ" ಎಂದು ಅವರು ಹೇಳಿದರು.
"ಅಮೆಜಾನ್ ಆ ವರ್ಷ ಬಿಲಿಯನ್ ಡಾಲರ್ನಷ್ಟು ನಷ್ಟ ಅನುಭವಿಸಿದೆ ಹಾಗೂ ಅದು ಆ ನಷ್ಟವನ್ನು ತುಂಬಿಸಿಕೊಳ್ಳಬೇಕಿತ್ತು. ಕಂಪನಿಯು 6000 ಕೋಟಿ ರೂಪಾಯಿ ನಷ್ಟ ಅನುಭವಿಸುತ್ತದೆ ಎಂದಾದರೆ ಅದು ಅತಾರ್ಕಿಕ ಬೆಲೆಗಳಿಂದಾಗಿಯೇ ಎಂದು ನಿಮಗೆ ಅನಿಸುವುದಿಲ್ಲವೇ? ಅದೊಂದು ಇ-ಕಾಮರ್ಸ್ ಪ್ಲಾಟ್ಫಾರ್ಮ್ ಆಗಿದೆ. ಕಾನೂನುಬದ್ಧವಾಗಿ ಬಿ 2 ಸಿ ವಹಿವಾಟು ನಡೆಸಲು ಅವರು ಅನುಮತಿಯನ್ನು ಹೊಂದಿಲ್ಲ. ಆದಾಗ್ಯೂ, ವಾಸ್ತವವೆಂದರೆ ನೀವೆಲ್ಲರೂ ಈ ಪ್ಲಾಟ್ ಫಾರ್ಮ್ ಗಳಲ್ಲಿ ಖರೀದಿಸುತ್ತೀರಿ. ಅವರು ಅದನ್ನು ಹೇಗೆ ನಿರ್ವಹಿಸುತ್ತಿದ್ದಾರೆ? ಇದು ನಮಗೆ ಕಳವಳದ ವಿಷಯವಲ್ಲವೇ?" ಎಂದು ಸಚಿವರು ಪ್ರಶ್ನಿಸಿದರು.
ದೊಡ್ಡ ಇ-ಕಾಮರ್ಸ್ ಕಂಪನಿಗಳ ಲೂಟಿಕೋರ ಬೆಲೆ ಮತ್ತು ಭಾರಿ ರಿಯಾಯಿತಿಗಳು ಭಾರತದ 100 ಮಿಲಿಯನ್ ಸಣ್ಣ ಚಿಲ್ಲರೆ ವ್ಯಾಪಾರಿಗಳ ವ್ಯವಹಾರಗಳಲ್ಲಿ ಅಡಚಣೆಯನ್ನು ಸೃಷ್ಟಿಸುತ್ತವೆ ಮತ್ತು ಸರ್ಕಾರವು ಅದರ ಬಗ್ಗೆ ಕಾಳಜಿ ವಹಿಸಲಿದೆ ಎಂದು ಸಚಿವರು ಹೇಳಿದರು.
ಇದನ್ನೂ ಓದಿ : ಪೂರ್ಣ ಸಾಮರ್ಥ್ಯದಲ್ಲಿ ಕೆಲಸ ಮಾಡಲಾರಂಭಿಸಿದ KAPS-4 ಪರಮಾಣು ವಿದ್ಯುತ್ ಘಟಕ - Nuclear Power Plant
