ನವದೆಹಲಿ: ಉತ್ತರ ಪ್ರದೇಶ ಮತ್ತು ರಾಜಸ್ಥಾನದ ಬಳಿಕ ಗುಜರಾತ್ನಲ್ಲೂ ರೈಲು ಹಳಿ ತಪ್ಪಿಸುವ ಪ್ರಯತ್ನವೊಂದು ನಡೆದಿದ್ದು, ಅದೃಷ್ಟವಶಾತ್ ಇದು ವಿಫಲವಾಗಿದೆ. ಗುಜರಾತ್ನ ಸೂರತ್ನಲ್ಲಿ ಹಳಿಗಳ ಮೇಲಿನ ಫಿಶ್ ಪ್ಲೇಟ್ ಮತ್ತು ಕೀಗಳನ್ನು ಕಿತ್ತು ಹಾಕಿ ರೈಲು ಅಪಘಾತಕ್ಕೆ ಸಂಚು ರೂಪಿಸುವ ಪ್ರಕರಣ ಬೆಳಕಿಗೆ ಬಂದಿದೆ.
ಸೂರತ್ನ ಕಿಮ್ ಜಂಕ್ಷನ್ ರೈಲು ನಿಲ್ದಾಣದ ಬಳಿ ಶನಿವಾರ ಮುಂಜಾನೆ ಈ ಪ್ರಕರಣ ಬೆಳಕಿಗೆ ಬಂದಿದೆ. ಬೆಳಗ್ಗೆ 5ಗಂಟೆ ಸುಮಾರಿಗೆ ಟ್ರ್ಯಾಕ್ ಮ್ಯಾನ್ ಹಳಿ ಪರಿಶೀಲಿಸುವಾಗ, ಈ ದುಷ್ಕೃತ್ಯ ಬಯಲಾಗಿದೆ.
ತಕ್ಷಣಕ್ಕೆ ಈ ಕುರಿತು ಸ್ಟೇಷನ್ ಮಾಸ್ಟರ್ ಮತ್ತು ರೈಲ್ವೆ ಸುರಕ್ಷಾ ದಳ (ಆರ್ಪಿಎಫ್)ಗೆ ಸುದ್ದಿ ತಲುಪಿಸಲಾಗಿದೆ. ರೈಲುಗಳ ಸೇವೆಯಲ್ಲಿ ಯಾವುದೇ ರೀತಿ ವ್ಯತ್ಯಯವಾಗದಂತೆ ತಕ್ಷಣಕ್ಕೆ ಇದರ ದುರಸ್ತಿ ಕಾರ್ಯ ಮಾಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಇತ್ತೀಚಿನ ದಿನದಲ್ಲಿ ರೈಲು ಹಳಿ ತಪ್ಪಿಸುವ ಪ್ರಕರಣಗಳು ವರದಿಯಾಗುತ್ತಿರುವ ಬೆನ್ನಲ್ಲೇ ಅದೇ ರೀತಿ ದೃಷ್ಕೃತ್ಯದ ಯತ್ನ ನಡೆಸಲಾಗಿದೆ.
ಸೆಪ್ಟೆಂಬರ್ 10ರಂದು ರಾಜಸ್ಥಾನದ ಅಜ್ಮೇರ್‌ನಲ್ಲಿ ಸರಧಾನ ಮತ್ತು ಬಂಗಧ್ ನಡುವಿನ ರೈಲ್ವೆ ಹಳಿಗಳ ಮೇಲೆ 100 ಕೆಜಿ ತೂಕದ ಎರಡು ಸಿಮೆಂಟ್ ಬ್ಲಾಕ್ ಇರಿಸಲಾಗಿತ್ತು. ಈ ಸಿಮೆಂಟ್ ಬ್ಲಾಕ್ಗೆ ಗೂಡ್ಸ್ ರೈಲು ಡಿಕ್ಕಿ ಹೊಡೆದಿದ್ದು, ಅದೃಷ್ಟವಶಾತ್ ಭಾರೀ ಪ್ರಮಾದ ತಪ್ಪಿತ್ತು.
ಇದಕ್ಕೆ ಮುನ್ನದಿನ ಉತ್ತರ ಪ್ರದೇಶದ ಭಿವಾನಿ-ಪ್ರಯಾಗ್ರಾಜ್ ಮಾರ್ಗದ ಕಾಳಿಂದಿ ಎಕ್ಸ್ಪ್ರೆಸ್ ರೈಲನ್ನು ಹಳಿ ತಪ್ಪಿಸಲು ಕಾನ್ಪುರದಲ್ಲಿ ದುಷ್ಕರ್ಮಿಗಳು ಎಲ್ಪಿಜಿ ಸಿಲಿಂಡರ್ ಜೊತೆಗೆ ಪೆಟ್ರೋಲ್ ಮತ್ತು ಬೆಂಕಿಪೊಟ್ಟಣವನ್ನು ಟ್ರ್ಯಾಕ್ ಮೇಲೆ ಎಸೆದಿದ್ದರು. ಇದನ್ನು ಗಮನಿಸಿದ ಲೋಕೋ ಪೈಲಟ್ ತುರ್ತು ಬ್ರೇಕ್ ಹಾಕಿ ರೈಲು ನಿಲ್ಲಿಸಿ, ಸಂಭಾವ್ಯ ಅನಾಹುತವನ್ನು ತಪ್ಪಿಸಿದ್ದರು.
ಇತ್ತೀಚಿನ ತಿಂಗಳಲ್ಲಿ ದೇಶದ ವಿವಿಧ ಮೂಲೆಗಳಲ್ಲಿ ಈ ರೀತಿ ರೈಲು ಹಳಿ ತಪ್ಪಿಸುವ ಅನೇಕ ಪ್ರಯತ್ನಗಳು ಬೆಳಕಿಗೆ ಬಂದಿದೆ. ಆಗಸ್ಟ್ 27ರಂದು ಉಧ್ನಾ ರೈಲ್ವೆ ಯಾರ್ಡ್‌ನಲ್ಲಿ ನಾಲ್ಕು ಬೋಗಿಗಳು ಹಳಿತಪ್ಪಿದವು. ಇದಕ್ಕೆ ಮೊದಲು ಆಗಸ್ಟ್ 17ರಂದು ಉತ್ತರ ಪ್ರದೇಶದ ಕಾನ್ಪುರ ರೈಲು ನಿಲ್ದಾಣದ ಬಳಿ ರೈಲು ಬಂಡೆಗೆ ಬಡಿದ ನಂತರ ಸಬರಮತಿ ಎಕ್ಸ್‌ಪ್ರೆಸ್‌ನ ಕನಿಷ್ಠ 20 ಬೋಗಿಗಳು ಹಳಿತಪ್ಪಿದ್ದವು. ಈ ಘಟನೆಗಳು ದೇಶಾದ್ಯಂತ ರೈಲು ಕಾರ್ಯಾಚರಣೆಗಳ ಸುರಕ್ಷತೆಯ ಕುರಿತು ಹೆಚ್ಚಿನ ಮುನ್ನೆಚ್ಚರಿಕೆ ವಹಿಸುವ ಕುರಿತು ಸೂಚಿಸಲಾಗಿತ್ತು.
ಇನ್ನು ಈ ಎಲ್ಲಾ ಘಟನೆ ಕುರಿತು ಮಾತನಾಡಿರುವ ರೈಲ್ವೆ ಅಧಿಕಾರಿಗಳು, ಈ ಸಂಬಂಧ ತನಿಖೆ ನಡೆಸಲಾಗುವುದು. ಭಾರತೀಯ ರೈಲ್ವೆಯನ್ನು ಹಾನಿ ಮಾಡುವ ಪ್ರಯತ್ನಗಳನ್ನು ತಡೆಯಲಾಗುವುದು ಎಂದಿದ್ದಾರೆ. (ಐಎಎನ್ಎಸ್)
ಇದನ್ನೂ ಓದಿ: ಹಳಿ ಮೇಲೆ 70 ಕೆ.ಜಿ ತೂಕದ 2 ಸಿಮೆಂಟ್ ಬ್ಲಾಕ್ ಇಟ್ಟು ರೈಲು ದುರಂತಕ್ಕೆ ಮತ್ತೊಂದು ಸಂಚು!
