ಎಸ್.ಕೆ.ಭಗವಾನ್‌ ಅಂತಿಮ ದರ್ಶನ ಪಡೆದ ಶಿವರಾಜ್​ ಕುಮಾರ್​, ಸುಧಾರಾಣಿ

ಕನ್ನಡ ಚಿತ್ರರಂಗಕ್ಕೆ ಹಲವು ಸೂಪರ್ ಹಿಟ್ ಸಿನಿಮಾಗಳನ್ನು ನೀಡಿರುವ ಖ್ಯಾತ ನಿರ್ದೇಶಕ ಎಸ್.ಕೆ.ಭಗವಾನ್‌ ಇಂದು ನಿಧನರಾಗಿದ್ದಾರೆ. ಸ್ಯಾಂಡಲ್​ವುಡ್​ನಲ್ಲಿ ಬಾಂಡ್‌ ಶೈಲಿಯ ಸಿನಿಮಾಗಳು, ಕಾದಂಬರಿ ಆಧಾರಿತ ಚಿತ್ರಗಳನ್ನು ನಿರ್ದೇಶನ ಮಾಡಿದ ಖ್ಯಾತಿಯ ಭಗವಾನ್, ಕಳೆದ ಹಲವು ತಿಂಗಳಿಂದ ವಯೋಸಹಜ ಖಾಯಿಲೆಯಿಂದ ಬಳಲುತ್ತಿದ್ದರು. ಭಗವಾನ್ ಅವರ ಮೃತದೇಹದ ಅಂತಿಮ ದರ್ಶನವನ್ನು ನಟ ಶಿವರಾಜ್​ ಕುಮಾರ್​, ನಟಿ ಸುಧಾರಾಣಿ ಸೇರಿದಂತೆ ಚಿತ್ರರಂಗದ ಅನೇಕ ನಟ ನಟಿಯರು ಪಡೆದು ಸಂತಾಪ ಸೂಚಿಸಿದರು.  

ಮಾಧ್ಯಮಗಳೊಂದಿಗೆ ಮಾತನಾಡಿದ ನಟಿ ಸುಧಾರಾಣಿ, "ಎಸ್.ಕೆ.ಭಗವಾನ್‌ ಅವರನ್ನು ಕಳೆದುಕೊಂಡು ಕನ್ನಡ ಚಿತ್ರರಂಗ ಬಡವಾಗಿದೆ. ಅವರ​ ಕೈ ಕೆಳಗೆ ಕೆಲಸ ಮಾಡಿ ತುಂಬಾ ವಿಷಯಗಳನ್ನು ಕಲಿತುಕೊಂಡೆ. ಆತ್ಮಕ್ಕೆ ಶಾಂತಿ ಸಿಗಲಿ" ಎಂದರು. ಬಳಿಕ ಮಾತನಾಡಿದ ಶಿವರಾಜ್​ ಕುಮಾರ್​, "ಭಗವಾನ್‌ ಸರ್​ ಅವರನ್ನು ಕಳೆದುಕೊಂಡ ನೋವಿದೆ, ಅವರು ನಮ್ಮನ್ನು ಚಿಕ್ಕ ವಯಸ್ಸಿನಿಂದ ನೋಡಿದ್ದಾರೆ. ನಮಗೆ ಇನ್ನೊಬ್ಬ ತಂದೆ ಎಂದರೂ ತಪ್ಪಾಗುವುದಿಲ್ಲ" ಎಂದರು.  

ಇದನ್ನೂ ಓದಿ: ಡಾ. ರಾಜ್​ಕುಮಾರ್​ಗೆ ಅತಿ ಹೆಚ್ಚು ಸಿನಿಮಾ ನಿರ್ದೇಶನ ಮಾಡಿದ ಭಗವಾನ್​ ಇನ್ನಿಲ್ಲ