ಶಿರಸಿ : ನೆರೆಗೆ ತತ್ತರಿಸಿದ ಜನ ಚೇತರಿಸಿಕೊಳ್ಳುವ ಮೊದಲೇ ಗಣೇಶ ಚೌತಿ ಬಂದು ಬಿಟ್ಟಿದೆ. ಆದ್ರೆ ಅತಿಯಾದ ಮಳೆಗೆ ತರಕಾರಿ ಬೆಳೆ ನಾಶವಾಗಿದ್ದು, ಹಬ್ಬಕ್ಕೆ ದರ ಏರಿಕೆ ಬಿಸಿ ತಟ್ಟಿದೆ.
ಉತ್ತರ ಕನ್ನಡ ಜಿಲ್ಲೆ ಸೇರಿದಂತೆ ಅಕ್ಕ ಪಕ್ಕದ ಬೆಳಗಾವಿ, ಹಾವೇರಿ, ಧಾರವಾಡ ಜಿಲ್ಲೆಗಳಲ್ಲಿ ಭಾರೀ ಮಳೆ ಸುರಿದು ಬೆಳೆಗಳು ನಾಶವಾಗಿವೆ. ಮುಖ್ಯವಾಗಿ ಬೆಳಗಾವಿಯಲ್ಲಿ ಬಂದ ನೆರೆಗೆ ಭಾರೀ ಹಾನಿ ಆಗಿದ್ದು, ಶಿರಸಿ ಮಾರುಕಟ್ಟೆಗೆ ಬರುತ್ತಿದ್ದ ಹೂವು, ತರಕಾರಿ ಪ್ರಮಾಣದಲ್ಲಿ ಭಾರೀ ಇಳಿಕೆ ಆಗಿದ್ದು, ಬೆಲೆ ಮಾತ್ರ ಗಗನಕ್ಕೇರಿದೆ.
ಮಾರು ಹೂವಿಗೆ 80 ರೂ ಇದ್ದ ಸೇವಂತಿಗೆ 120 ರೂ. 10 ರೂ ಇದ್ದ ಗುಲಾಬಿ 15 ರೂ. ಆಗಿದೆ. ಕೆ.ಜಿ ಮೆಣಸು 50, ಟೊಮೆಟೊ 60 ರೂ ಆಗಿದೆ. ಇದರಿಂದ ಗ್ರಾಹಕರ ಜೇಬಿಗೆ ಕತ್ತರಿ ಬೀಳುವಂತಾಗಿದೆ. ಇನ್ನು ಮಾರುಕಟ್ಟೆ ದರ ಏರಿಕೆ ಪರಿಣಾಮ ವ್ಯಾಪಾರಸ್ತರ ಮೇಲೂ ಆಗಿದೆ. ಹೆಚ್ಚು ಹಣ ಕೊಟ್ಟು ಖರೀದಿಸಿದ ಮಾಲು ಜಿಟಿ, ಜಿಟಿ ಸುರಿಯುತ್ತಿರುವ ಮಳೆಗೆ ಹಾಳಾಗುತ್ತಿದೆ.
ಇನ್ನು ದರ ಏರಿಕೆಯಿಂದಾಗಿ ವ್ಯಾಪಾರವೂ ಕಡಿಮೆ ಆಗಿದೆ ಅನ್ನೋದು ಮಾರಾಟಗಾರರ ಅಭಿಪ್ರಾಯವಾಗಿದೆ.
