ಶಿರಸಿ (ಉತ್ತರ ಕನ್ನಡ) : ಕೋವಿಡ್ ಲಾಕ್ಡೌನ್ನಿಂದಾಗಿ ಬಂದ್ ಆಗಿದ್ದ ಪ್ರವಾಸೋದ್ಯಮ ಕ್ಷೇತ್ರ ಮತ್ತೆ ಸುಸ್ಥಿತಿಯತ್ತ ಮರಳುತ್ತಿದೆ. ಅದರಲ್ಲೂ ಪ್ರವಾಸೋದ್ಯವನ್ನೇ ನೆಚ್ಚಿರುವ ಉತ್ತರಕನ್ನಡ ಜಿಲ್ಲೆಯಲ್ಲಿ ಬಂದ್ ಆಗಿದ್ದ ರೆಸಾರ್ಟ್-ಹೋಮ್‌ಸ್ಟೇಗಳು ಪ್ರವಾಸಿಗರನ್ನು ಮತ್ತೆ ಕೈಬೀಸಿ ಕರೆಯುತ್ತಿವೆ. ಪ್ರವಾಸಿಗರು ಕೂಡ ಪ್ರವಾಸಿ ತಾಣಗಳತ್ತ ಬರುತ್ತಿದ್ದಾರೆ.
ಇದೀಗ ದಾಂಡೇಲಿ ಕಾನನದಲ್ಲಿನ ಬಹುತೇಕ ರೆಸಾರ್ಟ್ಗಳು ಪ್ರವಾಸಿಗರಿಂದ ತುಂಬಿದ್ದು, ಜನರು ಮತ್ತೆ ಪ್ರಕೃತಿಯ ಸವಿ ಸವಿಯೋದಕ್ಕೆ ಮುಂದಾಗಿದ್ದಾರೆ. ಕೋವಿಡ್ ಕಾರಣದಿಂದ ಸಾಕಷ್ಟು ದಿನದಿಂದ ಮನೆಯಲ್ಲೇ ಕುಳಿತಿದ್ದ ಜನತೆ, ತುಸು ವಿರಾಮಕ್ಕಾಗಿ ಪ್ರವಾಸಿ ತಾಣಗಳತ್ತ ಮುಖ ಮಾಡಿದ್ದಾರೆ.
ಈಗಾಗಲೇ ದಾಂಡೇಲಿ, ಹಳಿಯಾಳ ಜೋಯ್ಡಾ ತಾಲೂಕುಗಳ ಬಹುತೇಕ ರೆಸಾರ್ಟ್ಗಳು ಪ್ರವಾಸಿಗರನ್ನು ಸೆಳೆಯುತ್ತಿವೆ. ದೋಣಿ ವಿಹಾರಕ್ಕೂ ಅವರದ್ದೇ ಫ್ಯಾಮಿಲಿ ಇದ್ದರೆ ಮಾತ್ರವೇ ಅವಕಾಶ ಕಲ್ಪಿಸಿ ಕೊಡುತ್ತಿದ್ದಾರೆ. ಈ ಮೂಲಕ ಕೋವಿಡ್ ನಿಯಾಮವಳಿಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಲಾಗುತ್ತಿದೆ.
ಕೊರೊನಾ ಬಳಿಕ ಮತ್ತೆ ಪ್ರವಾಸೋದ್ಯಮ ಪ್ರವಾಸಿಗರಿಗೆ ಮುಕ್ತವಾಗಿದೆ. ಕೆಲ ಪ್ರವಾಸಿ ತಾಣಗಳು ಜನರ ಆಗಮನದಿಂದ ಮತ್ತೆ ಜೀವ ಕಳೆ ಪಡೆದುಕೊಂಡಿವೆ.
