ಪೂಜೆಯ ಹಕ್ಕಿಗಾಗಿ ಗಲಾಟೆ; ದೇಗುಲಕ್ಕೆ ಬೀಗ ಜಡಿದು ಕಾಣೆಯಾದ ಓರ್ವ ಅರ್ಚಕ

ತುಮಕೂರಿನ ಕೊರಟಗೆರೆ ತಾಲೂಕು ಕುರಂಕೋಟೆ ಗ್ರಾಮದಲ್ಲಿ ದೇವರ ಪೂಜೆಯ ಹಕ್ಕು ಪಡೆಯುವ ವಿಚಾರದಲ್ಲಿ ಇಬ್ಬರು ಅರ್ಚಕರ ನಡುವೆ ಗಲಾಟೆ ನಡೆದಿದೆ. ಒಬ್ಬರು ದೇವಸ್ಥಾನಕ್ಕೆ ಬೀಗ ಜಡಿದು ಪರಾರಿಯಾಗಿದ್ದಾರೆ.

ತುಮಕೂರು: ದೇವರ ಪೂಜೆಯ ಹಕ್ಕು ತನಗೆ ಬೇಕು ಎಂದು ಇಬ್ಬರು ಅರ್ಚಕರು ಗಲಾಟೆ ಮಾಡಿಕೊಂಡಿದ್ದು ಓರ್ವ ಅರ್ಚಕ ದೇಗುಲಕ್ಕೆ ಬೀಗ ಹಾಕಿ ಕಾಣೆಯಾಗಿದ್ದಾರೆ. ಈ ಘಟನೆ ಕೊರಟಗೆರೆ ತಾಲೂಕು ಕುರಂಕೋಟೆ ಗ್ರಾಮದಲ್ಲಿ ನಡೆದಿದೆ. ದೊಡ್ಡಕಾಯಪ್ಪ ಸ್ವಾಮಿಯ ಗರ್ಭಗುಡಿ ಮತ್ತು ದೇವಾಲಯಕ್ಕೆ ಬೀಗ ಹಾಕಲಾಗಿದೆ. ದೇವಸ್ಥಾನಕ್ಕೆ ಬೀಗ ಜಡಿದಿರುವ ಅರ್ಚಕ ಶ್ರೀನಿವಾಸ್‌ ಮೂರ್ತಿ ಕಾಣೆಯಾಗಿದ್ದಾರೆ. ಒಂದು ವರ್ಷದ ಅವಧಿಗೆ ಶ್ರೀನಿವಾಸ್ ಮೂರ್ತಿಗೆ ಪೂಜೆ ಸಲ್ಲಿಸಲು ಅವಕಾಶ ನೀಡಲಾಗಿತ್ತು ಎಂದು ತಿಳಿದುಬಂದಿದೆ.

ತಹಶೀಲ್ದಾರ್, ಪೊಲೀಸರಿಗೆ ದೂರು: ಕಳೆದ ಶನಿವಾರ ಶ್ರೀನಿವಾಸ್ ಮೂರ್ತಿ ಅವರ ಪೂಜೆ ಅವಧಿ ಮುಗಿದಿದೆ. ಮತ್ತೋರ್ವ ಅರ್ಚಕರಾದ ವೆಂಕಟೇಶ್ ಅವರಿಗೆ ಅಧಿಕಾರ ಹಸ್ತಾಂತರವಾಗಬೇಕಿತ್ತು. ಶ್ರೀನಿವಾಸ್ ಮೂರ್ತಿ ಅಧಿಕಾರ ಹಸ್ತಾಂತರ ಮಾಡಬೇಕಿತ್ತು. ಆದರೆ ಇವರು ದೇಗುಲಕ್ಕೆ ಬೀಗ ಜಡಿದು ಪರಾರಿಯಾಗಿದ್ದಾರೆ. ದೊಡ್ಡಕಾಯಪ್ಪ ಸೇವಾ ಸಮಿತಿ ಮತ್ತು ಗ್ರಾಮಸ್ಥರು ತಹಶೀಲ್ದಾರ್ ಮತ್ತು ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.

ತಹಶೀಲ್ದಾರ್ ಹಾಗೂ ಮುಜರಾಯಿ ಇಲಾಖೆಯ ಅಧಿಕಾರಿಗಳು ಗ್ರಾಮಕ್ಕೆ ಭೇಟಿ ನೀಡಿ ಗ್ರಾಮಸ್ಥರೊಂದಿಗೆ ಸಭೆ ನಡೆಸಿದ್ದಾರೆ. ದೊಡ್ಡಕಾಯಪ್ಪ ಸ್ವಾಮಿಯ ದರ್ಶನ ಸಿಗದೇ ಭಕ್ತರಿಗೆ ನಿರಾಸೆಯಾಗಿದೆ. ದೊಡ್ಡಕಾಯಪ್ಪ ದೇಗುಲದ ಅರ್ಚಕ ಶ್ರೀನಿವಾಸಮೂರ್ತಿ ವಿರುದ್ಧ ಸೇವಾ ಸಮಿತಿ ಮತ್ತು ಗ್ರಾಮಸ್ಥರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ದೇವಸ್ಥಾನದ ಟ್ರಸ್ಟ್​ ಕಾರ್ಯದರ್ಶಿ ಪಾಂಡುರಂಗ ಮಾತನಾಡಿದ್ದು, "ಶ್ರೀ ರಾಮನವಮಿಯಿಂದ ಶ್ರೀ ರಾಮನವಮಿಯವರೆಗೆ ಒಬ್ಬರಿಗೆ ಪೂಜೆಯ ಅವಧಿ ಇರುತ್ತದೆ. ಹೀಗಾಗಿ ಒಬ್ಬರ ವಾಯಿದೆ ಮುಗಿದು ಹೋಗಿತ್ತು. ಸರತಿಯನ್ನು ಈಗ ಬೇರೆಯವರಿಗೆ ಕೊಡಬೇಕಾಗಿತ್ತು. ನಿನ್ನೆ ಬೇರೆಯವರಿಗೆ ಕೊಡಿಸಲೆಂದು ಕರೆದುಕೊಂಡು ಬಂದೆವು. ಆಗ ಶ್ರೀನಿವಾಸ ಮೂರ್ತಿ ನಾನು ಬೀಗ ಕೊಡುವುದಿಲ್ಲ ಎಂದು ಹೇಳಿ ಮಧ್ಯಾಹ್ನ 1:30ಕ್ಕೆ ಶ್ರೀನಿವಾಸಮೂರ್ತಿ ಬೀಗ ಹಾಕಿಕೊಂಡು ಹೋದರು."

"ಅನೇಕರ ವರ್ಷಗಳಿಂದ ಪೂಜೆ ನಡೆಯುತ್ತಿದೆ. ದೇವಸ್ಥಾನಕ್ಕೆ ಮೂವರು ಅರ್ಚಕರಿದ್ದಾರೆ. ವರ್ಷ ವರ್ಷವೂ ಪೂಜಾರಿಗಳು ಬದಲಾಗುತ್ತಾರೆ. ಶ್ರೀರಾಮನವಮಿಯಿಂದ ಶ್ರೀರಾಮನವಮಿಗೆ ವರ್ಷಕ್ಕೆ ಒಬ್ಬೊಬ್ಬರು ಇಲ್ಲಿದ್ದಾರೆ. ಗೋವಿಂದರಾಜು, ಶ್ರೀನಿವಾಸ್ ಮೂರ್ತಿ ಹಾಗೂ ವೆಂಕಟೇಶ್ ಎನ್ನುವವರು ದೇವಾಲಯದ ಪ್ರಧಾನ ಅರ್ಚಕರು. ಶ್ರೀನಿವಾಸ್ ಮೂರ್ತಿ ಎಂಬುವವರು ಈಗ ಬೀಗ ಹಾಕಿ ಹೋಗಿದ್ದಾರೆ" ಎಂದು ಮಾಹಿತಿ ನೀಡಿದರು.

ಇದನ್ನೂ ಓದಿ: ತೆರಿಗೆ ಸಂಗ್ರಹದಲ್ಲಿ ಹೊಸ ದಾಖಲೆ ಬರೆದ ಮೈಸೂರು ಮಹಾನಗರ ಪಾಲಿಕೆ