ಮಂಗಳೂರು: ತುಳು ಭಾಷೆಯ ಎವರ್ಗ್ರೀನ್ ಸೂಪರ್ ಹಿಟ್ ಹಾಡೊಂದನ್ನು ಕುವೈತ್ ದೇಶದ ಹಾಡುಗಾರನೋರ್ವ ಗಾನಸುಧೆ ಮೂಲಕ ತುಳುವರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ. ಇವರ ಹಾಡು ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಪಗೆತ ಪುಗೆ( ಸೇಡಿನ ಹೊಗೆ) ಎಂಬ ಹಳೆಯ ತುಳು ಚಲನಚಿತ್ರದ ‘ಮೋಕೆದ ಸಿಂಗಾರಿ ಉಂತುದೆ ಬಂಗಾರಿ' ( ಪ್ರೀತಿಯ ಸಿಂಗಾರಿ, ನಿಲ್ಲೇ ಬಂಗಾರಿ) ಎಂಬುದು ತುಳುನಾಡಿನ ಪ್ರಸಿದ್ದ ಹಾಡು. ರಸಮಂಜರಿಗಳಲ್ಲಿ, ತುಳುವರ ಕಾರ್ಯಕ್ರಮಗಳಲ್ಲಿ ಈ ಹಾಡು ಇಂದಿಗೂ ಕೇಳಿ ಬರುತ್ತದೆ. ಈ ಹಾಡು ಇದೀಗ ಸಾಗರದಾಚೆಯ ಕುವೈತ್ನಲ್ಲೂ ಫೇಮಸ್ ಆಗಿದೆ.
ಮಾರ್ಚ್ 29ರಂದು ಕುವೈತ್ನಲ್ಲಿತುಳು ಕೂಟವು ರಸಮಂಜರಿ ಕಾರ್ಯಕ್ರಮ ಆಯೋಜಿಸಿತ್ತು. ಈ ಕಾರ್ಯಕ್ರಮದಲ್ಲಿ ಕುವೈತ್ ಖ್ಯಾತ ಹಾಡುಗಾರ ಮುಬಾರಕ್ ಅಲ್ ರಶೀದ್ ಅವರ ಗಾಯನ ಕಾರ್ಯಕ್ರಮವಿತ್ತು. ತುಳು‌ಭಾಷಿಕರೇ ತುಂಬಿದ್ದ ಕಾರ್ಯಕ್ರಮದಲ್ಲಿ ಈ ಹಾಡುಗಾರ ಮೋಕೆದ ಸಿಂಗಾರಿ, ಉಂತುದೆ ಬಂಗಾರಿ ಹಾಡನ್ನು ಹಾಡುವ ಮೂಲಕ ಎಲ್ಲರಲ್ಲೂ ಅಚ್ಚರಿ ಮೂಡಿಸಿದರು. ಅಷ್ಟೇ ಅಲ್ಲ, ಇದೇ ಹಾಡನ್ನು ತಮ್ಮ ಅರೇಬಿಕ್ ಭಾಷೆಯಲ್ಲೂ ಹಾಡುವ ಮೂಲಕ ನೆರೆದಿದ್ದವರನ್ನು ರಂಜಿಸಿದರು. ಇದೀಗ ಈ ಹಾಡು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.
