ಮಂಗಳೂರು: ನಗರದ ಬಟ್ಟಂಪಾಡಿಯ ಅರಬ್ಬಿ ಸಮುದ್ರ ತೀರದಲ್ಲಿ ಮುಳುಗಡೆಯಾಗಿರುವ ಸಿರಿಯಾ ದೇಶದ ಹಡಗಿನಿಂದ ತೈಲ ಸೋರಿಕೆಯಾಗದಂತೆ ತಡೆಯಲು ಗುಜರಾತ್ನ ಪೋರ ಬಂದರಿನಿಂದ 'ಸಮುದ್ರ ಪಾವಕ್' ಎಂಬ ವಿಶೇಷ ತಂತ್ರಜ್ಞ ಹಡಗು ಶನಿವಾರ ಆಗಮಿಸಿದೆ.
5.2ನಾಟಿಕಲ್ ದೂರದಲ್ಲಿ ಭಾಗಶಃ ಮುಳುಗಡೆಗೊಂಡಿರುವ ಸಿರಿಯಾ ದೇಶದ ವಿ.ಎಸ್. ಪ್ರಿನ್ಸೆನ್ಸ್ ಮಿರಾಲ್ ಹಡಗಿನಿಂದ ತೈಲ ಸೋರಿಕೆಯ ಭೀತಿಯ ಹಿನ್ನೆಲೆಯಲ್ಲಿ ಗುಜರಾತ್ ನಿಂದ ಈ ಹಡಗನ್ನು ಇರಿಸಲಾಗಿದೆ.
'ಸಮುದ್ರ ಪಾವಕ್' ಸುಸಜ್ಜಿತವಾದ ಮಾಲಿನ್ಯ ನಿಯಂತ್ರಣ ಮಾಡುವ ಹಡಗಾಗಿದೆ. ಇದನ್ನು ಬಳಸಿಕೊಂಡು ಹೆಲಿಕಾಪ್ಟರ್ ಅಥವಾ ಇತರ ಹಡಗುಗಳ ನೆರವಿನಿಂದ ಸಮುದ್ರದಲ್ಲಿ ಮುಳುಗಿರುವ ಸಿರಿಯಾ ದೇಶದ ಹಡಗಿನಿಂದ ತೈಲ ಹೊರತೆಗೆಯಲು ಪ್ರಯತ್ನ ಮಾಡಲಾಗುತ್ತದೆ. ಸಮುದ್ರ ಪಾವಕ್ ಹಡಗು ಇದೀಗ ಮುಳುಗಡೆಯಾಗಿರುವ ಸಿರಿಯಾ ದೇಶದ ವಿ.ಎಸ್. ಪ್ರಿನ್ಸೆನ್ಸ್ ಮಿರಾಲ್ ಹಡಗಿನ ಪಕ್ಕದಲ್ಲಿಯೇ ಲಂಗರು ಹಾಕಿದೆ. ಇಲ್ಲಿನ ಪರಿಸ್ಥಿತಿಯ ಬಗ್ಗೆ ಅವಲೋಕನ ಮಾಡಿ 150 ಮೆಟ್ರಿಕ್ ಟನ್ ತೈಲ ಹೊರಚೆಲ್ಲುವ ಬಗ್ಗೆ ಯೋಜನೆ ರೂಪಿಸುತ್ತಿದೆ.
ಸಮುದ್ರ ಪಕ್ಷುಬ್ಧಗೊಂಡು ಹಡಗು ಸಂಪೂರ್ಣ ಮುಳುಗಡೆಯಾದರೆ ತೈಲ ಸೋರಿಕೆಯಾಗುವ ಭೀತಿಯಿದೆ. ಆದರೆ, ಹಡಗಿನಿಂದ ತಳದಲ್ಲಿ ಭೂಮಿಯಂತಹ ಪ್ರದೇಶ ಸಿಕ್ಕಿರುವುದರಿಂದ ಪೂರ್ಣ ಮುಳುಗಡೆಯಾಗಿಲ್ಲ. ಇದರ ನಡುವೆ ತೈಲವನ್ನು ಹೊರತೆಗೆಯುವ ಪ್ರಯತ್ನ ಮಾಡಲಾಗುತ್ತದೆ.
ಭಾಗಶಃ ಮುಳುಗಡೆಯಾಗಿರುವ ಸಿರಿಯಾ ದೇಶದ ಹಡಗಿನ ಮೇಲೆ ಕೋಸ್ಟ್ ಗಾರ್ಡ್ ನೌಕೆ, 9 ಹಡಗುಗಳು, 3 ಕೋಸ್ಟ್ ಗಾರ್ಡ್ ಹೆಲಿಕಾಪ್ಟರ್ಗಳು ನಿಗಾ ಇರಿಸಿವೆ. ತೈಲ ಸೋರಿಕೆ ಕಂಡು ಬಂದಲ್ಲಿ ವಿಶೇಷ ಹಡಗು ಸಮುದ್ರ ಪಾವಕ್ ತಂತ್ರಜ್ಞರು ಸೋರಿಕೆ ತಡೆ ಕಾರ್ಯಾಚರಣೆ ನಡೆಸಲು ಸಿದ್ಧರಾಗಿದ್ದಾರೆ.
ಚೀನಾದಿಂದ ಬಂದಿದ್ದ ಹಡಗು: 8000 ಟನ್ ಉಕ್ಕಿನ ಕಾಯಿಲ್ಗಳನ್ನು ತುಂಬಿಸಿಕೊಂಡು ಚೀನಾದ ಟಿಯಾಂಜಿನ್ನಿಂದ ಎಂ ವಿ ಪ್ರಿನ್ಸೆಸ್ ಮಿರಾಲ್ ಹಡಗು ಲೆಬನಾನ್ಗೆ ಸಾಗಿಸುತ್ತಿದ್ದ ಸಂದರ್ಭದಲ್ಲಿ ಮಂಗಳೂರಿನ ಬಟ್ಟಪ್ಪಾಡಿ ಸಮೀಪದ ಸಮುದ್ರದಲ್ಲಿ ಮುಳುಗಡೆಗೊಂಡಿದೆ.
ಅಣಕು ಕಾರ್ಯಾಚರಣೆ: ಎಂ ವಿ ಪ್ರಿನ್ಸೆಸ್ ಮಿರಾಲ್ ಹಡಗು ಮುಳುಗಡೆಯಾಗಿರುವುದರಿಂದ ಸಮುದ್ರದ ನೀರಿನಲ್ಲಿ ತೈಲ ಸೋರಿಕೆಯನ್ನು ತಡೆಗಟ್ಟುವ ಬಗ್ಗೆ ಉಳ್ಳಾಲದ ಕಡಲ ತೀರದಲ್ಲಿ ಇಂದು ಅಣಕು ಕಾರ್ಯಾಚರಣೆ ನಡೆಯಿತು.
ಇದನ್ನೂ ಓದಿ: ಪಾಲಿ'ಟ್ರಿಕ್ಸ್'! ಬಂಡಾಯ ಶಾಸಕರ ಪತ್ನಿಯರ ಸಂಪರ್ಕದಲ್ಲಿ ಉದ್ಧವ್‌ ಠಾಕ್ರೆ ಪತ್ನಿ
