ಕೋವಿಡ್ ಎಫೆಕ್ಟ್: ಸರ್ಕಾರಿ ಶಾಲೆಗಿಂತ ಖಾಸಗಿ ಶಾಲೆಗಳಲ್ಲೇ ದಾಖಲಾತಿ ಕುಸಿತ!

ಕೋವಿಡ್​ ಪರಿಣಾಮದಿಂದ ಎಲ್ಲ ಕ್ಷೇತ್ರಗಳೂ ಕೂಡಾ ತೊಂದರೆಗೆ ಸಿಲುಕಿಕೊಂಡಿವೆ. ಅದಕ್ಕೆ ಶಾಲೆಗಳೂ ಹೊರತಾಗಿಲ್ಲ. ಆದರೆ, ಇಲ್ಲಿ ಗಮನಿಸಬೇಕಾದ ಅಂಶ ಎಂದರೆ ಸರ್ಕಾರಿ ಶಾಲೆಗಳದ್ದು. ಖಾಸಗಿ ಶಾಲೆಗಳ ಅಬ್ಬರಕ್ಕೆ ಯಾವತ್ತೂ ಸಂಕಷ್ಟಕ್ಕೆ ಸಿಲುಕುತ್ತಿದ್ದ ಸರ್ಕಾರಿ ಶಾಲೆಗಳು ಈ ಬಾರಿ ಮಕ್ಕಳ ದಾಖಲಾತಿ ಹೆಚ್ಚಿಸಿಕೊಂಡಿರುವುದು ವಿಶೇಷ, ಈ ಕುರಿತು ಒಂದು ವರದಿ ಇಲ್ಲಿದೆ.

ಚಾಮರಾಜನಗರ: ಇಷ್ಟು ವರ್ಷ ಸರ್ಕಾರಿ ಶಾಲೆಗಳಲ್ಲಿ ದಾಖಲಾತಿ ಪ್ರಮಾಣ ವರ್ಷದಿಂದ ವರ್ಷಕ್ಕೆ ಕುಸಿತ ಕಾಣುತ್ತಿತ್ತು. ಆದರೆ, ಕೋವಿಡ್ ಪರಿಣಾಮದಿಂದ ಈ ಬಾರಿ ಖಾಸಗಿ ಶಾಲೆಗಳಲ್ಲೇ ದಾಖಲಾತಿ ಕುಸಿದಿದೆ.

ಹೌದು, ಈ ಕುರಿತು ಡಿಡಿಪಿಐ ಜವರೇಗೌಡ ಈಟಿವಿ ಭಾರತಕ್ಕೆ ಮಾಹಿತಿ ನೀಡಿ, ಈ ವರ್ಷ ಖಾಸಗಿ ಶಾಲೆಗಳಲ್ಲಿ 1 ರಿಂದ 10 ನೇ ತರಗತಿವರೆಗಿನ 2,582 ಮಕ್ಕಳು 2020-21 ಸಾಲಿಗೆ ದಾಖಲಾತಿ ಪಡೆಯದೇ ಹೊರಗುಳಿದಿದ್ದು, ಅನುದಾನಿತ ಶಾಲೆಗಳಿಗೆ 1,164 ಮಕ್ಕಳು ದಾಖಲಾಗಿಲ್ಲ. ಆದರೆ, ಸರ್ಕಾರಿ ಶಾಲೆಗಳಲ್ಲಿ ಕೇವಲ 129 ಮಕ್ಕಳಷ್ಟೇ ಈ ಸಾಲಿನ ದಾಖಲಾತಿ ಪಡೆದಿಲ್ಲ ಎಂದು ತಿಳಿಸಿದರು.

ಜಿಲ್ಲೆಯಲ್ಲಿ 2,101 ಬಾಲಕಿಯರು, 2,504 ಬಾಲಕರು ಸೇರಿದಂತೆ ಒಟ್ಟು 4,605 ಮಕ್ಕಳು ಈ ಬಾರಿ ಶಾಲೆಯಿಂದ ಹೊರಗುಳಿದಿದ್ದಾರೆ. ಚಾಮರಾಜನಗರ ತಾಲೂಕು ಒಂದರಲ್ಲೇ 2,125 ಮಕ್ಕಳು ದಾಖಲಾತಿ ಪಡೆದಿಲ್ಲ ಇವರಲ್ಲಿ ಖಾಸಗಿ ಶಾಲೆಯ 1,400 ಮಂದಿ ಇದ್ದಾರೆ. ಉಳಿದಂತೆ, ಜವಾಹರ್ ನವೋದಯದ 38, ಕೇಂದ್ರೀಯ ವಿದ್ಯಾಲಯದ 48 ಮಕ್ಕಳು ದಾಖಲಾತಿ ಪಡೆದಿಲ್ಲ ಎಂದರು.

ಸರ್ಕಾರಿ ಶಾಲೆಗೆ 769 ಮಕ್ಕಳು:

ಸರ್ಕಾರದ ಉಚಿತ ಶಿಕ್ಷಣ ನೀತಿ, ಮನೆಬಾಗಿಲಿಗೆ ತೆರಳಿ ಪಾಠ ಮಾಡುವ ಯೋಜನೆಯಾದ ವಿದ್ಯಾಗಮ, ಊರಿನಲ್ಲೇ ಶಾಲೆ ಎಂಬಿತ್ಯಾದಿ ಅಂಶಗಳಿಂದ ಖಾಸಗಿ ಶಾಲೆಯಿಂದ ಸರ್ಕಾರಿ ಶಾಲೆಗೆ ಈ ಬಾರಿ 769 ಮಕ್ಕಳು ದಾಖಲಾಗಿರುವುದು ವಿಶೇಷ.