ಬೆಂಗಳೂರು/ಬೆಳಗಾವಿ/ಕೊಪ್ಪಳ: ಏಪ್ರಿಲ್‌, ಮೇ, ಜೂನ್ ತಿಂಗಳು ಬಂದ್ರೆ ಸಾಕು ನಿಶ್ಚಿತಾರ್ಥ, ಮದುವೆ, ನಾಮಕರಣ, ಗೃಹ ಪ್ರವೇಶ ಹೀಗೆ ನಾನಾ ರೀತಿಯ ಸಮಾರಂಭಗಳು ನಡೆಯೋದು ಸಾಮಾನ್ಯ. ಈ ಸೀಜನ್ನಲ್ಲೇ ಕೇಟರಿಂಗ್ನವರು ವಿಧ ವಿಧವಾದ, ರುಚಿಕರ ಅಡುಗೆ ಮಾಡಿ ಆದಾಯ ಗಳಿಸೋದು ಸಾಮಾನ್ಯ.
ಆದ್ರೆ ಎರಡು ಬಾರಿಯೂ ಕಾರ್ಯಕ್ರಮದ ಸೀಸನ್ನಲ್ಲೇ ಕೋವಿಡ್ ವಕ್ಕರಿಸಿ ಅಡುಗೆ ಮಾಡೋವ್ರ ಕೈ ಕಟ್ಟಿಹಾಕಿದೆ. ಇದನ್ನೇ ನಂಬಿ ಜೀವನ ನಡೆಸ್ತಿದ್ದೋವ್ರ ಪಾಡು ಹೇಳತೀರದಾಗಿದೆ.
ಮೊದಲೆಲ್ಲಾ ಕಾರ್ಯಕ್ರಮಗಳೆಂದರೆ ನೂರರಿಂದ ಸಾವಿರಾರು ಮಂದಿ ಸೇರಿ ಸಂಭ್ರಮಿಸ್ತಿದ್ರು. ಅಡುಗೆ ವಿಚಾರವೇ ಎಲ್ಲರ ಮಾತಾಗುತ್ತಿತ್ತು. ಕೇಟರಿಂಗ್ ನಂಬಿದವರಿಗಂತೂ ಲಾಭವೇ ಲಾಭ. ಆದ್ರೀಗ ಎಲ್ಲ ಸಂಭ್ರಮವನ್ನು ಕಿತ್ತುಕೊಂಡ ಕೊರೊನಾ ಕೇಟರಿಂಗ್ ಉದ್ಯಮದ ಮೇಲೆ ತನ್ನ ವಕ್ರದೃಷ್ಟಿ ಬೀರಿದೆ. ಜೀವನ ನಡೆಸೋದೇ ಸವಾಲಾಗಿದೆ ಅಂತಾರೆ ಬೆಂಗಳೂರು ಕೇಟರಿಂಗ್ ಉದ್ಯಮಿಗಳು.
ಕೊಪ್ಪಳ ಜಿಲ್ಲೆಯಲ್ಲೂ ಸುಮಾರು 20 ಮಂದಿ ಕೇಟರಿಂಗ್ ಉದ್ಯಮಿಗಳಿದ್ದು, ಇದಕ್ಕೆ ಪೂರಕವಾಗಿ ಕೆಲಸ ಮಾಡುವ ನೂರಾರು ಮಂದಿ ಕಾರ್ಮಿಕರಿದ್ದಾರೆ. ಆದ್ರೆ ಕೋವಿಡ್ ನಿಯಮಾನುಸಾರ ಕಾರ್ಯಕ್ರಮಗಳೆಲ್ಲವೂ ಮನೆ ಮಟ್ಟಿಗಷ್ಟೇ ಸೀಮಿತವಾಗಿದ್ದು, ಕೇಟರಿಂಗ್ ಉದ್ಯಮಕ್ಕೆ ಭಾರಿ ನಷ್ಟವಾಗಿದೆ. ಕಾರ್ಮಿಕರ ಪಾಡಂತೂ ಹೇಳತೀರದಾಗಿದೆ.
ಬೆಳಗಾವಿ ಜಿಲ್ಲೆಯ ಪರಿಸ್ಥಿತಿಯೂ ಇದರಿಂದ ಹೊರತಾಗಿಲ್ಲ. ಆರ್ಡರ್ಗಳು ಸಿಗದ ಕಾರಣ ಕಾರ್ಮಿಕರಿಗೆ ಕೆಲಸವಿಲ್ಲದಂತಾಗಿದೆ. ಮಾಡಿದ ಸಾಲ ತೀರಿಸಲು ಉದ್ಯಮಿಗಳು ಹೆಣಗಾಡುತ್ತಿದ್ದರೆ, ಜೀವನದ ಬಂಡಿ ಸಾಗಿಸಲು ಕಾರ್ಮಿಕರು ಪರದಾಡ್ತಿದ್ದಾರೆ. ಕೋವಿಡ್ ನಿಯಂತ್ರಣವೊಂದೇ ಎಲ್ಲ ಸಮಸ್ಯೆಗೂ ಮಾರ್ಗೋಪಾಯವಾಗಿದೆ.
