ಕೇಂದ್ರ ಪುರಸ್ಕೃತ ಯೋಜನೆ ಪುರಸ್ಕರಿಸದ ಬೊಮ್ಮಾಯಿ ಸರ್ಕಾರ.. ಡಬಲ್​ ಇಂಜಿನ್​ ಸರ್ಕಾರವಿದ್ದರೂ ನಿರ್ಲಕ್ಷ್ಯವೇಕೆ?

ಜಂಟಿ ಯೋಜನೆಗಳಿಗೆ ಅನುದಾನ ಬಿಡುಗಡೆ ಮಾಡದ ಬೊಮ್ಮಾಯಿ ಸರ್ಕಾರ- ಡಬಲ್​ ಎಂಜಿನ್​ ಸರ್ಕಾರವಿದ್ದರೂ ನಿರಾಸಕ್ತಿ- ರಾಜ್ಯ ಸರ್ಕಾರ ಅನುದಾನ ಬಿಡುಗಡೆ ಮಾಡದಿರಲು ಕಾರಣ ಏನು?

ಬೆಂಗಳೂರು: ರಾಜ್ಯ ಸರ್ಕಾರ ಕೇಂದ್ರ ಅನುದಾನದ ಮೂಲಕ ಹಲವು ಯೋಜನೆಗಳನ್ನು ಅನುಷ್ಠಾನಗೊಳಿಸುತ್ತಿದೆ. ಈ ಯೋಜನೆಗಳಿಗೆ ಕೇಂದ್ರ ಸರ್ಕಾರದ ಅನುದಾನ ಪಾಲು ಹೆಚ್ಚಾಗಿದ್ದರೆ, ರಾಜ್ಯ ಸರ್ಕಾರವೂ ಅನುದಾನದ ಪಾಲೂ ಹೊಂದಿರುತ್ತದೆ. ಇದೀಗ 2022-23 ಸಾಲಿನ ಆಯವ್ಯಯ ವರ್ಷದ ಮುಕ್ಕಾಲು ಭಾಗ ಕಳೆದು ಹೋಗಿದೆ‌. ಆದರೆ, ಬಹುತೇಕ ಕೇಂದ್ರ ಪುರಸ್ಕೃತ ಯೋಜನೆಗಳಿಗೆ ಕೇಂದ್ರ ಸರ್ಕಾರ ಅಷ್ಟೇ ಅಲ್ಲ, ಬೊಮ್ಮಾಯಿ ಸರ್ಕಾರವೇ ಬಿಡಿಗಾಸು ಅನುದಾನ ಬಿಡುಗಡೆ ಮಾಡದೆ ಸುಮ್ಮನೆ ಕುಳಿತಿದೆ.

ಹೌದು, ಹಲವು ಯೋಜನೆಗಳನ್ನು ಕೇಂದ್ರ ಹಾಗೂ ರಾಜ್ಯ ಸರ್ಕಾರ ಯೋಜನೆಗಳನ್ನು ಅನುಷ್ಠಾನಗೊಳಿಸುತ್ತಿದೆ. ಇದಕ್ಕೆ ರಾಜ್ಯ ಸರ್ಕಾರವೂ ಗರಿಷ್ಠ ಶೇ 50ರಷ್ಟರವರೆಗೆ ಅನುದಾನ ನೀಡುತ್ತದೆ. 2022-23 ಸಾಲಿನ ಒಂಬತ್ತು ತಿಂಗಳು ಕಳೆದ ಹೋಗಿದೆ. ಆದರೆ ಕೇಂದ್ರಾನುದಾನಿತ ಯೋಜನೆಗಳ ಅನುಷ್ಠಾನ ನಿರೀಕ್ಷಿತ ಮಟ್ಟದಲ್ಲಿ ಪ್ರಗತಿ ಕಾಣದಿರುವ ಬಗ್ಗೆ ಈಗಾಗಲೇ ಈಟಿವಿ ಭಾರತ ವರದಿ ಮಾಡಿದೆ.

ರಾಜ್ಯದಲ್ಲಿ ಡಬಲ್ ಇಂಜಿನ್ ಸರ್ಕಾರ ಇದೆ ಎಂದು ಬಿಜೆಪಿ ಸರ್ಕಾರ ಪದೇ ಪದೆ ಹೇಳುತ್ತಲೇ ಇದೆ. ಆರ್ಥಿಕ ವರ್ಷದ ಎಂಟು ತಿಂಗಳಾದರೂ ರಾಜ್ಯದ ವಿವಿಧ ಕೇಂದ್ರ ಪುರಸ್ಕೃತ ಯೋಜನೆಯ ಪ್ರಗತಿ ಇನ್ನೂ ಟೇಕ್ ಆಫ್ ಆಗಿಲ್ಲ. ರಾಜ್ಯದಲ್ಲಿ ಸುಮಾರು 20 ಇಲಾಖೆಗಳಲ್ಲಿ ವಿವಿಧ ಕೇಂದ್ರ ಪುರಸ್ಕೃತ ಯೋಜನೆಗಳು ಜಾರಿಯಲ್ಲಿವೆ. ಕೇಂದ್ರ ಸರ್ಕಾರ ಹಲವು ಯೋಜನೆಗಳಿಗೆ ತನ್ನ ಪಾಲಿನ ಬಿಡಿಗಾಸು ಅನುದಾನ ಬಿಡುಗಡೆ ಮಾಡದಿರುವುದು ಮಾತ್ರವಲ್ಲ, ರಾಜ್ಯ ಸರ್ಕಾರವೇ ತನ್ನ ಪಾಲಿನ ಅನುದಾನ ಬಿಡುಗಡೆ ಮಾಡದೆ ಕೇಂದ್ರ ಪುರಸ್ಕೃತ ಯೋಜನೆಗಳನ್ನು ಪುರಸ್ಕರಿಸುತ್ತಿಲ್ಲ.

ರಾಜ್ಯದ ಪಾಲಿನ ಅನುದಾನ ಏನು.. ರಾಜ್ಯದಲ್ಲಿ ಸುಮಾರು 20 ಇಲಾಖೆಗಳಲ್ಲಿ ಕೇಂದ್ರ ಪುರಸ್ಕೃತ ಯೋಜನೆಗಳು ಚಾಲ್ತಿಯಲ್ಲಿವೆ. ಇದಕ್ಕೆ ಕೇಂದ್ರ ಸರ್ಕಾರ ತನ್ನ ಅನುದಾನದ ಪಾಲನ್ನು ನೀಡಿದರೆ, ರಾಜ್ಯ ಸರ್ಕಾರವೂ ತನ್ನ ಪಾಲಿನ ಅನುದಾನ ನೀಡುತ್ತದೆ. ಅದರಂತೆ 2022-23 ಸಾಲಿನಲ್ಲಿ ರಾಜ್ಯ ಸರ್ಕಾರ ಕೇಂದ್ರ ಪುರಸ್ಕೃತ ಯೋಜನೆಗಳಿಗೆ ಈವರೆಗೆ 17,071 ಕೋಟಿ ರೂ. ಅನುದಾನ ಹಂಚಿಕೆ ಮಾಡಿದೆ. ಇನ್ನು ಕೇಂದ್ರ ಸರ್ಕಾರ ಹಂಚಿಕೆ‌ ಮಾಡಿರುವುದು 21,417.97 ಕೋಟಿ ರೂ. ಈ ಪೈಕಿ ರಾಜ್ಯ ಸರ್ಕಾರ ಡಿಸೆಂಬರ್ ಅಂತ್ಯದ ವರೆಗೆ ತನ್ನ ಪಾಲಿನ 7,484 ಕೋಟಿ ರೂ. ಅನುದಾನ ಬಿಡುಗಡೆ ಮಾಡಿದೆ. ಕೇಂದ್ರ ಸರ್ಕಾರ ಈವರೆಗೆ 8,239 ಕೋಟಿ ರೂ. ಅನುದಾನ ಬಿಡುಗಡೆ ಮಾಡಿದೆ.

ಈವರೆಗೆ ಕೇಂದ್ರ ಪುರಸ್ಕೃತ ಯೋಜನೆಗಳಿಗೆ ರಾಜ್ಯ ತನ್ನ ಪಾಲಿನ 8,587 ಕೋಟಿ ರೂ. ಅನುದಾನ ಖರ್ಚು ಮಾಡಿದೆ. ಅದೇ ಕೇಂದ್ರ ಸರ್ಕಾರದ 9,270 ಕೋಟಿ ರೂ. ಅನುದಾನ ಖರ್ಚು ಮಾಡಲಾಗಿದೆ. ಆ ಮೂಲಕ ಕೇಂದ್ರ ಪುರಸ್ಕೃತ ಯೋಜನೆಗಳಿಗೆ ಈವರೆಗೆ ಒಟ್ಟು 17,858 ಕೋಟಿ ಅನುದಾನ ಖರ್ಚು ಮಾಡಲಾಗಿದೆ. ಡಿಸೆಂಬರ್ ವರೆಗೆ ಕೇಂದ್ರ ಪುರಸ್ಕೃತ ಯೋಜನೆಗಳ ಪ್ರಗತಿ 46.20ರಷ್ಟು ಮಾತ್ರ.

40ಕ್ಕೂ ಅಧಿಕ ಯೋಜನೆಗಳಿಗೆ ರಾಜ್ಯ ಶೂನ್ಯ ಹಣ ಬಿಡುಗಡೆ.. ಹೌದು, ಕೇಂದ್ರ ಸರ್ಕಾರ ತನ್ನ ಪುರಸ್ಕೃತ ಸುಮಾರು 30 ಯೋಜನೆಗಳಿಗೆ ಈವರೆಗೆ ಬಿಡಿಗಾಸು ಅನುದಾನ ಬಿಡುಗಡೆ ಮಾಡಿರಲಿಲ್ಲ. ಆದರೆ, ಬೊಮ್ಮಾಯಿ‌ ಸರ್ಕಾರ 40ಕ್ಕೂ ಅಧಿಕ ಕೇಂದ್ರ ಪುರಸ್ಕೃತ ಯೋಜನೆಗಳಿಗೆ ತನ್ನ ಪಾಲಿನ ಅನುದಾನವನ್ನೇ ಬಿಡುಗಡೆ ಕೊಟ್ಟಿಲ್ಲ. ಆ ಮೂಲಕ ಬೊಮ್ಮಾಯಿ ಸರ್ಕಾರ ತನ್ನ ಜವಾಬ್ದಾರಿಯನ್ನು ಮೆರೆಯಲು ವಿಫಲವಾಯಿತಾ ಎಂಬ ಪ್ರಶ್ನೆ ಮೂಡಿದೆ.

ಕೆಡಿಪಿ ಅಂಕಿ ಅಂಶದ ಪ್ರಕಾರ ರಾಜ್ಯ ಸರ್ಕಾರ 2022-23 ಸಾಲಿನ ಮುಕ್ಕಾಲು ಭಾಗ ಕಳೆದರೂ ಕೇಂದ್ರ ಪುರಸ್ಕೃತ 40 ಕ್ಕೂ ಅಧಿಕ ವಿವಿಧ ಯೋಜನೆಗಳಿಗೆ ಇನ್ನೂ ತನ್ನ ಪಾಲಿನ ಹಣ ಬಿಡುಗಡೆ ಮಾಡದೇ ಸುಮ್ಮನೆ ಕುಳಿತಿರುವುದು ಸ್ಪಷ್ಟವಾಗಿದೆ. ಕೆಡಿಪಿ ಸಭೆಯಲ್ಲಿನ ಪ್ರಗತಿಯ ಅಂಕಿಅಂಶ ನೋಡಿದರೆ ಕೇಂದ್ರ ಪುರಸ್ಕೃತ ಯೋಜನೆಗಳ ಅನುಷ್ಠಾನದ ಪರ ಕೇಂದ್ರಕ್ಕಿಂತ ಹೆಚ್ಚಿಗೆ ರಾಜ್ಯ ಸರ್ಕಾರವೇ ತನ್ನ ಪಾಲಿನ ಅನುದಾನ ಬಿಡುಗಡೆ ಮಾಡದೇ ನಿರ್ಲಕ್ಷ್ಯ ತೋರಿದೆ ಎಂಬುದು ಗೊತ್ತಾಗುತ್ತದೆ.

ಯಾವೆಲ್ಲಾ ಯೋಜನೆಗಳಿಗೆ ರಾಜ್ಯ ಶೂನ್ಯ ಅನುದಾನ?: ಕೆಡಿಪಿ ಅಂಕಿಅಂಶದ ಪ್ರಕಾರ ಪ್ರಮುಖವಾಗಿ ವಸತಿ ಇಲಾಖೆಯಡಿ ಪ್ರಧಾನ ಮಂತ್ರಿ ಆವಾಜ್ ಯೋಜನೆ (ನಗರ) ಹಾಗೂ ಆವಾಜ್ ಯೋಜನೆ (ಗ್ರಾಮೀಣ)ಗೆ ರಾಜ್ಯ ತನ್ನ ಪಾಲಿನ ಬಿಡಿಗಾಸು ಅನುದಾನವನ್ನೇ ಬಿಡುಗಡೆ ಮಾಡಿಲ್ಲ. ಇನ್ನು ವಿವಿಧ ನಿಗಮಗಳ ನೀರಾವರಿ ಯೋಜನೆಗಳಿಗೂ ರಾಜ್ಯ ಸರ್ಕಾರ ತನ್ನ ಪಾಲಿನ ಅನುದಾನ ಬಿಡುಗಡೆ ಮಾಡಿಲ್ಲ.

ಕೃಷಿ ಇಲಾಖೆಯಡಿ 3 ಯೋಜನೆಗಳು, ಪಶುಸಂಗೋಪನೆ ಇಲಾಖೆಯಡಿ ನ್ಯಾಷನಲ್ ಲೈವ್ ಸ್ಟಾಕ್ ಮಿಷನ್ ಗೆ ಅನುದಾನ ಬಿಡಗಡೆ ಶೂನ್ಯವಾಗಿದೆ. ಇನ್ನು ಹಿಂದುಳಿದ ವರ್ಗಗಗಳ ಕಲ್ಯಾಣ ಇಲಾಖೆಯಡಿ ಒಬಿಸಿ ಸಮುದಾಯಕ್ಕಾಗಿ ವಿದ್ಯಾರ್ಥಿ ನಿಲಯ ನಿರ್ಮಾಣ ಯೋಜನೆ ಹಾಗೂ ಒಬಿಸಿ ವಿದ್ಯಾರ್ಥಿಗಳ ಪ್ರಿ ಮೆಟ್ರಿಕ್ ಸ್ಕಾಲರ್ ಶಿಪ್ ಯೋಜನೆಗೂ ರಾಜ್ಯ ತನ್ನ ಪಾಲಿನ ಹಣ ಕೊಟ್ಟಿಲ್ಲ.

ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯಡಿ ಉಜ್ಚಲ ಯೋಜನೆ ಸೇರಿ 4 ಪ್ರಮುಖ ಕೇಂದ್ರ ಪುರಸ್ಕೃತ ಯೋಜನೆಗಳಿಗೆ ರಾಜ್ಯ ಇನ್ನೂ ಅನುದಾನ ಬಿಡುಗಡೆ ಮಾಡಿಲ್ಲ. ಆಹಾರ ಇಲಾಖೆಯಡಿ ಒಂದು ದೇಶ ಒಂದು ಪಡಿತರ ಯೋಜನೆ ಸೇರಿ 2 ಯೋಜನೆ, ಅರಣ್ಯ ಇಲಾಖೆಯಡಿ 7 ಯೋಜನೆಗಳು, ಆರೋಗ್ಯ ಇಲಾಖೆಯಡಿ 3, ಸಮಾಜ ಕಲ್ಯಾಣ ಇಲಾಖೆಯಡಿ 5, ಉನ್ನತ ಶಿಕ್ಷಣ ಇಲಾಖೆಯಡಿ ರಾಷ್ಟ್ರೀಯ ಉನ್ನತ ಶಿಕ್ಷಣ ಅಭಿಯಾನ, ತೋಟಗಾರಿಕೆ ಇಲಾಖೆಯಡಿಯಲ್ಲಿನ ಪ್ರಧಾನ ಮಂತ್ರಿ ಕೃಷಿ ಸಿಂಚಾಯಿ ಯೋಜನೆಗಳಿಗೆ ರಾಜ್ಯ ಸರ್ಕಾರ ತನ್ನ ಪಾಲಿನ ಅನುದಾನವನ್ನು ಇದುವರೆಗೂ ಬಿಡುಗಡೆ ಮಾಡದೇ ಸುಮ್ಮನೆ ಕೂತಿದೆ.

ಇದನ್ನೂ ಓದಿ: ಮೆಟ್ರೋ ಪಿಲ್ಲರ್ ಕುಸಿತ ಪ್ರಕರಣ: ಪೊಲೀಸರ ಮನವೊಲಿಕೆ ಬಳಿಕ ಮೃತದೇಹ ಸ್ವೀಕರಿಸಿದ ಕುಟುಂಬಸ್ಥರು