ಹೈದರಾಬಾದ್: ಕಳೆದ ಬಾರಿ ರಿಯೋ ಒಲಿಂಪಿಕ್ಸ್ನಲ್ಲಿ ಹೆಚ್ಚೇನೂ ಸಾಧನೆ ಮಾಡಲಾರದೆ ಮೀರಾಬಾಯಿ ಬೇಸರಗೊಂಡಿದ್ದರು. ಬಳಿಕ ಕಠಿಣ ಪರಿಶ್ರಮದಿಂದ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ವಿಜಯಿಯಾಗಿ ಇದೀಗ ಟೋಕಿಯೋದಲ್ಲಿ ಬೆಳ್ಳಿ ಪದಕ ಪಡೆದು ದೇಶದ ಕೀರ್ತಿ ಹೆಚ್ಚಿಸಿದರು.
1. ಭಾರತಕ್ಕೆ ಬೆಳ್ಳಿ ಪದಕ ಗೆದ್ದಿದ್ದು ಹೇಗನಿಸಿತು?
ಇದು ಒಂದು ವರ್ಣಿಸಲಾಗದ ಭಾವನೆ. ಅದನ್ನು ಪದಗಳಲ್ಲಿ ವಿವರಿಸುವುದು ಕಷ್ಟ. ನಾನು ಭಾರತಕ್ಕೆ ಮರಳಿದಾಗಿನಿಂದ ತುಂಬಾ ಪ್ರೀತಿ ಪಡೆಯುತ್ತಿದ್ದೇನೆ. ವಿಮಾನ ನಿಲ್ದಾಣ, ನನ್ನೂರಿನಲ್ಲಿ ನನಗೆ ಉತ್ತಮ ಸ್ವಾಗತ ಸಿಕ್ಕಿತು. ತುಂಬಾ ಸಂತೋಷವಾಗುತ್ತಿದೆ.
2. ಪದಕ ಗೆದ್ದ ಬಳಿಕ ನೀವು ಎಷ್ಟು ಪಿಜ್ಜಾಗಳನ್ನು ಸೇವಿಸಿದ್ದೀರಿ?
(ನಗುತ್ತಾ..) ನಾನು ಬಹಳಷ್ಟು ಪಿಜ್ಜಾಗಳನ್ನು ತಿಂದೆ. ಭಾರತಕ್ಕೆ ಮರಳಿದಾಗಿನಿಂದ ಪಿಜ್ಜಾಗಳನ್ನೇ ತಿನ್ನುತ್ತಿದ್ದೇನೆ. (ಮತ್ತೆ ನಗು..)
3. ಐದು ವರ್ಷಗಳ ಹಿಂದೆ ರಿಯೋ ಒಲಿಂಪಿಕ್ಸ್ನಲ್ಲಿ ನೀವು ಕ್ಲೀನ್ ಮತ್ತು ಜೆರ್ಕ್‌ನಲ್ಲಿ ವ್ಯಾಲಿಡ್ ಲಿಫ್ಟ್‌ಗಳನ್ನು ರೆಕಾರ್ಡ್ ಮಾಡಲು ಸಾಧ್ಯವಾಗಲಿಲ್ಲ. ಆದರೂ ನೀವು ಹೋರಾಡುತ್ತಲೇ ಇದ್ದಿರಿ. ಯಾವುದು ನಿಮ್ಮನ್ನು ಪ್ರೇರೇಪಿಸಿತು?
ರಿಯೊ ಒಲಿಂಪಿಕ್ಸ್ ನನ್ನ ಚೊಚ್ಚಲ ಒಲಿಂಪಿಕ್ಸ್ ಆಗಿತ್ತು. ಪೂರ್ವ ಸಿದ್ಧತೆಗಳಲ್ಲಿ ನಾನು ಸಾಕಷ್ಟು ಶ್ರಮಿಸಿದ್ದೆ. ರಿಯೊದಲ್ಲೂ ನನಗೆ ಪದಕ ಗೆಲ್ಲುವ ಅವಕಾಶವಿತ್ತು. ರಿಹಾರ್ಸಲ್‌ ಸಮಯದಲ್ಲಿ ನಾನು ಎತ್ತಿರುವುದನ್ನು ಸ್ಪರ್ಧೆಯಲ್ಲೂ ಪುನರಾವರ್ತಿಸಿದ್ದರೆ ಬೆಳ್ಳಿ ಸಿಗುತ್ತಿತ್ತು. ಬಹುಶಃ, ಅದು ನನ್ನ ದಿನವಾಗಿರಲಿಲ್ಲ. ದೇಶಕ್ಕಾಗಿ ಪದಕ ಪಡೆಯಲು ಸಾಧ್ಯವಾಗದಿದ್ದಕ್ಕೆ ಅಂದು ನನಗೆ ತುಂಬಾ ದುಃಖವಾಗಿತ್ತು. ನಾನು ತುಂಬಾ ಶ್ರಮ ಹಾಕಿದರೂ ಏನಾಯಿತು ಎಂದು ನನಗೆ ಅರ್ಥವಾಗಲಿಲ್ಲ. ಮುಂದಿನ ಕೆಲವು ದಿನಗಳವರೆಗೆ ನಾನು ಏನೂ ತಿನ್ನಲಿಲ್ಲ.
ನನ್ನ ಕುಟುಂಬ ಮತ್ತು ವಿಜಯ್ ಸರ್ ನನ್ನೊಂದಿಗಿದ್ದರು. ಮುಂದೆ ಸಾಕಷ್ಟು ಸ್ಪರ್ಧೆಗಳಿವೆ ಎಂದು ವಿಜಯ್ ಸರ್ ಹೇಳಿದರು. ಹೆಚ್ಚು ಶ್ರಮವಹಿಸಿ ಮುಂಬರುವ ಸ್ಪರ್ಧೆಗಳಲ್ಲಿ ಪ್ರದರ್ಶನ ನೀಡುವುದಾಗಿ ಆ ದಿನ ನಾನೇ ಭರವಸೆ ನೀಡಿದ್ದೆ. ನಾನು ಅದನ್ನು ಮಾಡಬಲ್ಲೆ ಎಂದು ನಂಬಿದ್ದೆ. ಭಾರತಕ್ಕೆ ಹಿಂತಿರುಗಿದಾಗ ನನ್ನ ತಾಯಿ ನನ್ನೊಂದಿಗಿದ್ದರು. ಅವರು ನನ್ನನ್ನು ಬಹಳ ಸಮಾಧಾನಪಡಿಸಿದರು. ಮುಂಬರುವ ಸ್ಪರ್ಧೆಗಳಲ್ಲಿ ಉತ್ತಮ ಸಾಧನೆ ಮಾಡಲು ಪ್ರೇರೇಪಿಸಿದರು.
ವಿಜಯ್ ಸರ್ ಜೊತೆ ಚರ್ಚಿಸಿದ ನಂತರ ನಾನು ನನ್ನ ತರಬೇತಿ ಮತ್ತು ತಂತ್ರವನ್ನು ಬದಲಾಯಿಸಿಕೊಂಡೆ. ನಾನು ಬೇಗನೆ ಚೇತರಿಸಿಕೊಂಡೆ. ಅದರ ನಂತರ ನಾನು ವಿಶ್ವ ಚಾಂಪಿಯನ್ ಆದೆ. ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ನನ್ನ ಸಾಧನೆ ನನಗೆ ಸಾಕಷ್ಟು ಶಕ್ತಿಯನ್ನು ನೀಡಿತು ಮತ್ತು ಅದರ ನಂತರ ನಾನು ಎಂದಿಗೂ ಭರವಸೆ ಕಳೆದುಕೊಂಡಿಲ್ಲ.
4. ಲಾಕ್‌ಡೌನ್ ಸಮಯದಲ್ಲಿ ನಿಮ್ಮ ಕಠಿಣ ಅವಧಿ ಯಾವುದು?
ನಾನು ಎರಡು ತಿಂಗಳು ತರಬೇತಿ ಪಡೆಯಲಿಲ್ಲ. ವೇಟ್ ಲಿಫ್ಟಿಂಗ್ನಲ್ಲಿ ನೀವು ಒಂದು ದಿನವೂ ತರಬೇತಿ ಪಡೆಯದಿದ್ದರೆ ಮೊದಲಿನಿಂದ ಆರಂಭಿಸಬೇಕಾದ ವಿಷಯ. ತರಬೇತಿಯಿಂದ ದೂರವಿರುವುದು ನನಗೆ ಕಷ್ಟದ ಅವಧಿಯಾಗಿತ್ತು. ನನ್ನ ದೇಹದಲ್ಲಿ ಸ್ನಾಯುವಿನ ನಷ್ಟವೂ ಇತ್ತು. ನಾನು ಆ ಸಮಯದಲ್ಲಿ ಪಟಿಯಾಲದಲ್ಲಿದ್ದೆ ಮತ್ತು ತರಬೇತಿಯನ್ನು ಪುನರಾರಂಭಿಸಲು ನಾನು ವಿನಂತಿಸಿದೆ. ನಾನು ತರಬೇತಿ ಪ್ರಾರಂಭಿಸದಿದ್ದರೆ ಏಷ್ಯನ್ ಚಾಂಪಿಯನ್‌ಶಿಪ್ ಅರ್ಹತಾ ಪಂದ್ಯಗಳು ಮತ್ತು ಒಲಿಂಪಿಕ್ಸ್‌ಗಾಗಿ ನನ್ನ ತರಬೇತಿಯು ವ್ಯರ್ಥವಾಗಲಿದೆ ಎಂದು ನಾನು ಕ್ರೀಡಾ ಸಚಿವರನ್ನು ವಿನಂತಿಸಿದೆ. ನಾನು ಎರಡು ತಿಂಗಳ ನಂತರ ನನ್ನ ತರಬೇತಿಯನ್ನು ಆರಂಭಿಸಿದೆ ಆದರೆ ಸ್ನಾಯುಗಳಲ್ಲಿನ ಬಿಗಿತದಿಂದಾಗಿ ನಾನು ತರಬೇತಿ ಪಡೆಯಲು ಸಾಧ್ಯವಾಗಲಿಲ್ಲ. ಇದು ಕಷ್ಟದ ಅವಧಿಯಾಗಿತ್ತು.
5. ನೀವು ಬಹಳ ಸಮಯದಿಂದ ಮನೆಯಿಂದ ದೂರವಿದ್ದಿರಿ. ಇಲ್ಲಿಯವರೆಗೆ ನೀವು ಮಾಡಿದ ದೊಡ್ಡ ತ್ಯಾಗ ಯಾವುದು?
2016ರಲ್ಲಿ ನಾನು ವಿಶ್ವ ಚಾಂಪಿಯನ್ ಆಗಿದ್ದಾಗ ನವೆಂಬರ್ 27ರಂದು ನನ್ನ ಅಕ್ಕನ ಮದುವೆಯಿತ್ತು. ಸ್ಪರ್ಧೆಯು ನವೆಂಬರ್‌ನಲ್ಲಿತ್ತು. ವಿಶ್ವ ಚಾಂಪಿಯನ್ ಆಗಲು ನನ್ನ ಸಹೋದರಿಯ ಮದುವೆಯಲ್ಲಿ ನಾನು ಭಾಗವಹಿಸಲು ಸಾಧ್ಯವಾಗಲಿಲ್ಲ. ನಾನು ಮಾಡಿದ ತ್ಯಾಗಗಳು ಸಾಕಷ್ಟಿವೆ ಮತ್ತು ಇದು ಅವುಗಳಲ್ಲಿ ಒಂದು. ನನ್ನ ಫಿಟ್ನೆಸ್ ಕಾಪಾಡಿಕೊಳ್ಳಲು ನಾನು ಇಷ್ಟಪಟ್ಟ ಆಹಾರಗಳನ್ನು ತ್ಯಾಗ ಮಾಡಿದ್ದೇನೆ. ನಾನು ಸಮಾರಂಭಗಳಿಗೆ ಮತ್ತು ಪಾರ್ಟಿಗಳಿಗೆ ಹೋಗಲಿಲ್ಲ. ನಾನು ಭಾರತಕ್ಕಾಗಿ ಏನಾದರೂ ಮಾಡಲು ಬಯಸಿದ್ದರಿಂದ ನಾನು ಫೋನ್ ಬಳಸಲಿಲ್ಲ. ನನ್ನ ಏಕೈಕ ಗಮನ ತರಬೇತಿಯಾಗಿತ್ತು.
6. ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಪದಕದ ಬಣ್ಣವನ್ನು ಬದಲಾಯಿಸುವ ಬಗ್ಗೆ ಯಾವುದೇ ಆಲೋಚನೆಗಳಿವೆಯೇ?
ಸದ್ಯಕ್ಕೆ ನಾನು ಬೆಳ್ಳಿ ಪದಕದಿಂದ ತುಂಬಾ ಸಂತೋಷವಾಗಿದ್ದೇನೆ. ಕಾಮನ್ವೆಲ್ತ್ ಗೇಮ್ಸ್ ಮತ್ತು ಏಷ್ಯನ್ ಗೇಮ್ಸ್ 2022ರಲ್ಲಿ ಇವೆ. ನಾನು ಆ ಸ್ಪರ್ಧೆಗಳಲ್ಲಿ ಉತ್ತಮ ಪ್ರದರ್ಶನ ನೀಡಲು ಪ್ರಯತ್ನಿಸುತ್ತೇನೆ ಮತ್ತು ನಂತರ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ನನ್ನ ಪದಕದ ಬಣ್ಣವನ್ನು ಬೆಳ್ಳಿಯಿಂದ ಚಿನ್ನಕ್ಕೆ ಬದಲಾಯಿಸಲು ಪ್ರಯತ್ನಿಸುತ್ತೇನೆ.
7. ಈಗ ಯಾವ ಯೋಜನೆಗಳಿವೆ?
ನಾನು ಎಲ್ಲರೊಂದಿಗೆ ಆನಂದಿಸುತ್ತಿದ್ದೇನೆ. ನಾನು ಅನೇಕ ಜನರನ್ನು ಭೇಟಿಯಾಗುತ್ತಿದ್ದೇನೆ. ಅವರು ನನ್ನನ್ನು ಭೇಟಿಯಾಗಲು ಬರುತ್ತಿದ್ದಾರೆ ಮತ್ತು ನಾನು ಸಾಕಷ್ಟು ಪ್ರೀತಿ ಪಡೆಯುತ್ತಿದ್ದೇನೆ. ನಾನು ಎಲ್ಲರೊಂದಿಗೆ ಆನಂದಿಸುತ್ತೇನೆ ಮತ್ತು ಶೀಘ್ರದಲ್ಲೇ ನನ್ನ ತರಬೇತಿಯನ್ನು ಪುನರಾರಂಭಿಸುತ್ತೇನೆ.
