ಪ್ಯಾರಿಸ್: 17ನೇ ಶ್ರೇಯಾಂಕಿತ ಆಟಗಾರ ಪ್ಯಾಬ್ಲೊ ಕ್ಯಾರೆನೊ ಬುಸ್ಟಾ ತಮ್ಮ ವೃತ್ತಿ ಜೀವನದ ಎರಡನೇ ಕ್ವಾರ್ಟರ್ ಫೈನಲ್ ತಲುಪಿದ್ದು, ಲೆಜೆಂಡ್ ಜೋಕೊವಿಕ್ ವಿರುದ್ಧ ಮರುಪಂದ್ಯವನ್ನು ಪಡೆದಿದ್ದಾರೆ. ಇವರಿಬ್ಬರ ನಡುವಿನ ಯುಎಸ್ ಕ್ವಾರ್ಟರ್ ಫೈನಲ್ ಪಂದ್ಯ ಸಂಪೂರ್ಣವಾಗಿ ಮುಗಿಯದೇ ಕೊನೆಗೊಂಡಿತ್ತು.
ಕಳೆದ ತಿಂಗಳು ಯುಎಸ್ ಓಪನ್ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಬುಸ್ಟಾ ಹಾಗೂ ಜೋಕೊವಿಕ್ ಎದುರುಬದರಾಗಿದ್ದರು. ಈ ವೇಳೆ ಸೆಟ್ ಕಳೆದುಕೊಂಡ ಸಿಟ್ಟಿನಲ್ಲಿ ಜೋಕೊವಿಕ್ ಆಕಸ್ಮಿಕವಾಗಿ ಹೊಡೆದ ಚೆಂಡು ಲೈನ್ ಅಂಪೈರ್ಗೆ ಬಡಿದಿತ್ತು. ಆಕಸ್ಮಿಕವಾಗಿ ನಡೆದರೂ ಇದು ಪಂದ್ಯವಾಳಿಯ ನಿಯಮಗಳಿಗೆ ವಿರುದ್ಧವಾಗಿದ್ದರಿಂದ ಜೋಕೊವಿಕ್ ಗೆಲ್ಲುವ ನೆಚ್ಚಿನ ಆಟಗಾರನಾಗಿದ್ದರೂ ಮಾಡಿದ ತಪ್ಪಿಗೆ ಪಂದ್ಯದಿಂದ ಅನರ್ಹಗೊಂಡಿದ್ದರು. ಇದಿರಂದ ಪಂದ್ಯ ಪೂರ್ಣವಾಡದೆ ಬುಸ್ಟಾ ಸೆಮಿಫೈನಲ್ ಪ್ರವೇಶಿಸಿದ್ದರು.
ಸೋಮವಾರ ನಡೆದ ಪಂದ್ಯದಲ್ಲಿ ಕ್ಯಾರೆನೊ ಬುಸ್ಟಾ 186ನೇ ಶ್ರೇಯಾಂಕದ ಡೇನಿಯಲ್ ಅಲ್ಟ್ಮೇಯರ್ ಅವರನ್ನು 6-1, 7-5 ಹಾಗೂ 6-2 ರಲ್ಲಿ ಮಣಿಸಿ ಎರಡನೇ ಬಾರಿಗೆ ಫ್ರೆಂಚ್ ಓಪನ್ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ್ದಾರೆ. 2017ರಲ್ಲಿ ಮೊದಲ ಬಾರಿಗೆ ಪ್ರವೇಶ ಪಡೆದಿದ್ದರು.
ಇದೀಗ ಸ್ಪೇನ್ ಟೆನ್ನಿಸ್ ಪ್ಲೇಯರ್ ಮತ್ತೆ ಜೋಕೊವಿಕ್ ವಿರುದ್ಧ ಸೆಣಸಾಡಲು ಸಿದ್ಧವಾಗುತ್ತಿದ್ದಾರೆ. ಇತ್ತ ದಾಖಲೆಯ 18ನೇ ಗ್ರ್ಯಾಂಡ್ಸ್ಲಾಮ್ ಪ್ರಶಸ್ತಿ ಮೇಲೆ ಕಣ್ಣಿಟ್ಟಿರುವ ಜೋಕೊವಿಕ್ ಯುಎಸ್ ಓಪನ್ನಲ್ಲಿ ತಪ್ಪನ್ನು ತಿದ್ದಿಕೊಂಡು ತಾಳ್ಮೆಯಿಂದ ಆಡುತ್ತಾ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ್ದಾರೆ. ಇವರಿಬ್ಬರ ನಡುವಿನ ಪಂದ್ಯ ಬುಧವಾರ ನಡೆಯಲಿದೆ.
ಇಂದಿನ ಫ್ರೆಂಚ್ ಓಪನ್ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ 19 ಗ್ರ್ಯಾಂಡ್ಸ್ಲಾಮ್ ವಿಜೇತ ರಾಫೆಲ್ ನಡಾಲ್ ಇಟಲಿಯ ಜನ್ನಿಕ್ ಸಿನ್ನರ್ ವಿರುದ್ಧ ಸೆಣಸಾಡಲಿದ್ದಾರೆ.
