ಪ್ಯಾರಿಸ್: ಜೆಕ್ ಗಣರಾಜ್ಯದ ಬಾರ್ಬೊರಾ ಕ್ರೆಜಿಕೋವಾ ಫ್ರೆಂಚ್ ಓಪನ್‌ನ ಫೈನಲ್ ತಲುಪಿದ್ದಾರೆ. ಫೈನಲ್ನಲ್ಲಿ ಕ್ರೆಜಿಕೋವಾ ರಷ್ಯಾದ ಅನಸ್ತಾಸಿಯಾ ಪಾವಲ್ಯುಚೆಂಕೋವಾ ವಿರುದ್ಧ ಪ್ರಶಸ್ತಿಗಾಗಿ ಸೆಣೆಸಲಿದ್ದಾರೆ.
ಗುರುವಾರ ನಡೆದ ಸೆಮಿಫೈನಲ್ನಲ್ಲಿ ಕ್ರೆಜಿಕೋವಾ, ಗ್ರೀಸ್‌ನ ಮಾರಿಯಾ ಸಕ್ಕಾರಿ ವಿರುದ್ಧ ರೋಚಕ ಗೆಲುವು ಸಾಧಿಸಿದರು. ಇಬ್ಬರೂ ಆಟಗಾರ್ತಿಯರು ಪೈಪೋಟಿಯುಕ್ತ ಆಟದ ಮೂಲಕ ಗಮನ ಸೆಳೆದರು. ಕೊನೆಗೆ 7-5, 4-6, 9-7ರಲ್ಲಿ ಜಯ ಕ್ರೆಜ್ಕಿಕೋವಾ ಪಾಲಾಯಿತು.
ಮೊದಲ ಸೆಟ್ ಒಂದು ಹಂತದಲ್ಲಿ ಅದು 5-5ರ ಸಮಬಲದಲ್ಲಿತ್ತು. ಆದರೆ ಕೊನೆಯಲ್ಲಿ ಪ್ರಾಬಲ್ಯ ಸಾಧಿಸಿದ ಕ್ರೆಜಿಕೋವಾ 7-5 ಅಂತರದಿಂದ ಗೆದ್ದರು. ಬಳಿಕ 2ನೇ ಸೆಟ್ನಲ್ಲಿ ತಿರುಗೇಟು ನೀಡಿದ ಸಕ್ಕಾರಿ 6-4ರಿಂದ ಗೆಲ್ಲುವಲ್ಲಿ ಯಶಸ್ವಿಯಾದರು. ತದನಂತರ ಭಾರೀ ರೋಚಕತೆಯಿಂದ ಕೂಡಿದ್ದ ಮೂರನೇ ಸೆಟ್ನಲ್ಲಿ ಇಬ್ಬರೂ 7-7ರ ಸಮಬಲ ಸಾಧಿಸಿದ್ದರು. ಈ ವೇಳೆ ಮೇಲುಗೈ ಸಾಧಿಸಿದ ಕ್ರೆಜಿಕೋವಾ 9-7ರಿಂದ ಗೆದ್ದು ಫೈನಲ್ಗೆ ಎಂಟ್ರಿ ಪಡೆದುಕೊಂಡರು.
ಫೈನಲ್ನಲ್ಲಿ ರಷ್ಯಾದ ಅನಸ್ತಾಸಿಯಾ ಪಾವಲ್ಯುಚೆಂಕೋವಾ ವಿರುದ್ಧ ಕ್ರೆಜಿಕೋವಾ ಕಾದಾಡಲಿದ್ದಾರೆ. ಪಾವಲ್ಯುಚೆಂಕೋವಾ, ಸ್ಲೊವೇನಿಯಾದ ತಮಾರಾ ಜಿಡಾನ್ಸೆಕ್ ಅವರನ್ನು 7-5, 6-3ರಿಂದ ಮಣಿಸಿ ಅಂತಿಮ ಸುತ್ತಿಗೆ ಪ್ರವೇಶಿಸಿದ್ದಾರೆ. ಫೈನಲ್ ಪಂದ್ಯ ನಾಳೆ ನಡೆಯಲಿದೆ.
ಇಂದು (ಶುಕ್ರವಾರ) ಪುರುಷರ ಸೆಮಿಫೈನಲ್ನಲ್ಲಿ ನೊವಾಕ್ ಜೊಕೊವಿಕ್ ಮತ್ತು ರಾಫೆಲ್ ನಡಾಲ್ ಮುಖಾಮುಖಿಯಾಗಲಿದ್ದಾರೆ. ಇನ್ನೊಂದು ಸೆಮಿಫೈನಲ್ ಪಂದ್ಯದಲ್ಲಿ ಅಲೆಕ್ಸಾಂಡರ್ ಜ್ವೆರೆವ್ ಮತ್ತು ಸ್ಟೆಫನೊಸ್ ಸಿಟ್ಸಿಪಾಸ್ ಎದುರಾಗಲಿದ್ದಾರೆ.
ಇದನ್ನೂ ಓದಿ: ’ಪಾಕಿಸ್ತಾನ ತಂಡಕ್ಕೆ ಧೋನಿಯಂತಹ ನಾಯಕ, ಫಿನಿಷರ್ನ ಅವಶ್ಯಕತೆಯಿದೆ’
