ನವದೆಹಲಿ: ಭಾರತ ಕ್ರಿಕೆಟ್ ತಂಡದ ರನ್ ಮಷಿನ್ ಎಂದೇ ಪರಿಗಣಿಸಲ್ಪಟ್ಟ ನಾಯಕ ವಿರಾಟ್ ಕೊಹ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿ ಇಂದಿಗೆ 13 ವರ್ಷವಾಗುತ್ತಿದೆ. 2008ರ ಆಗಸ್ಟ್ 18ರಂದು ಏಕದಿನ ಪಂದ್ಯವನ್ನಾಡುವ ಆಡುವ ಮೂಲಕ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಕಾಲಿರಿಸಿದ್ದರು.
ಶ್ರೀಲಂಕಾ ಎದುರು ಮೊದಲ ಏಕದಿನ ಪಂದ್ಯವಾಡಿದ ವಿರಾಟ್, ಕೇವಲ 22 ಎಸೆತಗಳನ್ನೆದುರಿಸಿ ಒಂದು ಬೌಂಡರಿ ಮೂಲಕ 12 ರನ್ ಬಾರಿಸಿದ್ದರು. ಬಳಿಕ ಲಂಕಾದ ಬೌಲರ್ ನುವಾನ್ ಕುಲಸೇಖರ ಎಸೆತದಲ್ಲಿ ವಿಕೆಟ್ ಒಪ್ಪಿಸಿದ್ದರು. ಈ ಪಂದ್ಯದಲ್ಲಿ ಭಾರತ ಹೀನಾಯವಾಗಿ ಸೋಲೊಪ್ಪಿಕೊಂಡಿತ್ತು. ಕೇವಲ 146 ರನ್ಗಳಿಗೆ ತನ್ನೆಲ್ಲ ವಿಕೆಟ್ ಕಳೆದುಕೊಂಡಿತ್ತು. ಆದರೆ ಲಂಕಾ ಇನ್ನೂ 91 ಎಸೆತಗಳು ಬಾಕಿ ಇರುವಾಗಲೇ ನಿಗದಿತ ಮೊತ್ತ ಕಲೆಹಾಕಿ ಗೆಲುವಿನ ನಗೆ ಬೀರಿತ್ತು.
ಇನ್ನು ಕೊಹ್ಲಿ ತನ್ನ ಮೊದಲ ಶತಕ ಸಿಡಿಸಲು 14 ಪಂದ್ಯ ಕಾಯಬೇಕಾಯಿತು. 2009ರಲ್ಲಿ ಕೊಲ್ಕತ್ತಾದಲ್ಲಿ ನಡೆದ ಶ್ರೀಲಂಕಾ ವಿರುದ್ಧದ ಏಕದಿನ ಪಂದ್ಯದಲ್ಲಿ ಅವರು ತಮ್ಮ ಮೊದಲ ಶತಕ ದಾಖಲಿಸಿದರು. ಇದಾದ ಬಳಿಕ ಕೊಹ್ಲಿ ವೈಫಲ್ಯ ಕಂಡಿದ್ದು ಕಡಿಮೆ. ಬ್ಯಾಟಿಂಗ್ಗಾಗಿ ಮೈದಾನಕ್ಕಿಳಿದರೆ ಒಂದಲ್ಲೊಂದು ದಾಖಲೆಗಳು ಕೊಹ್ಲಿ ಹೆಸರು ಸೇರಿಕೊಳ್ಳುತ್ತಿವೆ.
ಈವರೆಗೆ ಕೊಹ್ಲಿ ಒಟ್ಟು 254 ಏಕದಿನ ಪಂದ್ಯವಾಡಿದ್ದು, 59.07ರ ಸರಾಸರಿಯಲ್ಲಿ 12,169 ರನ್ ಕಲೆ ಹಾಕಿದ್ದಾರೆ. ಇದರಲ್ಲಿ ಪಾಕಿಸ್ತಾನ ವಿರುದ್ಧದ 183ರನ್ ವೈಯಕ್ತಿಕ ಅತೀ ಹೆಚ್ಚು ರನ್ ಆಗಿದೆ. ಬಳಿಕ 2011ರಲ್ಲಿ, ವೆಸ್ಟ್ ಇಂಡೀಸ್ ವಿರುದ್ಧ ತಮ್ಮ ಮೊದಲ ಟೆಸ್ಟ್ ಪಂದ್ಯವಾಡಿದ್ದರು.
