ಲಂಡನ್: ಜೂನ್ 18ರಿಂದ ಆರಂಭವಾಗಲಿರುವ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ನಲ್ಲಿ ಅತ್ಯುತ್ತಮ ಪ್ರದರ್ಶನ ತೋರುತ್ತಿರುವ ಭಾರತದ ವಿರುದ್ಧ ಕಿವೀಸ್ ದೊಡ್ಡ ಸವಾಲನ್ನು ಎದುರಿಸಬೇಕಾಗಿದೆ ಎಂದು ಕಿವೀಸ್ ಲೆಗ್ ಸ್ಪಿನ್ನರ್ ಇಶ್ ಸೋಧಿ ಹೇಳಿದ್ದಾರೆ.
ಇತ್ತೀಚಿನ ದಿನಗಳಲ್ಲಿ ಹೆಚ್ಚು ಟಿ20 ಬೌಲರ್ ಆಗಿ ಮಾರ್ಪಟ್ಟಿರುವ ಸೋಧಿ, ಇಂಗ್ಲೆಂಡ್‌ನಲ್ಲಿ ನಡೆಯಲಿರುವ ಟಿ20 ಬ್ಲಾಸ್ಟ್‌ನಲ್ಲಿ ಪಾಲ್ಗೊಳ್ಳಲಿದ್ದಾರೆ. ಇದೇ ಸಂದರ್ಭದಲ್ಲಿ ಕಿವೀಸ್ ತಂಡದ ಆಟಗಾರರು WTC ಫೈನಲ್ನಲ್ಲಿ ಆಡಲಿದ್ದಾರೆ. ಭಾರತ ಅಸಾಧಾರಣ ಕ್ರಿಕೆಟ್ ಆಡುತ್ತಿದೆ ಮತ್ತು ಅವರ ಸಾಮರ್ಥ್ಯ ಉತ್ತುಂಗದಲ್ಲಿದೆ ಎಂದು ಸೋಧಿ ಹೇಳಿದ್ದಾರೆ.
ತಟಸ್ಥ ಸ್ಥಳದಲ್ಲಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ ಆಡುತ್ತಿರುವುದು ನಿಜಕ್ಕೂ ಅದ್ಭುತವಾಗಿದೆ. ಭಾರತ ತಂಡ ಆಸ್ಟ್ರೇಲಿಯಾಕ್ಕೆ ಹೋಗಿ ಅಲ್ಲಿ ಎರಡು ಸರಣಿಗಳನ್ನು ಗೆದ್ದಿದ್ದಾರೆ. ಅವರು ಅಸಾಧಾರಣ ಕ್ರಿಕೆಟ್ ಆಡಿದ್ದಾರೆ. ಅವರ ಬೌಲರ್ಗಳ ಪವರ್ನಿಂದ ಉತ್ತುಂಗದಲ್ಲಿದ್ದಾರೆ. ಆದ್ದರಿಂದ ನೀವು(ಕಿವೀಸ್) ಅವರ ವಿರುದ್ಧ ಗೆಲ್ಲಬೇಕೆಂದು ತೆರಳಿದರೆ ಅದು ಅದ್ಭುತ ಸವಾಲಾಗಲಿದೆ. ಒಂದು ವೇಳೆ ನ್ಯೂಜಿಲ್ಯಾಂಡ್ ಗೆದ್ದರೆ ಅದು ನ್ಯೂಜಿಲ್ಯಾಂಡ್ ಕ್ರಿಕೆಟ್ನ ಬಹುದೊಡ್ಡ ಸಾಧನೆಯಾಗಲಿದೆ" ಎಂದು ಸೋಧಿ ದ ಗ್ರೇಡ್ ಕ್ರಿಕೆಟ್ ಎಂಬ ಯೂಟ್ಯೂಬ್ ಶೋ ನಲ್ಲಿ ತಿಳಿಸಿದ್ದಾರೆ.
ನ್ಯೂಜಿಲ್ಯಾಂಡ್ ಈಗಾಗಲೇ ಇಂಗ್ಲೆಂಡ್ ವಿರುದ್ಧ ಟೆಸ್ಟ್ ಸರಣಿಯನ್ನಾರಂಭಿಸಿದೆ. ಮೊದಲ ಪಂದ್ಯದಲ್ಲಿ ಬೌಲಿಂಗ್ ಮತ್ತು ಬ್ಯಾಟಿಂಗ್ನಲ್ಲಿ ಅದ್ಭುತ ಪ್ರದರ್ಶನ ತೋರಿದೆ. WTC ಫೈನಲ್ಗೂ ಮುನ್ನ ಮತ್ತೊಂದು ಪಂದ್ಯ ನಡೆಯಲಿದ್ದು, ಇದು ಅವರಿಗೆ ಅಭ್ಯಾಸ ಪಂದ್ಯದಂತಾಗಲಿದೆ.
ಇದನ್ನು ಓದಿ:ಭಾರತ ಗೆದ್ದ ಬಾರ್ಡರ್-ಗವಾಸ್ಕರ್ ಟ್ರೋಫಿಗೆ 'ಸಾರ್ವಕಾಲಿಕ ಟೆಸ್ಟ್ ಸರಣಿ' ಪಟ್ಟ
