ಲಕ್ನೋ (ಉತ್ತರ ಪ್ರದೇಶ): ನಿನ್ನೆ ನಡೆದ ಐಪಿಎಲ್ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ಮತ್ತು ಲಕ್ನೋ ಸೂಪರ್ ಜೈಂಟ್ಸ್ ಮುಖಾಮುಖಿಯಾಗಿದ್ದವು. ಉಭಯ ತಂಡಕ್ಕೂ ಪ್ಲೇ ಆಫ್ ಪ್ರವೇಶಕ್ಕೆ ಅತ್ಯಂತ ಪ್ರಮುಖ ಪಂದ್ಯ ಇದಾಗಿತ್ತು. ಲಕ್ನೋ ಕೊನೆಯ ಓವರ್ ವರೆಗೆ ಪಂದ್ಯವನ್ನು ನಿಯಂತ್ರಿಸಿ 5 ರನ್ ನಿಂದ ಮುಂಬೈಅನ್ನು ಮಣಿಸಿತು. ಇದರಿಂದ ನಾಲ್ಕರಿಂದ ಮೂರನೇ ಸ್ಥಾನಕ್ಕೆ ಅಂಕಪಟ್ಟಿಯಲ್ಲಿ ಕೃನಾಲ್ ಪಡೆ ಏರಿಕೆ ಕಂಡು ಪ್ಲೇ ಆಫ್ ಹಾದಿ ಸುಲಭ ಮಾಡಿಕೊಂಡಿತು.
ಲಕ್ನೋ ಗೆಲುವಿನಲ್ಲಿ ಬ್ಯಾಟರ್ಗಳಷ್ಟೇ ಬೌಲರ್ಗಳ ಪಾತ್ರವೂ ಇದೆ. ಕೊನೆಯ ನಾಲ್ಕು ಓವರ್ನಲ್ಲಿ ಕೃನಾಲ್ ಬೌಲಿಂಗ್ನಲ್ಲಿ ಉತ್ತಮ ನಿಯಂತ್ರಣ ಸಾಧಿಸಿದರು. ಇದರಿಂದ ಗ್ರೀಸ್ನಲ್ಲಿದ್ದ ಮುಂಬೈ ಇಂಡಿಯನ್ಸ್ನ ಬಿಗ್ ಹಿಟ್ಟರ್ಗಳಾದ ಕ್ಯಾಮರಾನ್ ಗ್ರೀನ್ ಮತ್ತು ಟಿಮ್ ಡೇವಿಡ್ಗೆ ರನ್ ಗಳಿಸಲು ಸಾಧ್ಯವಾಗಲಿಲ್ಲ. ಯಶಸ್ವಿ ಯಾರ್ಕರ್ನಿಂದ ಕೊನೆಯ ನಾಲ್ಕು ಓವರ್ನಲ್ಲಿ ಲಕ್ನೋ ಗೆಲುವು ಕಂಡಿತು.
ಮುಂಬೈ ಇಂಡಿಯನ್ಸ್ ಗೆಲುವಿಗೆ ಕೊನೆಯ ಐದು ಓವರ್ನಲ್ಲಿ 52 ರನ್ ಗಳಿಸ ಬೇಕಿತ್ತು ಆದರೆ 47 ರನ್ ಮಾತ್ರ ಗಳಿಸಲು ಶಕ್ತವಾಯಿತು. ನವೀನ್ ಉಲ್ ಹಕ್, ಮೊಹ್ಸಿನ್ ಖಾನ್ ಮತ್ತು ಯಶ್ ಠಾಕೂರ್ ಡೆತ್ ಓವರ್ನಲ್ಲಿ ಉತ್ತಮ ಪ್ರದರ್ಶನ ನೀಡಿದರು. ಕೊನೆಯ ಓವರ್ನ 6 ಬಾಲ್ಗೆ 11 ರನ್ನ ಅವಶ್ಯಕತೆ ಇತ್ತು. ಕೃನಾಲ್ ಈ ಆರು ಬಾಲ್ನ ಜವಾಬ್ದಾರಿಯನ್ನು ಮೊಹ್ಸಿನ್ ಖಾನ್ಗೆ ನೀಡಿದ್ದರು.
ಮೊಹ್ಸಿನ್ ಖಾನ್ ಇದನ್ನು ಯಶಸ್ವಿಯಾಗಿ ಪೂರೈಸಿದರು. 6 ಬಾಲ್ನಲ್ಲಿ ಉತ್ತಮ ಯಾರ್ಕರ್ಗಳ ಪ್ರಯೋಗದಿಂದ ಕೇವಲ 5 ರನ್ ಬಿಟ್ಟುಕೊಟ್ಟ ತಂಡಕ್ಕೆ ಗೆಲುವು ತಂದರು. ನಿನ್ನೆ ಪಂದ್ಯದಲ್ಲಿ 3 ಓವರ್ ಮಾಡಿದ್ದ ಮೊಹ್ಸಿನ್ ಖಾನ್ ಕೇವಲ 26 ರನ್ ಬಿಟ್ಟುಕೊಟ್ಟು 1 ವಿಕೆಟ್ ಕಬಳಿಸಿದರು. ಪಂದ್ಯದ ಎರಡನೇ ಓವರ್ನಲ್ಲಿ 13 ರನ್ ಬಿಟ್ಟುಕೊಟ್ಟರೆ ನಂತರ 17ನೇ ಓವರ್ನಲ್ಲಿ 8 ರನ್ ಕೊಟ್ಟು ವಧೇರಾ ಅವರ ವಿಕೆಟ್ ಕಿತ್ತರು. 20ನೇ ಓವರ್ನಲ್ಲಿ 5 ರನ್ ಮಾತ್ರ ನೀಡಿದರು. ಕೊನೆಯ ಓವರ್ನಲ್ಲಿ ಟಿಮ್ ಡೇವಿಡ್ ಮತ್ತು ಗ್ರೀನ್ ಕ್ರೀಸ್ನಲ್ಲಿದ್ದರೂ ಗೆಲುವಿನ ರನ್ ಕದಿಯದಂತೆ ಮೊಹ್ಸಿನ್ ಖಾನ್ ಕಟ್ಟಿಹಾಕಿದರು.
ಪಂದ್ಯದ ನಂತರ ಮಾತನಾಡಿದ ಮೊಹ್ಸಿನ್ ಖಾನ್ "ನಾನು ಗಾಯಗೊಂಡು ಒಂದು ವರ್ಷದ ನಂತರ ಆಡುತ್ತಿದ್ದೇನೆ, ಇದು ಕಠಿಣ ಸಮಯವಾಗಿದೆ. ಕಳೆದ 10 ದಿನಗಳಿಂದ ನನ್ನ ತಂದೆ ಐಸಿಯುನಲ್ಲಿದ್ದರು. ನಿನ್ನೆ ಡಿಸ್ಚಾರ್ಜ್ ಆಗಿದ್ದಾರೆ. ಅವರು ಪಂದ್ಯವನ್ನು ನೋಡುತ್ತಿರುತ್ತಾರೆ. ನಾನು ಅವರಿಗಾಗಿ ಬೌಲಿಂಗ್ ಮಾಡಿದೆ" ಎಂದಿದ್ದಾರೆ.
"ನಾನು ಅಭ್ಯಾಸ ಮಾಡುವಾಗ ಏನು ಕಲಿತಿದ್ದೇನೋ ಅದನ್ನೇ ಇಲ್ಲಿ ಪ್ರಯೋಗಿಸಿದೆ. ಅದು ಬಿಟ್ಟರೆ ಬೇರೆ ಏನು ಮಾಡಲಿಲ್ಲ. ನಾಯಕ ಕೃನಾಲ್ ಅವರು ಸಹ ಅದೇ ಸಲಹೆಯನ್ನು ನನಗೆ ನೀಡಿದರು. ಸ್ಕೋರ್ ಬೋರ್ಡ್ ಬಗ್ಗೆ ಹೆಚ್ಚು ಚಿಂತಿಸಲಿಲ್ಲ. ಕೇವಲ ಕೊನೆಯ ಆರು ಬಾಲ್ಗಳ ಬಗ್ಗೆ ಮಾತ್ರ ಏಕಾಗ್ರತೆ ವಹಿಸಿದ್ದೆ. ಕೊನೆಯಲ್ಲಿ ಬೋರ್ಡ್ ಕಂಡಾಗ ನಾನು ಉತ್ತಮವಾಗಿ ನಿರ್ವಹಿಸಿದ್ದೆ. ಬಾಲ್ ಪಿಚ್ನಲ್ಲಿ ನಿಂತು ಹೋಗುವುದನ್ನು ಗಮನಿಸಿ ಎರಡು ಸ್ಲೋ ಬಾಲ್ ಪ್ರಯೋಗಿಸಿದೆ. ನಂತರ ಯಾರ್ಕರ್ಗಳನ್ನು ಮಾಡಿದೆ. ಅವು ರಿವರ್ಸ್ ಸ್ವಿಂಗ್ ಆದವು, ಇದು ಉತ್ತಮ ಎನಿಸಿತು" ಎಂದಿದ್ದಾರೆ. ಇದರ ಜೊತೆಗೆ ತಂಡದಲ್ಲಿ ಸಹಕಾರ ನೀಡಿದ ಗೌತಮ್ ಗಂಭೀರ್, ವಿಜಯ್ ದಹಿಯಾ ಅವರಿಗೆ ಧನ್ಯವಾದ ಹೇಳಿದರು.
ಇದನ್ನೂ ಓದಿ: ಮುಂಬೈ ವಿರುದ್ಧ ಲಕ್ನೋಗೆ 5 ರನ್‌ಗಳ ಗೆಲುವು: ಅಬ್ಬರಿಸಿದ ಸ್ಟೋಯಿನಿಸ್‌
