ನವದೆಹಲಿ: 41 ವರ್ಷದ ಮಹೇಂದ್ರ ಸಿಂಗ್ ಧೋನಿಗೆ ಇದು ಕೊನೆಯ ಐಪಿಎಲ್ ಎಂದು ಸುದ್ದಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿತ್ತು, ಆಸ್ಟ್ರೇಲಿಯಾದ ಮಾಜಿ ಆರಂಭಿಕ ಆಟಗಾರ ಮ್ಯಾಥ್ಯೂ ಹೇಡನ್ ಮಾತುಗಳು ಈ ವೈರಲ್ ವಿಚಾರಕ್ಕೆ ಹೆಚ್ಚಿನ ಪುಷ್ಠಿ ನೀಡಿದೆ. 2023ರ ಐಪಿಎಲ್ ಬಗ್ಗೆ ಮಾತನಾಡಿರುವ ಅವರು ಈ ವರ್ಷದ ಐಪಿಎಲ್ ಧೋನಿಯ ಸಲುವಾಗಿ ವಿಶೇಷವಾಗಿರಲಿದೆ ಎಂದು ಹೇಳಿದ್ದಾರೆ.
ಇನ್ನು 21 ದಿನದಲ್ಲಿ ಭಾರತದಲ್ಲಿ ಪುರುಷರ ಐಪಿಎಲ್ ಆರಂಭವಾಗಲಿದೆ. ಈಗಾಗಲೇ ಐಪಿಎಲ್ ಪ್ರಚಾರ ಆರಂಭವಾಗಿದ್ದು, ಸ್ಟಾರ್ ಸ್ಪೋರ್ಟ್ ಬಿಡುಗಡೆ ಮಾಡಿರುವ ಪ್ರಮೋಷನ್ ವಿಡಿಯೋ ವೈರಲ್ ಆಗಿದೆ. ಚೊಚ್ಚಲ ಮಹಿಳಾ ಐಪಿಎಲ್ ಭರ್ಜರಿಯಾಗಿ ಸಾಗುತ್ತಿದ್ದು, ಐಪಿಎಲ್ಗೂ ಮುನ್ನ ಜನರನ್ನು ಟೀವಿ ಮುಂದೆ ಕರೆ ತಂದಿದೆ. ಪ್ರಥಮ ಆವೃತ್ತಿಯ ಮಹಿಳೆಯರ ಲೀಗ್ನಲ್ಲಿ ಸಿಕ್ಸ್, ಫೋರ್ಗಳಿಂದ ಬೃಹತ್ ರನ್ ಹರಿದು ಬರುತ್ತಿದೆ.
ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಬಹುತೇಕ ಸದಸ್ಯರು ಹೋಮ್ ಗೌಂಡ್ನಲ್ಲಿ ಸೇರಿ ಅಭ್ಯಾಸ ಆರಂಭಿಸಿದ್ದಾರೆ. ಇದೇ ತಿಂಗಳ ಎರಡರಂದು ಧೋನಿ ತಂಡವನ್ನು ಸೇರಿದ್ದರು. ಧೋನಿ ನೆಟ್ನಲ್ಲಿ ಭರ್ಜರಿ ಬೆವರಿಳಿಸುತ್ತಿದ್ದಾರೆ. ಧೋನಿ ಜೊತೆಗೆ ವಿದೇಶಿ ಆಟಗಾರರು ತಂಡಕ್ಕೆ ಸೇರಿಕೊಂಡಿದ್ದು, ಎಂಎ ಚಿದಂಬರಂ ಸ್ಟೇಡಿಯಂ ಅಭ್ಯಾಸದಲ್ಲಿ ತೊಡಗಿಕೊಂಡಿದ್ದಾರೆ.
ಆಸ್ಟ್ರೇಲಿಯಾದ ಮಾಜಿ ಆರಂಭಿಕ ಆಟಗಾರ ಮ್ಯಾಥ್ಯೂ ಹೇಡನ್ ಮಾತನಾಡಿ,"ಐಪಿಎಲ್ ಆರಂಭವಾಗುತ್ತಿದೆ, ಎಲ್ಲೆಡೆ ಮತ್ತೆ ಚೆನ್ನೈನ ಹಳದಿ ಹಬ್ಬ ಪ್ರಾರಂಭವಾಗುತ್ತದೆ. ಚೆನ್ನೈನಲ್ಲಿ ಹಳದಿ ಸೇನೆಯ ಆಟಕ್ಕೆ ಪ್ರೇಕ್ಷಕರು ಕಾದು ಕುಳಿತಿದ್ದಾರೆ. ತವರು ನೆಲದಲ್ಲಿ ತಂಡದ ಗೆಲುವಿಗೆ ಬೆಂಬಲಿಸಲು ಪ್ರೇಕ್ಷಕರು ತುದಿಗಾಲಿನಲ್ಲಿದ್ದಾರೆ. ಕೋವಿಡ್ ಬಂಧನದ ರಿಲ್ಯಾಕ್ಸ್ ಆಗಲು ಪ್ರೇಕ್ಷಕರಿಗೆ ಐಪಿಎಲ್ ಬೃಹತ್ ಮನರಂಜನೆಯಾಗಿರಲಿದೆ" ಎಂದಿದ್ದಾರೆ.
ಧೋನಿ ನಾಯಕತ್ವದ ಬಗ್ಗೆ ಮಾತನಾಡಿದ ಹೇಡನ್," ತವರು ನೆಲದಲ್ಲಿ ಸಿಎಸ್ಕೆ ಸಾಧನೆ ಉತ್ತಮವಾಗಿದೆ. ಕೊನೆಯ ಬಾರಿಗೆ ಧೋನಿ ನಾಯಕತ್ವದಲ್ಲಿ ಸಿಎಸ್ಕೆ ಈ ಸಲ ಕಣಕ್ಕಿಳಿಯುತ್ತಿದೆ ಇದನ್ನೂ ಎಂದೂ ಮರೆಯಲು ಸಾಧ್ಯವಿಲ್ಲ" ಎಂದಿದ್ದಾರೆ. ಈ ಮೂಲಕ ಧೋನಿ ನಾಯಕರಾಗಿ ತಂಡವನ್ನು ಮುನ್ನಡೆಸಲಿರುವುದು ಪಕ್ಕಾ ಆಗಿದೆ. ಹೋದ ಆವೃತ್ತಿಯಲ್ಲಿ ಜಡೇಜಗೆ ಕ್ಯಾಪ್ಟನ್ ಸ್ಥಾನ ಕೊಡಲಾಗಿತ್ತು ಸತತ ಸೋಲಿನ ನಂತರ ಧೋನಿಯನ್ನು ಮತ್ತೆ ನಾಯಕರನ್ನಾಗಿ ಮಾಡಲಾಗಿತ್ತು. ಚೆನ್ನೈ ತಂಡ ಇದುವರೆಗೂ ನಾಯಕ ಯಾರೆಂದು ಘೋಷಿಸಿಲ್ಲ.
ನಾಲ್ಕು ಬಾರಿ ಚೆನ್ನೈ ಸೂಪರ್ ಕಿಂಗ್ಸ್ನ್ನು ಚಾಂಪಿಯನ್ ಪಟ್ಟಕ್ಕೇರಿಸಿದ್ದ ನಾಯಕ ಧೋನಿಗೆ ಸೂಕ್ತ ವಿದಾಯ ನೀಡಲು ಯೋಜಿಸಲಾಗಿದೆ ಎಂದು ಹೇಡನ್ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ. "ವಿಶೇಷವಾಗಿ ಚೆಪಾಕ್‌ನ ಅಭಿಮಾನಿಗಳಿಗೆ ವಿದಾಯ ಹೇಳಲು ಈ ಐಪಿಎಲ್ನಲ್ಲಿ ಊಹಿಸಲು ಸಾಧ್ಯವಾಗದ ರೀತಿಯ ವಿಶೇಷತೆ ಕಾದಿದೆ" ಎಂದಿದ್ದಾರೆ.
"ಧೋನಿ ಅಭಿಮಾನಿಗಳಿಗೆ ಈ ವರ್ಷ ವಿಶೇಷವಾಗಿರಲಿದೆ. ಅಲ್ಲದೇ ಎಂಎಸ್ ಧೋನಿಗೆ ನಿರ್ದಿಷ್ಟವಾಗಿ ಈ ವರ್ಷ ಹೆಚ್ಚು ವಿಶೇಷವಾಗಿ ಆಚರಿಸಿಲಾಗುತ್ತದೆ. ಇದು ಪ್ರೀಮಿಯರ್ ಲೀಗ್ನಲ್ಲಿ ಎಂಎಸ್ ಧೋನಿಯ ಪರಂಪರೆಯ ಜರ್ನಿಯ ಕೊನೆಯ ಆವೃತ್ತಿಯಾಗಿದೆ. ಅವರು ತಮ್ಮದೇ ಶೈಲಿಯಲ್ಲಿ ಅಭಿಮಾನಿಗಳಿಗೆ ಧನ್ಯವಾದ ತಿಳಿಸುತ್ತಾರೆ" ಎಂದಿದ್ದಾರೆ.
ಇದನ್ನೂ ಓದಿ: ಮಹಿಳಾ ಪ್ರೀಮಿಯರ್ ಲೀಗ್: ಪ್ಲೇ ಆಫ್‌ ಹಂತ ತಲುಪುತ್ತಾ RCB? ಹೀಗಿದೆ ಲೆಕ್ಕಾಚಾರ
